NG gemeente Oudtshoorn-Wes

Die NG gemeente Oudtshoorn-Wes is 'n gemeente van die Nederduitse Gereformeerde Kerk in die Ring van Oudtshoorn en in die Sinode van Wes-Kaapland gesetel op die hoofdorp van die Klein-Karoo, Oudtshoorn.

Die kerkgebou omstreeks 1970

Ds. Siebie Sieberhagen was die gemeente se tweede leraar.

Stigting en eerste leraars

Op 10 Desember 1948 is dié gemeente van Oudtshoorn afgestig as die eerste dogtergemeente op die dorp. In 1951 het Oudtshoorn-Noord aan die beurt gekom en in 1954 Oudtshoorn-Suid, gevolg deur nog drie tussen 1966 en 1982. As eerste leraar het ds. A.P. Treurnicht opgetree. Hy het later naam gemaak as koerantredakteur van Die Kerkbode en Hoofstad en as leier van die Konserwatiewe Party. Hy is op 19 Maart 1949 bevestig. Ná 'n kort maar vrugbare dienstyd het hy op 4 Junie 1950 van die gemeente afskeid geneem. Op 20 Augustus 1950 is ds. J.J. Sieberhagen as leraar bevestig.

Kerkbou

Die plek waar die eredienste gehou moes word, was 'n primitiewe saaltjie, heeltemal te klein om die gemeente te huisves. Die meeste van die seuns van die verskillende opvoedingsinrigtings moes aanvanklik vir die eredienste na die moedergemeente gaan. Die kerkraad het dadelik aandag aan die probleem van groter ruimte gegee. Daar is besluit om 'n kerkgebou met 650 sitplekke op te rig. Op 4 Desember 1950 is die eerste sooie vir die fondament omgekeer. Op 3 Maart 1951 is die hoeksteen gelê. Dit was destyds 'n jong, lewenskragtige gemeente met sowat 750 lidmate en 'n sieletal van 1425. In 1985 het was die belydende lidmate 760 en die dooplidmate 385 en in 2020 onderskeidelik 804 en 128.

Predikante

• Andries Petrus Treurnicht, 1949 - 1950
• Jacobus Johannes Sieberhagen, 1950 - 1957
• Barend Petrus lacobus De Kierk, 1959 - 1960
• Sarel Albertus Struwig, 1960 -
• David Frederik van der Merwe, 1961 -
• Jacobs Maartins Blignaut, 1962 -  (veldpred)
• Gideon Daniël Jacobus Potgieter, 1972 - 1975
• Alexander Johannes Luttig, 1975 - 1977
• Petrus Johannes Uys, 1991 - 1998
• Andre Ryk Orffer, 1996 -
• Jan Gabriel Marais, 1998 -

Bron

• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.