NG gemeente Tweeling

Die NG gemeente Tweeling is ’n gemeente van die Nederduitse Gereformeerde Kerk op die dorp Tweeling in die provinsie en Sinode van die Vrystaat. Met ingang 2018 het die gemeente sowat 90 lidmate en 15 dooplidmate gehad.

Die NG kerk Tweeling.

Ds. H.O. Pienaar is op 12 Maart 1949 hier ontvang.

Ds. S.C. Biggs, die leraar van 1958 tot 1963.

Grafsteen van die eerste leraar, ds. Meij, op die kerkterrein

Stigting

Volgens De Kerkbode van 30 Junie 1926 blyk dit “op 17 Junie 1926 word 'n gemeente gestig deur die Ringskommissie van die Ring van Harrismith te Tweeling". Die gemeente is hoofsaaklik afgestig van 'n groot deel van Frankfort en Reitz en 'n klein deeltjie van Vrede.

Tot ouderlinge is destyds benoem die brs. L.P.J. Taljaard en J.A. Theron en tot diakens die brs. P.G. Human, C.P. Cilliers, J. Kriel en H.J. Duminy. Die predikant van Reitz is benoem tot konsulent en die gemeente sou onder die Ring van Harrismith ressorteer.

Kerkbou

Op 12 Februarie 1927 is die hoeksteen van die kerk, wat as kerksaal gebruik is ná die inwyding van die gemeente se siersteenkerk, deur ds. J.P. van der Spuy, destyds predikant van Reitz en konsulent van die pas gestigte gemeente Tweeling, gelê. Ds. Van der Spuy, later ook moderator van die Vrystaatse Kerk, het besonder baie vir die gemeente opgeoffer voordat hy 'n eie predikant kon hê. Op 27 Mei 1927 is die kerksaal ingewy.

Eerste leraar

Oop 28 Mei 1927 is ds. M.J. Meij van Kokstad, waarvan hy ook die eerste leraar was, hier bevestig. Die bevestigingsrede is deur ds. J.P. van der Spuy uitgespreek en ds. Meij het sy intreerede uitgespreek na aanleiding van Hand. 10:20: “Ek vra dan om watter rede julle my laat haal het." Die jare 1927 tot 1937 was vir die jong gemeente jare van swaarkry. Sonder geld, behalwe 'n klein donasie van die gemeente Reitz, moes die gemeente opgebou word. Op 2 November 1942 is die pastoriemoeder die gemeente deur die dood ontval. Op 2 Oktober 1948 neem ds. Meij afskeid van die gemeente, aangesien hy ’n beroep na Cedarville aangeneem het.

Tweede leraar

Op 12 Maart 1949 is ds. Meij se opvolger, prop. H.O. Pienaar, hier bevestig. Die gemeente het in 1952 sy 25-jarige bestaan herdenk en by dié geleentheid 'n suksesvolle poging in verband met die stywing van sy kerkboufonds onder leiding van sy ywerige leraar aangewend. In daardie haar berig Ons gemeentelike feesalbum: "Vir hierdie groot saak ontbreek dit nie aan die nodige entoesiasme onder die gemeentelede nie en elkeen sien reikhalsend uit na die groot oomblik wanneer die deure van ons nuwe kerk vir die inwydingsplegtigheid oopgesluit sal word."

Enkele leraars

• Marthinus Johannes Meij, 28 Mei 1927 – 2 Oktober 1948
• Hugo Olivier Pienaar, 12 Maart 1949 – 1958
• Stanley Charles Biggs, 1958 – 1963
• Koos Lessing (aflosleraar) – 2018
• Willem Strauss, Augustus 2018 –

Bronne

• (af) Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.