Molibdeniet
| Molibdeniet | |
|---|---|
| |
| Formule | MoS2 |
| Nickel-Strunz (10) | 2.EA.30 |
| Kleur | swart, loodgrys |
| Hardheid | 1-1,5 (Mohs) |
| Digtheid | 4,62 – 4,73 [g/cm3][1] |
| Kristalsisteem | heksagonaal |
| Ruimtegroep | P6₃/mmc |
| Strukturbericht-kode | C7 |
| Eenheidsel | a=315,0 pm c=1230,0 pm |
| |
| * Lys van minerale | |
Portaal  Geologie
| |
Molibdeniet is 'n mineraal met formule MoS2. Hierdie mineraal is die belangrikste bron van die element molibdeen en lewer ook renium.
Die mineraal word as twee politipes aangetref: 2H-Molibdeniet (volop) en 3R-Molibdeniet (seldsaam).
Struktuur
wysigMolibdeniet het 'n gelaagde struktuur. Die 2H-politipe is heksagonaal en dit is die argetipe van die strukturbericht-klassifikasie se C7-struktuur.
Die struktuur bestaan uit S-Mo-S toebroodjielae met 'n heksagonale digpakking wat weergegee kan word as:
- ...S-Mo-S--S-Mo-S: ...A-B-A--B-A-B..
Die molibdeenatome word deur 'n trigonaal prisma van swawel atome omring. Die swawelatome het net aan een kant molibdeenatome as bure. Aan die ander kant is 'n vanderwaalsgaping na die volgende toebroodjie se swawellaag. Dit maak die materiaal 'n goeie vastestof-smeermiddel soos grafiet. 3R-molibdeniet is romboëdries met 'n eenheidsel: a = 3.16 Å, c = 18.33 Å. en ruimtegroep R3m.
Vondsplekke
wysigMolibdeniet word veral in hoëtemperatuur-hidrotermale are aangetref. Dit word in verspreide afsettings van die porfier-tipe gevind, met sowel as sonder geassosieerde groot mineraliserings van koper. In meteoriete word dit selde aangetref, maar dit kan ook in metamorfe kontakneerslae in kalksteen met kalsiumsilikaatminerale sowel as in pegmatiete, graniete en apliete gevind word. Dit kom dikwels met chalkopiriet en ander koperminerale voor.
Molibdeniet, die volopste molibdeenmineraal, het 'n wydverspreide voorkoms. In die VSA word fune kristalle in die Crown Point-myn, Chelan Lake, Chelan Co., Washington; en by die Frankford-steengroef, Philadelphia, Pennsilvanië gevind. Kanada, Marokko, Rusland, Duitsland en Japanhet ook vondsplekke.[2] In Suid-Afrika word dit byvoorbeeld in die Vergenoeg-myn van Tshwane, die Vioolsdrif-gebied van die Noord-Kaap, en by Houtenbeck in Limpopo gevind.
Verwysings
wysig- ↑ "mindat 2746" (in Engels). Geargiveer vanaf die oorspronklike op 10 April 2020.
- ↑ Handbook of Mineralogy.
Eksterne skakels
wysig
Wikiwoordeboek het 'n inskrywing vir molibdeniet.
