Mont Royal
Die berg Mont Royal (Engels: Mount Royal, letterlik "Koninklike Berg") is die bekendste baken van Montreal met 'n hoogte van 233 meter en ook die stad se naamgewer. Dit is die hoogste punt in Montreal wat net noord van die middestad verrys en die stadshorison oorheers.
| Mont Royal | |
|---|---|
 Die oostelike helling van Mont Royal | |
| Ligging | Montreal, Quebec (Kanada) |
| Hoogte | 233 meter bo seevlak |
| Reeks | Montérégie-heuwels |
| Koördinate | 45°30′23.0″N 73°35′20.0″W / 45.506389°N 73.588889°W |
| Bergtipe | Uitloper van vulkaniese kompleks |
| Eerste bestyging | 1535 |
| Eerste bestyger(s) | Jacques Cartier |
.jpg)
Mont Royal maak deel uit van 'n reeks van nege sogenaamde Montérégie-heuwels (Frans: Collines montérégiennes) wat in die suidooste van Quebec, tussen die Laurentynse Berge en die Appalagge-berge, geleë is en vanuit Montreal oor 'n afstand van sowat negentig kilometer tot in die geweste Montérégie en Estrie strek. Die heuwelreeks se naam is afgelei van die Latynse Mons Regius.
Mont Royal is die hoogste punt van Montreal-eiland (Île de Montréal) en behels altesaam drie pieke: Die Colline de la Croix (die eintlike Mont Royal, 233 meter), die Colline d'Outremont (of Mont Murray, 211 meter) en die Colline de Westmount (201 meter). Mont Royal is geen uitgedoofde vulkaan nie, maar is nogtans deur magma gevorm. Volgens 'n stedelike verordening uit die 1970's is die hoogte van nuwe geboue in Montreal tot maksimaal 233 meter beperk.