Piet Cloete
Dr. Petrus Cornelius (Piet) Cloete (14 Julie 1928 – 21 September 1991) was van 4 Februarie 1961 tot 30 Maart 1980 predikant in vier NG gemeentes en van 1 April daardie jaar tot hy sy emeritaat op 22 Junie 1988 ontvang het, predikant in sinodale diens met opdrag ampsbediening en evangelisasie in die NG Kerk in die OVS. Hy het die Vrystaatse Kerk sedert 1962 op 'n wye terrein gedien en staan onder andere bekend as die eerste predikant in die provinsie wat in 1967 met die kleingroepbespreking in wyksbyeenkomste begin het.
| Petrus Cornelius Cloete | |
| |
Dr. P.C. Cloete
| |
| Naam | Petrus Cornelius Cloete |
|---|---|
| Geboorte | 14 Julie 1928 Niekerkshoop, Kaapland |
| Sterfte | 21 September 1991 Bloemfontein, Suid-Afrika |
| Kerkverband | Nederduits Gereformeerd |
| Gemeente(s) | Vrede-Wes (April 1962 – April 1967) Hugenoot (April 1967 – Januarie 1977) Noordrand (Januarie 1977 – Maart 1980) ampsbediening en evangelisasie (1 April 1980 – 21 September 1991 |
| Jare aktief | 1961–1991 |
| Kweekskool | Kweekskool, Stellenbosch |
Herkoms en opleiding wysig
Cloete het op 'n plaas by Niekerkshoop grootgeword (waar hy ook gebore en gedoop is) en moes die Hoërskool Griekwastad in st. 8 verlaat ná sy pa se dood. Deur deeltydse studie, terwyl hy werksaam was by die Suid-Afrikaanse Spoorweë en Hawens en die departement van justisie, kon hy sy matriek in 1947 behaal. Sewe jaar later het hy voltyds op Stellenbosch gaan studeer. Nadat hy sy studie aan die Kweekskool voltooi het, is hy in 1960 gelegitimeer.
Gemeentebediening wysig
Sy eerste gemeente was Johannesburg-Oos, die sogenaamde Irenekerk, waar hy op 4 Februarie 1961 bevestig is, destyds nog in die ou kerk wat vroeg in die 1970's afgebreek is. Ná net meer ’n jaar is hy in April 1962 Vrystaat toe as predikant van die NG gemeente Vrede-Wes, en in April 1967 na Bloemfontein as leraar van die NG gemeente Hugenoot. In dié tyd het hy die grade M.A. en D.Phil. (1972) aan die Universiteit van die Vrystaat behaal. Sy D.Phil.-skripsie, met die titel, "Grondbeginsels van die normatiewe estetika", is onder leiding van prof. P de B Kock afgehandel.
Tien jaar later, in Januarie 1977, stig hy saam met die NG gemeente Noordrand af en word hul eerste predikant. Eindelik aanvaar hy op 1 April 1980 die amp as predikant in sinodale diens: ampsbediening en evangelisasie van die Vrystaatse NG Kerk. Intussen was hy ook vir 'n termyn aktuarius van die Vrystaatse Sinode.
Aftrede wysig
Weens swak gesondheid moes hy op 22 Junie 1988 sy emeritaat aanvaar, maar toe die sinodale kommissie besluit om sy pos tydelik te bevries, het hy ingestem om die werk deeltyds voort te sit tot die Vrystaatse Sinode weer in September 1991 sou vergader. Midde-in swak gesondheid en voortdurende mediese behandeling het hy die werk vlot laat verloop, aldus ds. J.F. le Roux in die NG Kerk se Jaarboek 1992.
Dr. Cloete het in 1973 ’n ernstige hartaanval oorleef. Hy is op 21 September 1991 in Bloemfontein oorlede ná 'n siekte toe hy ná die Vrystaatse Sinode van 1991 griep opgedoen en later in die week ook dubbele longontsteking gekry het, waaraan hy oorlede is. Sy begrafnis was uit die NG gemeente Bloemfontein-Noord (die Klipkerk) en ds. Thinus le Roux van die NG gemeente Andrew Murray Bloemfontein het die diens gelei.
Hy is op 25 Januarie 1957 te Calvinia getroud met me. M.C.J. (Matty) Visagie (gebore 1 Mei 1931). Die egpaar het 'n dogter, Minda (gebore 5 Augustus 1970).
Bronne wysig
- (af) Maree, W.L. 1985. Jaarboek 1985 van die Nederduitse Gereformeerde Kerke. Pretoria: Tydskriftemaatskappy van die Nederduitse Gereformeerde Kerk.
- Telefoniese gesprek met mev Matty Cloete op 4 Oktober 2017
- Sterftekennisgewing van dr PC Cloete