NG gemeente Dwaalboom

Die NG gemeente Dwaalboom is ’n gemeente van die Nederduitse Gereformeerde Kerk in die suidwestelike uithoek van die provinsie Limpopo, naby die grens met Noordwes en Botswana.

Ds. J.P. Potgieter is op 8 Mei 1949 as Dwaalboom se eerste leraar bevestig.

Stigting

Wat vandag die gemeente Dwaalboom is, was tot in 1941 die bosveldwyke van Zwartruggens. In 1941 het die bosveldwyke van Zwartruggens met Dwaalboom as middelpunt en die bosveldwyke van Rustenburg met Northam as middelpunt egter saam 'n gemeente gestig, nl. Rustenburg-Noord. In 1948 het die kerkraadslede van die Dwaalboom-wyke aansoek gedoen om afstigting en op Saterdag, 23 Oktober 1948 is die gemeente Dwaalboom deur die Ringskommissie van die Ring van Krokodilrivier gestig.

Dwaalboom en Northam (Rustenburg-Noord) was nou oor en weer konsulent. Op 8 Mei 1949 is die gemeente se eerste leraar in die persoon van ds. J.P. Potgieter hier bevestig. Twee rondawels met 'n kombuisie en badkamer moes aanvanklik as 'n tydelike pastorie dien. In September 1950 is daar egter 'n begin met die bou van 'n sierlike pastorie gemaak, deur die alombekende boukontrakteur F.P. van Heerden van Germiston.

Die gemeente bestaan hoofsaaklik uit bees, en tabakboere. Al skei groot afstande die lidmate van mekaar, bring Nagmaalsgeleenthede tog almal van ver en byeen.

in 1951 berig Ons gemeentelike feesalbum: “Dwaalboom is 'n jong gemeente met groot moontlikhede, nie net op tydelike gebied nie, maar veral op geestelike gebied. Die verderwende invloed van die stad wat soveel menseharte kil en koud gemaak het, het nog nie sy invloed hier versprei nie. Omdat byna al ons lidmate boere is wat uit die bodem moet lewe, dwing die natuur hulle om neer te buig voor die Skepper van hemel en aarde.”

Enkele leraars

• J.P. Potgieter, 1949 – ?, eerste leraar
• Lambertus Merthinus Cilliers, 1959 – 1962
• P.A. de Wet

Sien ook

• Gereformeerde kerk Drieviersboom

Bronne

• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Eksterne skakels

• Die kerkgebou, soos te sien op Google Maps. URL besoek op 11 September 2015.