Nadia Comăneci
| Nadia Comăneci |
|---|
Nadia Comăneci is 'n Roemeense gimnas en wenner van vyf goue medaljes tydens die 1976 Olimpiese Spele. Sy was die eerste gimnas om ooit 'n perfekte 10 in 'n Olimpiese gimnastiekitem te kry. Sy het ook twee goue medaljes tydens die 1980 Olimpiese Spele gewen en is een van die bekendste gimnaste ter wêreld.
| |
| Doopnaam: | Nadia Elena Comăneci |
|---|---|
| Geboorte: | 12 November 1961; Oneşti, Roemenië |
Comăneci het reeds in haar kleuterskooljare vir die eerste keer met gimnastiek kennis gemaak, toe haar ouers haar by 'n gimnastiekklub, The Flame, laat aansluit het. Daar is sy opgelei deur onder andere Márta Károlyi, wat haar in 1969 laat aansluit het by Károlyi se nuwe gimnastiekskool. Nadia het in 1970 aan haar eerste nasionale kompetisie deelgeneem, as deel van die Oneşti-span. Alhoewel Nadia drie keer van die balk afgeval het, het die span steeds gewen. Ná hierdie kompetisie het Nadia begin om harder te oefen en in 1971 en 1972 het sy die nasionale junior gimnastiektitel gewen. In 1971 het sy ook haar eerste internasionale kompetisie in Joego-Slawië gewen.
Dit was egter eers in 1975, toe sy vier oorwinnings by die Europese Kampioenskap in Noorweë behaal het, dat sy internasionale aandag begin trek het. In Maart 1976 het sy haar eerste kompetisie in Amerika gewen. Dit was ook hier wat sy kennis gemaak het met Bart Conner, die wenner van die mansafdeling en haar toekomstige eggenoot. Later daardie jaar het Nadia, op 14-jarige ouderdom, die eerste 10 op die brug gewen, plus nog twee goue medaljes en een silwer medalje. Ook op die 1980 Olimpiese Spele het sy twee goue en twee silwer medaljes gewen.
In 1989 het Nadia van die toenmalige kommunistiese Roemenië na die VSA uitgewyk, waar sy getoer het en reklame vir gimastiekklere gemaak het. In hierdie tydperk het sy weer in kontak met Bart Conner gekom. Die paartjie het in 1994 verloof geraak en is in 1996 in Boekarest getroud; dit was die eerste keer dat Nadia sedert haar uitwyking die land weer besoek het. Die paartjie woon tans in Oklahoma Stad, Oklahoma en het 'n seun, Dylan Paul, wat in 2006 gebore is.
