Pous Callixtus II
Callixtus II was die 162ste pous van die Rooms-Katolieke Kerk.
| Pous Callixtus II | |
|---|---|
| |
| Geboortenaam | Guido van Boergondië |
| Pontifikaat begin | 1 Februarie 1119 |
| Pontifikaat eindig | 13 Desember 1124 |
| Voorganger | Gelasius II |
| Opvolger | Honorius II |
| Gebore | ± 1060 Quingey, Frankryk |
| Sterf | 13 Desember 1124 Rome, Italië |
| Ander pouse genaamd Callixtus | |
| Geseënde Pous Callixtus II | |
|---|---|
| Gebore | ± 1060, Quingey, Frankryk |
| Sterfte | 13 Desember 1124, Rome, Italië |
| Vereer in | Rooms-Katolieke Kerk |
| Feesdag | 12 Desember |
Biografie
wysigPous Callixtus II is gebore as Guido van Boergondië (ook Guy de Vienne) ongeveer in 1060 in Quingey, Frankryk.[1] Hy was die seun van graaf Willem I van Boergondië en Stephania van Longwy-Metz. Sy broer Hugo word aartsbiskop van Besançon en sy ander broer is die heilige Octavianus. Sy suster Clementina trou met Robrecht I van Vlaandere en sy suster Gizela met Humbert II van Savoje. In 1088 word hy deur Pous Paschalis II aangestel as aartsbiskop van Vienne en pouslike gesant in Frankryk. Op 1 Februarie 1119 volg hy Pous Gelasius II op en regeer tot sy dood op 13 Desember 1124. Hy word opgevolg deur Pous Honorius II. Die naam ‘Callixtus’ beteken 'die mooiste'.
Pontifikaat
wysigPous Callixtus se bewind het moeilik begin. Keiser Hendrik V het alreeds tydens Pous Gelasius II se bewind, Teenpous Gregorius VIII in Rome geïnstalleer. Op 30 Oktober 1119 word Hendrik en Gregorius geëkskommunikeer en in 1120 kan Callixtus Rome binne trek en Gregorius na 'n klooster verban. Een jaar later eindig die investituurstryd met die Konkordaat van Worms (23 September 1122) waar die pous die geestelike reg kry om kerklui aan te stel, maar die keiser sy regte behou by wêreldlike aanstellings.
Die pous bevorder die bedevaart na Santiago de Compostella waar Raymond, nog 'n broer van Callixtus koning was. Santiago de Compostella word 'n aartsbisdom en 'n "heilige stad" gelykstaande aan Rome en Jerusalem.
Callixtus hou die eerste Konsilie van Laterane op 18 Maart 1123 en bestry simonie en die konkubinaat van die geestelikheid. In 1120 verklaar hy die Walliese biskop Dawid van Menevia heilig en in 1123 Sint Koenraad van Constance.
Die pous se houding teenoor Jode was baie positief.[2] Hy verbied die bekering onder dwang omdat "..van die gedwonge aanvaarding van die Christendom, kan geen volharding verwag word nie ..". Hy verbied ook die Jodevervolging, laat Jode toe om vrylik hulle godsdiens te beoefen en verbied die ontering van Joodse begraafplase. Sy beleid word deur volgende pouse gevolg en word genoem in die bul "Sicut Judæs" van Pous Innocentius II en briewe van Pous Eugenius IV.
'n Paar geskrifte van Pous Callixtus II het bewaar gebly. Onder hulle is:
- De Miraculis Sancti Jacobi Apostoli (Oor die wonders van die heilige apostel Jacobus).
- De obitu et Vita Sanctorum (Oor dood en die heilige lewe)
- Vita Caroli Magni Imperatoris (Die lewe van keiser Karel die Grote).
Verering
wysigPous Callixtus III word as salige vereer in die Rooms-Katolieke Kerk. Sy feesdag is 12 Desember.
Bibliografie
wysig- Duff, Eamon (2001). Saints and Sinners: A History of the Popes, Yale University Press. ISBN 0-300-09165-6.
- Georg Gresser: Die Synoden und Konzilien in der Zeit des Reformpapsttums in Deutschland und Italien von Leo IX. bis Calixt II. 1049–1123. Paderborn 2006.
- Maxwell-Stuart, P. G. (2002). Chronicle of the Popes: The Reign-by-Reign Record of the Papacy from St. Peter to the Present, Thames & Hudson. ISBN 0-500-01798-0.
- Schilling, Beate: Guido von Vienne – Papst Calixt II. Hannover 1998. ISBN 3-7752-5445-5. - (Monumenta Germaniae Historica : Schriften ; 45).
Verwysings
wysig- ↑ "Calixtus II." Encyclopædia Britannica. 2008. Encyclopædia Britannica Online. 13 Julie. 2008 <http://www.britannica.com/EBchecked/topic/89771/Calixtus-II>
- ↑ http://www.jewishencyclopedia.com/view.jsp?artid=53&letter=C&search=Pope%20Callixtus%20II Jewish Encyclopedia
Eksterne skakels
wysig| Wikimedia Commons bevat media in verband met Callistus II. |
- CE Inskrywing in die Catholic Encyclopedia (Engels)
- CF Inskrywing in die Catholic Forum (Engels)
- BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
- PTA Inskrywing in "Popes through the Ages" deur J. Brusher S.J. (Engels)
- GM Inskrywing in die Genealogie van die Middeleeue (Duits)
Nota
wysigSaamgestel en vertaal uit die Nederlandse, Engelse, Duitse en Franse wikipedia en aangevul uit ander bronne soos aangedui.
Opvolging
wysig| Voorafgegaan deur Gelasius II |
Pous (Pontifex Maximus) 1119 – 1124 |
Opgevolg deur Honorius II |