Quebecstad-Windsor-korridor
Die Quebecstad-Windsor-korridor, wat oor 'n afstand van 1 150 kilometer strek, is die mees digbevolkte en hoogs geïndustrialiseerde gebied in Kanada. Met meer as 16 miljoen inwoners behels hierdie geografiese korridor die helfte van die Kanadese bevolking en drie van die vier grootste stede in die land. 'n Groot aantal aangrensende stedelike gebiede mag vanweë hulle sterk bande met die Quebecstad-Windsor-korridor by hierdie streek gereken word, waaronder Sherbrooke, Quebec; Buffalo, New York en Detroit, Michigan. Met hierdie gebiede het die korridor 'n totale bevolking van meer as 25 miljoen mense. Met sy groot belangrikheid vir die land se ekonomiese en politieke infrastruktuur, toon die korridor baie ooreenkomste met die gebied langs die Noordoos-korridor in die Verenigde State.
Die naam is afgelei van die stede aan weerskante van die korridor en is oorspronklik deur die spoorwegmaatskappy VIA Rail gewild gemaak, wat hier 'n groot aantal daaglikse passasierstreine laat loop. VIA Rail verwys na die gebied dikwels as "The Corridor". Net soos in die geval van die Amerikaanse Noordoos-korridor is die term uitgebrei om ook na die geografie en demografie van die gebied te verwys, waardeur die korridor loop.
Geografie
wysig
Die korridor strek van Quebecstad in die noordooste tot by Windsor, Ontario, net suid van die Amerikaanse stad Detroit, Michigan, in die suidweste en loop noord van die Sint-Laurensrivier, Ontariomeer en Eriemeer.
Die belangrikste stedelike gebiede langs die korridor is (in oos-westelike rigting) Quebecstad, Trois-Rivières, Drummondville, Montreal, Cornwall, Brockville, Kingston, Belleville, Oshawa, Toronto, Hamilton, Kitchener-Waterloo, London, Chatham en Windsor. Daarnaas maak ook Sherbrooke, Ottawa, Peterborough, Guelph, Brantford, St. Catharines, Niagara Falls, Fort Erie, Barrie en Sarnia deel uit van die korridor se vervoerstelsel van hoofpaaie en spoorweglyne.
Stede in die Amerikaanse deelstaat New York en in die suidooste van Michigan behoort nie regstreeks by die korridor nie, maar het beduidende kulturele, politieke en ekonomiese bande met die stedelike gebiede oorkant die grens (soos die Goue Hoefyster en Windsor). As hulle by die korridor gereken word, bereik die gebied 'n inwonertal van meer as sewe miljoen.