NG gemeente De Hoop

Die NG gemeente De Hoop was 'n gemeente van die Nederduitse Gereformeerde Kerk met sy middelpunt op die landbougemeenskap De Hoop, sowat 14 km wes van Oudtshoorn. Omdat die gemeenskap mettertyd gekwyn het en daarmee saam die gemeente, is dit later by die gemeente Oudtshoorn-Park ingelyf.

De Hoop se NG kerkgebou in 2013.

Ds. Frederik Johannes Potgieter de Kock, van 1916 tot 1926 De Hoop se tweede leraar. Hy het in 1931 afgetree en is op 6 Januarie 1946 oorlede.

De Hoop se kerkgebou, soos dit vandag nog daar uitsien, afgeneem vir Ons Kerk Album omstreeks 1917.

Ds. George Murray, De Hoop se eerste leraar en jongste seun van ds, Andrew Murray sr., stamvader van die Murrays in Suid-Afrika van wie vyf seuns predikant geword het.

Ds. Johannes Christiaan Lamprecht, van 1927 tot 1933 De Hoop se derde leraar. Hy is oorlede op 14 Mei 1945, terwyl hy leraar was van die NG gemeente Vandermerwe op Bonnievale.

Ds. en mev. H.L. Pepler. Hy was van 1933 tot 1945 De Hoop se vierde leraar. Daarna was hy tot 1954 leraar van die NG gemeente Adelaide in die Oos-Kaap. Ná vier jaar as medeleraar van die NG gemeente Mosselbaai, het hy van 1958 tot sy aftrede in 1978 as die eerste leraar van die dogtergemeente Mosselbaai-Suid gedien.

Ds. A.Z.A. van Jaarsveld en sy gesin. Hy was van 1946 tot 1952 De Hoop se vyfde leraar. Dié foto is geneem tydens sy dienstyd as leraar van die NG gemeente Prieska van 1952 tot 1963.

Agtergrond

'n Sterk gemeenskap het van omstreeks 1850 af opgebloei in die omgewing rondom Oudtshoorn, waar die moedergemeente eers op 11 Oktober 1853 as die 53ste gemeente in die NG Kerk gestig is. In 1908 het die kerkraad van die moedergemeente besluit om op ’n plaas sowat 15 km wes van die dorp erwe te verkoop en ’n kerk te bou (van dié erwe het blykbaar teen 2013, toe die Park-gemeente die kerkgebou in die mark gesit het, steeds aan die kerk behoort). Op 5 Mei 1909 is daar op die nuwe aanleg, wat die naam De Hoop gekry het, deur ds. George Murray van Oudtshoorn die hoeksteen van ’n kerkgebou gelê. Die argitek was Watson Hall (1876–1941). Intussen is ook ’n ruim pastorie gebou waarin ds. Murray, as die vader van 16, as medeleraar van Oudtshoorn sy intrek geneem het.

Kerkgebou

Die sierlike klipsteenkerkgebou met sitplek vir 700 kerkgangers, toring en uurwerk het slegs £4 810 gekos en is op 30 April 1910 ingewy. In dieselfde jaar is die stigting van ’n selfstandige gemeente deur die Ring van George goedgekeur en op 5 April 1911 voer die Ringskommissie die besluit deur. Die jong gemeente ontvang van Oudtshoorn, sonder skuld, die pastorie en kerk, asook die predikant, want op 17 Junie 1911 is die godsalige ds. Murray (toe reeds 66 jaar oud) hier bevestig deur sy gryse broer, dr. Andrew Murray, wat weens sy hoë ouderdom (83 jaar) ingelei moes word.

Ds. George Murray

De Hoop was gelukkig om die waardige ds. George Murray, met sy rype ervaring en diepe godsvrug, as eerste leraar in sy deurslaggewende beginjare te kon hê. Veral in die donker dae van die Eerste Wêreldoorlog en die gevolglike rampspoedige ineenstorting van die volstruisveerprys, was hy en sy minsame gade ’n ware vader en moeder vir die beproefde gemeente. In dié rustige, landelike omgewing het daar uit sy pen verskeie belangwekkende werke gevloei, onder meer die insigryke Oom Willem Smit en Een Beker Zonder Oor. In 1916 het ds. Murray afgetree en op 18 Mei 1921 is hy in die ouderdom van 75 jaar oorlede.

Ná ds. Murray is die herderstaf agtereenvolgens gedra deur di. F.J. de Kock (1916-’21), J.C. Lamprecht (1927-’33), H.L. Pepler (1933-’45) en A.Z.A. van Jaarsveld (1946–?).

Groei en vooruitgang

Die gemeente is telkens gestrem deur water en watersnood: die teisterende droogte van 1927 en die dekade ná 1940 asook die oorstromings van 1916 en 1932 het diep spore nagelaat. Te midde van persoonlike skommelinge was daar egter, veral in die beginjare, bestendige ontwikkeling en finansieel is die hoogtepunt in 1948 bereik. Verbeteringe is gaandeweg aangebring: die kerksaal is in 1914 al opgerig, net soos die kerk en die pastorie van die pragtige plaaslike klipgebou; elektriese ligte vir die kerk, saal en pastorie is in 1939 aangebring en die nuwe orrel is op 5 Desember 1948 ingewy. In die middel van die dekade ná 1950 is die kerksaal vergroot.

Jare nadat die gemeente ingelyf is by Oudtshoorn-Park, is die kerkgebou in 2013 in die mark geplaas vir R1 995 000.

Enkele leraars

• George Murray, 1911–1916 (emeriteer; oorlede op 18 Mei 1921)
• Frederik Johannes Potgieter de Kock, 1916–1926
• Johannes Christiaan Lamprecht, 1927–1933
• Hendrik Lodewyk Pepler, 1933–1945 (waarna NG gemeente Adelaide)
• Adriaan Zacharias Albertus van Jaarsveld, 1946–1952
• George Muller Theunissen, 1952–1961

Bronne

• Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Eksterne skakels

• Oudtshoorn-De Hoop se kerkgebou te koop op Bid or Buy. Geargiveer 4 Maart 2016 op Wayback Machine URL besoek op 16 Augustus 2013.
• Nuwe hoop vir De Hoop, Oudtshoorn Courant, 27 Mei 2014. URL besoek op 29 Mei 2014.