Miombo
Die miombo-boomveld is 'n bioom wat volgens die Wêreldnatuurlewefonds se skema resorteer onder die Tropiese of subtropiese grasveld, savanne en struikveld. Dit word suidwaarts van die ewenaar in die binneland van Afrika aangetref. Dit sluit vier onderskeibare boomveldsavanne-ekostreke in (onder gelys), wat deur die oorheersende teenwoordigheid van Brachystegia- en Julbernardia-boomspesies gekenmerk word, en wat 'n spektrum van klimaatstreke insluit wat wissel van vogtig tot semi-aried, en tropies tot subtropies of selfs gematigd.[1] Om waterverlies te beperk wissel hierdie bome hul blare tipies vir 'n kort periode in die droëseisoen, en hul nuwe blare bot net voor die aanbreek van die natseisoen. Die onderliggende chlorofil word onder die vars loof se ryk goue en rooi kleure verdoesel, 'n verskynsel wat aan herfskleure in gematigde streke herinner.
Benaming wysig
Die boomveld kry sy naam van miombo, die meervoud van muombo, wat die Bemba-woord vir Brachystegia-spesies is. Ander Bantoetale van die streek, soos Swahili en Shona, het verwante of identiese woorde, soos die Swahili-woord miyombo (enkelvoud myombo).
Ekostreke wysig
Miombo-boomveld word in 'n breë gordel oor suidsentrale Afrika gevind, van Angola in die weste tot Tanzanië in die ooste. Hierdie boomveld word oorheers deur bome van die subfamilie Caesalpinioideae, veral miombo (Brachystegia), Julbernardia en Isoberlinia, wat selde buite miombo-boomveld aangetref word. Die vier ekostreke is:
- Angolese miombo-boomveld (Angola)
- Sentraal-Zambesiese miombo-boomveld (Angola, Burundi, DRK, Malawi, Tanzanië, Zambië)
- Oostelike miombo-boomveld (Mosambiek, Tanzanië)
- Suidelike miombo-boomveld (Malawi, Mosambiek, suidelike Zambië, Zimbabwe)
Miombo-boomveld kan as droog of nat onderverdeel word na gelang van die gemiddelde jaarlikse neerslag.[2] Die droë boomveld kom voor in areas wat gemiddeld minder as 1 000 mm jaarlikse neerslag ontvang, en hierdie dele is oorwegend in Zimbabwe, sentraal-Tanzanië en die suidelike areas van Mosambiek, Malawi en Zambië. Die nat boomveld is die areas wat gemiddeld meer as 1 000 mm jaarlikse neerslag ontvang, en hierdie sub-bioom is in noordelike Zambië, oostelike Angola, sentraal-Malawi en suidwestelike Tanzanië geleë.
Mense wysig
Miombo-boomveld is van belang in die lewensbestaan van baie landelike mense wat staatmaak op die hulpbronne wat deur hierdie boomveld voorsien word. Die wye verskeidenheid plantspesies verskaf nie-timmerhoutprodukte soos vrugte, heuning, voer vir lewende hawe en brandhout aan etlike verskillende, maar hoofsaaklik Bantoevolke, soos die Bemba-, Lozi-, Yao-, Luvale-, Shona- en Lubamense.
Flora en fauna wysig
Ten spyte van die betreklik nutriënt-arm grond, lang droëseisoen, en lae neerslag in sommige areas, is hierdie boomveld die tuiste van baie spesies, insluitend verskeie endemiese voëlspesies. Die dominante bome is miombo-, oftewel Brachystegia-spesies. Dit verskaf ook voedsel en beskutting vir diere soos die savanne-olifant (Loxodonta africana), wildehond (Lycaon pictus), swartwitpens (Hippotragus niger) en mofhartbees (Sigmoceros lichtensteinii).[3]
Verspreiding wysig
-
Angolese miombo-boomveld -
Sentraal-Zambesiese miombo-boomveld -
Oostelike miombo-boomveld -
Suidelike miombo-boomveld
Verwysings wysig
- ↑ Gambiza, J.; Bond, W.; Frost, P.G.H.; Higgins, S. (2000). "Special Section: Land use options in dry tropical woodland ecosystems in Zimbabwe". Ecological Economics. 33 (3): 353–368. doi:10.1016/s0921-8009(00)00145-2.
- ↑ Abdallah, J.M.; Monela, G.G. (2007). "Overview of Miombo Woodlands in Tanzania" (PDF). Working Papers of Finnish Research Institute. 50: 9–23.
- ↑ Campbell, Bruce M. (red.) (1996). The Miombo Transition: Woodlands & Welfare in Africa. CIFOR. ISBN 979-8764-07-2.