Prins Andreas van Griekeland en Denemarke

Prins Andreas van Griekeland en Denemarke, dikwels ook prins Andrew genoem (Grieks: Ανδρέας; 2 Februarie 1882 - 3 Desember 1944), van die Huis van Sleeswyk-Holstein-Sonderburg-Glücksburg was die sewende kind en vierde oudste seun van koning George I van Griekeland en sy vrou, Olga Konstantinowna van Rusland. Hy was ’n kleinseun van Christiaan IX van Denemarke en die pa van prins Philip, Hertog van Edinburg.

Prins Andreas
Prins van Griekeland en Denemarke
Portret deur Philip de László, 1913.
Portret deur Philip de László, 1913.
Huis Glücksburg
Vrou Prinses Alice van Battenberg
Kinders Margarita
Theodora
Cecilie
Sophie
Prins Philip, Hertog van Edinburg
Vader George I van Griekeland
Moeder Olga Konstantinowna van Rusland
Gebore (1882-02-02)2 Februarie 1882,
Athene, Griekeland
Oorlede 3 Desember 1944 (op 62),
Monte Carlo, Monaco

Lewe wysig

 
Prins Andreas en sy vrou, prinses Alice.

Prins Andreas het vroeg met militêre opleiding begin en was ’n offisier in die Griekse weermag. Hy het onder meer in die Balkanoorloë diens gedoen.

Koning George I is in 1913 in ’n sluipmoordaanval dood en Andreas se oudste broer, Konstantyn, het hul pa opgevolg. Tydens die Eerste Wêreldoorlog was daar ontevredenheid oor Konstantyn se beleid van neutraliteit, en dit het daartoe gelei dat hy geabdikeer het. Die grootste deel van die koningsgesin, Andreas inkluis, is verban.

Toe hulle ’n paar jaar later terugkeer, het Andreas diens gedoen in die Grieks-Turkse Oorlog (1919-1922), maar sake het skeefgeloop vir Griekeland. Andreas is deels verantwoordelik gehou vir die verlies van Griekse grondgebied en hy is in 1922 ’n tweede keer verban omdat hy daaraan skuldig bevind is dat hy bevele van sy bevelvoerder verontagsaam het. Hy en sy gesin het na Parys, Frankryk, gevlug waar hulle aan die buitewyke van die stad gewoon het.

Teen 1930 was Andreas vervreem van sy vrou, prinses Alice van Battenberg, die dogter van prins Ludwig van Battenberg en prinses Victoria van Hesse-Darmstad. Hy het in Frankryk agtergebly en vir die res van sy lewe in die suide van die land gewoon, terwyl sy vrou en kinders na haar familie in Brittanje teruggekeer het.

Andreas se enigste seun, prins Philip, het in Engeland grootgeword onder toesig van sy ma se broers en het tydens die Tweede Wêreldoorlog in die Britse vloot diens gedoen. Hy is in 1947 getroud met prinses Elizabeth, later koningin Elizabeth II van die Verenigde Koninkryk. Al vier Andreas se dogters het met Duitsers getrou, van wie drie Nazi-bande gehad het.

Hy is in 1944 in Monte Carlo, Monaco, dood nadat hy sy vrou en seun in 1939 laas gesien het. Hy is eers in die Russies-Ortodokse Kerk in Nice begrawe, maar in 1946 is sy oorskot geskuif na die koninklike begraafplaas naby Athene.

Bronne wysig

  • Clogg, Richard (1979). A Short History of Modern Greece. Cambridge: Cambridge University Press. ISBN 0-521-22479-9
  • Heald, Tim (1991). The Duke: A Portrait of Prince Philip. Londen: Hodder and Stoughton. ISBN 0-340-54607-7
  • Van der Kiste, John (1994). Kings of the Hellenes. Stroud, Gloucestershire: Alan Sutton Publishing. ISBN 0-7509-0525-5
  • Vickers, Hugo. (2000). Alice, Princess Andrew of Greece. Londen: Hamish Hamilton. ISBN 0-241-13686-5

Verdere leesstof wysig

  • Prins Andreas van Griekeland (1930). Towards Disaster: The Greek Army in Asia Minor in 1921 Londen: John Murray.

Eksterne skakels wysig