NSU Ro 80
Die NSU Ro 80 was 'n tegnologies gevorderde groot sedan-tipe motor vervaardig deur die Duitse maatskappy NSU van 1967 tot 1977. Mees noemenswaardig was die enjin; 'n 115 bhp (86 kW), 995 cc dubbel-rotor Wankelenjin met voorwielaandrywing deur 'n koppellaarlose semi-outomatiese ratkas. Dit is in 1968 deur Europese motorjoernaliste gekies as Motor van die jaar.
Ongelukkig vir NSU, het die motor vroeg 'n reputasie vir onbetroubaarheid ontwikkel wat dit nooit kon afskud nie. Die Wankelenjin in besonder het onder meer gelei aan swaar slytasie van die rotorpuntseels, en sommige karre het 'n totaal herboude enjin benodig voor 30 000 myl (50 000 km). Gebrekkige begrip van die Wankelenjins deur motorhandelaars en motorwerktuigkundiges het nie gehelp om die saak te beredder nie. Teen die 1970 modeljaar, is meeste van die probleme opgelos, maar die skade aan die motor se reputasie en NSU se finansiële situasie was onherstelbaar. NSU is in 1969 deur Volkswagen aangeskaf.
Ander tegnologiese eienskappe van die Ro 80 bo en behalwe die kragbron was die vierwiel skyfremme, steeds 'n rariteit onder karre van die klas op daardie tydstip. Die voorste remme was binneboords gemonteer wat die ongeveerde gewig verminder het. Die vering was onafhanklik op al vier wiele, met MacPherson-stutte aan die voorkant en semi-volgarmvering aan die agterkant, beide met ruimtebesparende ontwerpe wat vandag algemeen gebruik word. Tandstang-en-kleinrat kragstuur is gebruik wat hedendaagse ontwerpe vooruitgeskou het.
Die ontwerp deur Claus Luthe, wat hoof van ontwerp by NSU en later BMW was, was op daardie stadium as baie modern beskou en slaag vandag nog; die Ro 80 was al deel van menige galleryuitslallings van moderne industriële ontwerp. Die groot glas oppervlak het die 1970's ontwerpe van Citroën vooruitgeskou. Die vorm was baie glibberig, met 'n sleurkoëffisiënt van 0.355 (byna ongeēwenaar vir die tydperk, alhoewel gemiddeld vir moderne motors).
Reeks produksie het in Oktober 1967 'n aanvang geneem: die laaste voorbeelde het van die produksielyn gerol in April 1977. Slegs 37 400 voertuie is tydens die tienjaar produksielopie vervaardig.