Norman Eaton
Norman Musgrave Eaton (1902–1966) was 'n Suid-Afrikaanse argitek wat op 11 Oktober 1902 in Pretoria gebore is en veral bekend is vir die ontwerp van banke en huise. Hy sterf op 19 Julie 1966 in 'n motorongeluk in Pretoria.[1]
Norman Eaton | |
|---|---|
| Gebore | Norman Musgrave Eaton 11 Oktober 1902 |
| Sterf | 19 Julie 1966 |
| Nasionaliteit | Suid-Afrika |
| Beroep | Argitek |
| Bekend vir | Ontwerp van geboue |
Nadat hy in Pretoria en Kaapstad skoolgegaan het skryf hy in 1922 in vir 'n diplomakursus in argitektuur by die Universiteit van die Witwatersrand. Daar word hy raakgesien deur die argitek Gordon Leith wat hom in diens neem, van 1922 tot 1930, terwyl hy aandklasse bywoon om sy studies te voltooi. Leith plaas Eaton in 1926 aan die hoof van die Pretoriakantoor van sy praktyk. Eaton wen in 1929 die Baker studiebeurs wat hom in staat stel om 'n nege maande residensie by die Britse Skool in Rome te onderneem voor hy verskeie Europese lande in 1930 en 1931 besoek.[1]
Met sy terugkeer na Suid-Afrika in 1933 stig hy sy eie praktyk in Pretoria. Hy spits hom veral toe op huise wat uit ongeverfde bakstene gebou is en Afrika-elemente, soos aspekte van Groot-Zimbabwe insluit. Later sou ook Egiptiese kuns en argitektuur 'n rol speel in sy huisontwerpe. In sy huisontwerpe het hy gepoog om 'n streeksgevoel vas te vang deur die gebruik van bekende plaaslike materiaal en vorms, deur aanpassing soos tot die warm klimaat soos klein vensters, sonskerms en dakoorhange wat by die huise uitseek, die gebruik van tradisionele hout vensterhortjies en die lê van groot lappe grondkleurige steenplaveisel.[2]
In 1940 kry hy sy eerste groot opdrag vir 'n kommersiële gebou, die Landbank in Potchefstroom. In 1940 sluit hy 'n vennootskap met Alan Fair wat tot 1945 duur. In 1945 reis hy na Amerika, Argentinië en Brasilië en verskeie dele van suidelike en sentraal Afrika. Met sy terugkeer word hy uitgenooi om Reinethuis in Graaff-Reinet te restoureer.[1] Onder Eaton se bekendste werk is Huis Greenwood, die Bank der Nederlande in Kerkstraat, Pretoria, Polley's Arcade in Pretoria, die Kleinteater [3] in Pretoria en die Bank der Nederlande in Smitstraat, Durban. Hy het ook die Landbankgeboue in Potchefstroom, Pietermaritzburg en Kroonstad ontwerp.[1]
Erkenning en Pryse
wysigIn 1960 het die Suid-Afrikaanse Akademie vir Wetenskap en Kuns 'n goue medalje aan hom toegeken. By 'n gedenkdiens in sy eer een en 'n half jaar na sy dood het verskeie kunstenaar en argitekte waaronder Alexis Preller sy lof betuig. In 1968 het die Instituut van Suid-Afrikaanse Argitekte hom postuum 'n Goue Medalje toegeken.[1]
Verwysings
wysig- ↑ 1,0 1,1 1,2 1,3 1,4 Artefacts Geargiveer 8 Januarie 2007 op Wayback Machine, EATON, Norman Musgrave Geargiveer 28 September 2007 op Wayback Machine, besoek op 25 Desember 2006
- ↑ Alan Lipman Global capitalism – regional architecture – A South African architecture: what is it, where is it? Geargiveer 4 November 2004 op Wayback Machine, besoek op 25 Desember 2006
- ↑ UNISA, little theatre, besoek op 25 Desember 2006