Matieland!

Matieland!
Regisseur	Pierre de Wet
Produksieleier	Pierre de Wet
Draaiboek	Jan Perold (storie)
Met	Steyn de Jager; Wynona Cheyney; Frederik Burgers
Redigeerder	Gerald Ehrlich; Barney Joffe
Uitgereik	20 September 1955
Land	Suid-Afrika
Taal	Afrikaans
IMDb-profiel

Matieland! is in 1955 in swart en wit verfilm as 'n Afrikaanse romantiese komedie met 'n rugbytema. Die verhaal speel af op die universiteitsdorp Stellenbosch en die titel verwys na die bynaam vir die plaaslike universiteit. Pierre de Wet was die vervaardiger sowel as die regisseur. Die draaiboek is gegrond op 'n verhaal deur Jan Perold.

Storie

'n Jong man ("Andries Viviers"), afkomstig van 'n plattelandse plaas, gaan na die Universiteit Stellenbosch waar hy sy rugbyvaardighede toon en verlief raak op die dogter ("Vickie") van sy chemieprofessor ("Pottie"). Professor Pottie hou nie van Andries se pa nie, wat destyds die hart van 'n meisie verower het waarop Pottie self verlief was. Die meisie het later Andries se ma geword. Pottie verhoed dat Andries gekies word vir die jaarlikse intervarsity-rugbywedstryd tussen Maties en Ikeys (die bynaam van die Universiteit van Kaapstad). Vickie oortuig Pottie om sy knoeiwerk ongedaan te maak, en Andries en sy mededinger om Vickie se liefde moet hulle verskille op die rugbyveld oplos om hulle span te help wen. Na die wedstryd herhaal Andries sy pa se liefdesverhaal en stap weg met Vickie. Verlooptyd: 73 minute.^[1]

Die rolprent is in en om Stellenbosch en die universiteit geskiet. Geboue wat in die rolprent verskyn en wat vandag nog bestaan, sluit die Nederduits Gereformeerde Studentekerk, die huidige poskantoor, die huidige wetsfakulteitgebou, en Wilgenhof-koshuis in.

Etlike tonele speel af in Wilgenhof-koshuis, waar Andries loseer. Die gebou het in 2010 (hierbo) nog baie dieselfde gelyk as toe dit in 1955 verfilm is.

Danie Craven, afrigter van die nasionale rugbyspan (1949-52) en president van die Suid-Afrikaanse Rugbyraad (1956-93), verskyn kortliks as die afrigter van Stellenbosch se rugbyspan, 'n posisie wat hy in die werklike lewe beklee het.

Die rolprent is vervaardig deur Afrikaanse Rolprentproduksies, Killarney (deel van Killarney Film Studios), wat ook verskeie ander Afrikaanse rolprente vervaardig het, soos die swart-en-wit films Altyd in my drome (1952), Inspan (1953), Hans-die-Skipper (1953), 'n Plan is 'n boerdery (1954), en Die ruiter in die nag (1963).^[2] Killarney se Engelse rolprente sluit in African Gold (1965); The Second Sin (1966); The Jackals (1967); The Cape Town Affair (1967); Majuba (1968); Satan's Harvest (1970); en Gold (1974).^[3]

Rolverdeling

Steyn de Jager
Wynona Cheyney
Frederik Burgers
Esther Mentz
Willie Herbst
Taffie Kikillus
Albie van der Byl
Nic Naudé

Produksiespan

Kamera: Peter Lang, bygestaan deur Rodney Berry
Redigering: Gerald Ehrlich, Barney Joffe
Klank: Edward Howes
Kontinuiteit: Elizabeth Wilman
Dekor: William van Reenen, Peter Yule
Grimering: William Bell

Sien ook

Lys van Afrikaanse rolprente

Verwysings

↑ "Matieland!". MNetCorporate.co.za. Besoek op 16 Januarie 2013.^{[dooie skakel]}
↑ "Afrikaanse Rolprentproduksies". IMDB.com. Besoek op 16 Januarie 2013.
↑ "Killarney Film Studios" (in Engels). IMDB.com. Geargiveer vanaf die oorspronklike op 23 September 2012. Besoek op 16 Januarie 2013.

[1] "Matieland!". MNetCorporate.co.za. Besoek op 16 Januarie 2013.^{[dooie skakel]}

[2] "Afrikaanse Rolprentproduksies". IMDB.com. Besoek op 16 Januarie 2013.

[3] "Killarney Film Studios" (in Engels). IMDB.com. Geargiveer vanaf die oorspronklike op 23 September 2012. Besoek op 16 Januarie 2013.

[1]

[2]

[3]