Die moderne vyfkamp is 'n sportwedstryd wat vyf items insluit naamlik pistoolskiet, skermdegen, 200 m vryslag swem, perdespring (toonspring) en 'n 3 km veldloop.[1] Die sport word gereguleer deur die Union Internationale de Pentathlon Moderne (UIPM), die Internasionale Moderne Vyfkamp Unie.[1]

Piktogram wat Moderne vyfkamp aandui
Duitse posseël wat die items van die moderne vyfkamp uitbeeld
Moderne vyfkampers op die Spele van 2004, besig met die laaste item

Geskiedenis wysig

Die moderne vyfkamp is uitgedink deur die baron Pierre de Coubertin, die stigter van die moderne Olimpiese Spele.[1] Die naam kom van die Grieks penta- "vyf" en -athlon "wedstryd".[1] Die toevoeging van moderne tot die naam het dit onderskei van die oorspronklike vyfkamp van die antieke Olimpiese Spele, wat bestaan het uit 'n stadion wedloop, stoei, verspring, spiesgooi en skyfwerp. Namate die oorspronklike vyfkamp rondom die vaardighede van die perfekte soldaat van daardie tyd ontstaan het, het Coubertin die wedstryd geskep om die ervarings van 'n 19de eeuse berede soldaat aan die vyandige kant te simuleer: hy moet op 'n onbekende perd ry, met 'n pistool en swaard veg, swem en hardloop.[1]

Die moderne vyfkamp is die eerste keer tydens die 1912 Olimpiese Spele gehou en is deur die Sweedse atleet, Gösta Lilliehöök gewen. Die moderne vyfkamp is sedert 1912 by elke Olimpiese Spele aangebied. 'n Afdeling vir spanne is by die 1952 Olimpiese Spele aanvaar, maar is laat vaar by die 1992 Olimpiese Spele. 'n Afdeling vir vroue is by die 2000 Olimpiese Spele aanvaar.[1] In nie-Olimpiese jare word jaarliks, sedert 1949, 'n Wêreldkampioenskap-byeenkoms gehou.

Die kompetisie het oorspronklik oor vier tot vyf dae gestrek maar met die 1996 Olimpiese Spele is 'n een-dag formaat aanvaar in 'n poging om die sport meer toeganklik vir gehore te maak.[1] Ten spyte van die wedstryd se sterk verbintenis met die moderne Olimpiese Spele (die feit dat dit die enigste sportsoort is wat uitsluitlik vir die Olimpiese Spele ontwikkel is), het die gebrek aan belangstelling buite Oos-Europa gelei tot vrae oor die voortbestaan van die sportsoort by die Olimpiese Spele. Die IOK het egter op 8 Julie 2005 gestem om die sportsoort in die Olimpiese program te hou tot ten minste die 2012 Olimpiese Spele.

Formaat wysig

Buiten die skermkompetisie neem atlete nie direk teenoor mekaar deel in een van die vier ander items nie. 'n Beter algehele vertoning gee uiteindelik 'n hoër puntetelling; punte vir elke item word saamgevoeg om die totale punte te bereken. Dit is soortgelyk aan die prosedure vir die berekening van punte vir die tienkamp in atletiek. 'n Nuwe element is egter bekend gestel om die eindstryd meer opwindend te maak. Die laaste item is die veldloop. Deelnemers word ingedeel volgens die telling van die vorige vier items en kry verskillende wegspringtye, met die voorloper (volgens die punte) wat eerste wegspring en die ander wat verspreid volgens hulle puntestand wegspring. Die gevolg is dat die eerste persoon oor die wenstreep ook die algehele wenner van die vyfkamp is.

In November 2008 het die UIPM gestem dat die formaat aan die begin van 2009 verander gaan word. Die hardloop en skiet-items word in tandem (m.a.w. opeenvolgend) beslis. Atlete sal drie skietbeurte hê na vyf teikens, gevolg deur 'n 1000 m wedren. Dit is soortgelyk aan die tweekamp by die Olimpiese Winterspele wat 'n heg-en-steg-ski-wedloop met pistoolskiet kombineer. Die verskil is egter dat die skiërs hulle gewere saamdra maar die vyfkampatlete nie. Hierdie verandering het kritiek ontlok van persone wat meen dat die verandering die nodige vaardighede vir die sport radikaal verander. Die New York Times het selfs voorgestel dat dit verander moet word na "vierkamp" omdat twee van die vyf items in 'n enkele item saamgevat is.[1]

Die skiet-item behels die gebruik van 'n 4,5 mm luggeweer (windbuks) in 'n staande posisie op 'n afstand van 10 m na 'n stilstaande teiken. Tot en met die reëlverandering in 2008 was dit in die formaat van 'n 10 m luggeweer-kompetisie: elke deelnemer het 20 skote gehad waarvoor 40 sekondes per skoot toegelaat is. In die nuwe formaat moet, in elke drie skietrondes, elke deelnemer na vyf teikens skiet en die geweer na elke skoot herlaai; daarna mag hulle verder hardloop. 'n Skoot wat die teiken mis word nie gepenaliseer nie, maar indien die totale tyd (70 sekondes) oorskry word, kan 'n penalisasie volg.[1]

Die skerm-item maak gebruik van die skermdegen. Die kompetisie is 'n rondomtalie-toernooi, wat beteken dat elke deelnemer teen elk van die ander deelnemers te staan kom. Elke wedstryd duur een minuut; die eerste skermer om 'n "raak" aan te teken, wen outomaties. Indien geen speler binne die toegelate minuut die ander "raak" nie, verloor beide die wedstryd.

Die swem-item is 'n 200 m vryslag swem wedren. Tot die 2000 Olimpiese Spele was die afstand 300 m.[2] Deelnemers word d.m.v. uitdunne gekeur na aanleiding van hul vinnigste tye oor die afstand.

Die perdry-item behels 'n vertoonspring (show jump) item oor 'n 350–450 m baan met 12 tot 15 versperrings. Deelnemers se perde word in 'n trekking 20 minute voor die begin van die item aan hulle toegewys.

Die hardloop-item behels 'n 3 km landloop wedren. Tot die 2000 Olimpiese Spele was die afstand 4 km.[2] Die onderbreking van die pistoolskiet het wel die formaat van die wedren verander, maar nie die beginsel dat die algehele wenner die eerste is om oor die wenstreep te trap nie.[1]

Wêreldkampioene wysig

Mans wysig

Jaar Atleet Nasionaliteit
2008 Ilia Frolov   Rusland
2007 Viktor Horvath   Hongarye
2006 Edvinas Krungolcas   Litaue
2004 Andrejus Zadneprovskis   Litaue
2003 Eric Walther   Duitsland
2002 Michal Sedlecký   Tsjeggiese Republiek
2001 Gábor Balogh   Hongarye
2000 Andrejus Zadneprovskis   Litaue
1999 Gábor Balogh   Hongarye
1998 Sebastien Deleigne   Frankryk
1997 Sebastien Deleigne   Frankryk
1995 Dmitri Svatkovski   Rusland
1994 Dmitri Svatkovski   Rusland
1993 Richard Phelps   Verenigde Koninkryk
1991 Arkadiusz Skrzypaszek   Pole
1990 Gianluca Tiberti   Italië
1989 László Fabian   Hongarye
1987 Joël Bouzou   Frankryk
1986 Carlo Massullo   Italië
1985 Attila Mizser   Hongarye
1983 Anatoli Starostin   Sowjetunie
1982 Daniele Masala   Italië
1981 Janusz Pyciak-Peciak   Pole
1979 Robert Nieman   VSA
1978 Pavel Lednev   Sowjetunie
1977 Janusz Pyciak-Peciak   Pole
1975 Pavel Lednev   Sowjetunie
1974 Pavel Lednev   Sowjetunie
1973 Pavel Lednev   Sowjetunie
1971 Boris Onishchenko   Sowjetunie
1970 Péter Kelemen   Hongarye
1969 András Balczo   Hongarye
1967 András Balczo   Hongarye
1966 András Balczo   Hongarye
1965 András Balczo   Hongarye
1963 András Balczo   Hongarye
1962 Eduard Sdobnikov   Sowjetunie
1961 Igor Novikov   Sowjetunie
1959 Igor Novikov   Sowjetunie
1958 Igor Novikov   Sowjetunie
1957 Igor Novikov   Sowjetunie
1955 Konstantion Salnikov   Sowjetunie
1954 Björn Thofelt   Swede
1953 Gábor Benedek   Hongarye
1951 Lars Hall   Swede
1950 Lars Hall   Swede
1949 Tage Bjurefelt   Swede

Vroue wysig

Jaar Atleet Nasionaliteit
2008 Amélie Cazé   Frankryk
2007 Amélie Cazé   Frankryk
2006 Marta Dziadura   Pole
2005 Claudia Corsini   Italië
2004 Zsuzsanna Vörös   Hongarye
2003 Zsuzsanna Vörös   Hongarye
2002 Bea Simoka   Hongarye
2001 Stephanie Cook   Verenigde Koninkryk
2000 Pernille Svarre   Denemarke
1999 Zsuzsanna Vörös   Hongarye
1998 Anna Sulima   Pole
1997 Jelisaweta Suworowa   Rusland
1996 Janna Dolgaschewa-Schubenok   Belo-Rusland
1995 Kerstin Danielsson   Swede
1994 Eva Fjellerup   Denemarke
1993 Eva Fjellerup   Denemarke
1992 Iwona Kowalewska   Pole
1991 Eva Fjellerup   Denemarke
1990 Eva Fjellerup   Denemarke
1989 Lori Norwood   VSA
1988 Dorota Idzi   Pole
1987 Irina Kisselyeva   Sowjetunie
1986 Irina Kisselyeva   Sowjetunie
1985 Barbara Kotowska   Pole
1984 Svetlana Jakovleva   Sowjetunie
1983 Lynn Chernobrywy   Kanada
1982 Wendy Norman   Verenigde Koninkryk
1981 Ann Ahlgren   Swede

Verwysings wysig

  1. 1,00 1,01 1,02 1,03 1,04 1,05 1,06 1,07 1,08 1,09 Branch, John (26 November 2008). "Modern Pentathlon Gets a Little Less Penta". New York Times. Besoek op 27 November 2008.
  2. 2,0 2,1 "Modern Pentathlon". 'Good Luck Beijing'. 10 Maart 2007. Geargiveer vanaf die oorspronklike op 6 Oktober 2008. Besoek op 27 November 2008.

Eksterne skakels wysig

Hierdie artikel is in sy geheel of gedeeltelik vanuit die Engelse Wikipedia vertaal.