Rudolph Willemse

Rudolph Johannes Willemse (gebore 5 Julie 1958) is ’n Afrikaanse digter.

Lewe en werk

Willemse is op 5 Julie 1958 op Blyvooruitzicht naby Carletonville gebore. Sy skoolopleiding was aan die Laerskool Dagbreek op Carletonville, vanaf 1965 tot 1971, en vanaf 1972 aan die Hoërskool Carletonville, waar hy in 1976 in die eerste klas matrikuleer met onderskeidings in Afrikaans en Engels. Daarna studeer hy vanaf 1977 verder aan die Potchefstroomse Universiteit vir Christelike Hoër Onderwys, waar hy in 1980 die B.Juris-graad en in 1982 die LL.B.-graad verwerf. Hy behaal verskeie onderskeidings in individuele vakke, wat insluit Latyn, Privaatreg, Politieke Wetenskap en Regsvergelyking. Aan die einde van 1982 word hy as advokaat toegelaat.

Gedurende 1982 en 1983 ondergaan hy sy twee jaar verpligte militêre opleiding as regsbeampte by die Noord-Transvaalse Hoofkwartier van die Suid-Afrikaanse Leër. Hierna sluit hy in Januarie 1984 by die staatsdiens aan as staatsaanklaer, agtereenvolgens by die landdroshof in Newlands, die streekshof te Protea en die spesialis statutêre hof in Johannesburg. Vanaf November 1986 is hy staatsregsadviseur by die Departement van Justisie in Pretoria. Op deeltydse basis is hy in 1987 lektor in Kriminele reg en –prosesreg by die Technikon RSA.

Hy sluit by die privaatsektor aan in Augustus 1988, en begin met sy klerkskap as prokureur by die regsfirma E.F.K. Tucker. In Oktober 1990 word hy dan ook as prokureur tot die sybalie toegelaat. Intussen sit hy deeltyds sy regstudies aan die Universiteit van Suid-Afrika voort en in 1990 behaal hy sy LL.M.-graad met ’n dissertasie oor “The presumption that enactment does not bind the State and the ‘Rule of Law’: A jurisprudential perspective”. Hy maak opgang in sy firma en word in Oktober 1990 toegelaat as assosiaat, in Augustus 1991 as direkteur en word dan in 1994 aangewys as voorsitter. Hy studeer steeds deeltyds en behaal in 1992 ’n tweede LL.M.-graad aan die Universiteit van die Witwatersrand met ’n navorsingsverslag oor “The property clause in a Bill of Rights for South Africa”.

Verskeie van sy artikels verskyn in regstegniese tydskrifte. Hy spits hom veral toe op regshervorming, laekostebehuising, sosiale behuising en finansiering. In Augustus 2000 sluit hy as direkteur aan by die regsfirma Hofmeyr Herbstein & Gihwala. Aan die Randse Afrikaanse Universiteit behaal hy in Maart 2003 die Diploma in Praktiese Belasting. Dan sluit hy in Mei 2003 as regsadviseur en uitvoerende direkteur aan by Home Loan Guarantee Company waar hom daarop toespits om waarborge uit te reik om veral behuisingsfinansiering moontlik te maak aan laerinkomste mense en mense wat met vigs leef.

Terselfdertyd stig hy die beslote korporasie Regulatory Frameworks CC om navorsing oor regulering te doen. Hy wy hom aan strukturele verandering en wetskrywing en speel 'n belangrike rol in die regulering van onder andere mikrofinansiering, krediet, behuising, huurverhoudinge, gemeenskaplike eiendomsverenigings en korporatiewe banke. In 2005 word hy ook aangestel as spesiale deeltydse lektor aan die Sakeskool van die Universiteit van Pretoria en in 2006 as konsultant vir die regsfirma Kunene Ramaphala Botha. Sedert Julie 2008 is hy as Direkteur verbonde aan Old Mutual Finance, waar hy verantwoordelik is vir die regsaspekte en wetlike nakoming.

Hy is getroud met die kunstenaar Emma Willemse. Hulle woon in Riebeek-Kasteel waar hulle onder meer kuns en musiek bevorder onder die vaandel "Hoofstraat Conceptual".

Skryfwerk

Van sy gedigte verskyn in die letterkundige tydskrifte Ensovoort en Tydskrif vir Letterkunde. Hy debuteer in 1982 met “Kweekskool”, ’n bundel waarin die titel aanduiding is van die prosedure in baie gedigte om die letterlike betekenis van die samestelling van die woorde (bv. “kweek” – om te laat groei, en “skool” – plek van opvoeding) te laat inspeel teen die gebruiklike betekenis van die woord (“kweekskool” – plek waar teoloë opgelei word). Hy dink en voel onkonvensioneel en staan krities teenoor vele algemeen aanvaarde politiese, godsdienstige en literêre tradisies. Die gedigte het dus ’n sterk intellektuele inhoud, terwyl die ander belangrike eienskappe van goeie digkuns, soos klank, ritme en beelding, ietwat afgeskeep word.

Meer as twintig jaar later verskyn sy opvolgbundel, “middelman”, wat ’n groot vooruitgang op sy debuut verteenwoordig. Soos die titel aandui, is die oorheersende tema hier die man in die middel, wat beide kante toe moet kan kommunikeer, bemiddel en intree. Hierdie man is ook in die middel van ander dinge, soos van middeljarige leeftyd, in die middel van die maatskappy sonder illusies om die boonste sport te bereik, met ander woorde die gewone man, wat ten spyte van alles nie sy individualiteit prysgee nie. Teen hierdie agtergrond word in sewe afdelings gebeure in die voorafgaande dekades en die huidige behandel, waar aktuele gebeure afgewissel word met die alledaagse, dikwels begelei deur verwysings na popmusiektreffers wat aanduidend is van ’n veranderende wêreld. “middelman” word ook verwerk tot verhoogopvoering en in 2005 aangebied by die Klein Karoo Nasionale Kunstefees op Oudtshoorn. Sy gedigte word in verskeie versamelbundels opgeneem, insluitende “Groot verseboek”, “Die Afrikaanse poësie in ’n duisend en enkele gedigte”, “Goudaar”, “Digters en digkuns” en “S.A. in Poetry”. Die bundel “Lens 1978/79”, met gedigte van die studente, word onder sy redaksie saamgestel tydens sy studentejare op Potchefstroom. In 2017 word middelman weer opgevoer as deel van die "Solo Studios" naweek in Riebeek-Kasteel en stal hy ook fotografiese werk uit.

Rudolph Willemse se derde digbundel, swartland, het in Maart 2024 by Turksvy-uitgewers verskyn. Terselfdertyd is ‘n album gepubliseer met verse uit sy drie bundels, gelees deur die akteur en stemkunstenaar Marcel van Heerden, beskikbaar op Bandcamp en CD-ROM, met die titel Triptiek.

Die bundel swartland gaan oor ‘n geografiese ruimte maar is ook simbolies van die land en die wêreld, ook die digter se “kopruimte”. Tot ‘n groot mate werk die digter met die konsep van verandering in sy omgewing en wêreld, en hoe om sin daarvan te maak. In die proses word dit vergelyk met ‘n verlore paradys, met Picasso se nar wat in die agtergrond grynslag.

Joan Hambidge (Versindaba) verwys tereg na die bundel as ‘n bundel met  “verskillende toonaarde: sardonies, wrang, melancholies, ironies, snaaks … en met genoeg beduidende sterk verse vir die digkuns-liefhebber”.

Publikasies

Jaar	Publikasie
1982	Kweekskool
2005	middelman
2024	swartland

Bronne

Boeke

• Kannemeyer, J.C. “Die Afrikaanse literatuur 1652-2004” Human & Rousseau. Kaapstad en Pretoria. Eerste uitgawe. 2005

Ongepubliseerde Dokumente

• Willemse, Rudolph Johannes: Gedetaileerde CV

Resensies

Kweekskool

• Brink, André P. “Rapport” 12 Desember 1982
• Cloete, T.T. “Tydskrif vir Letterkunde” Jaargang 21 no. 2, Mei 1983
• Cloete, T.T. “Tydskrif vir Geesteswetenskappe” Jaargang 23 no. 4, Desember 1983
• Coetzee, Ampie “Standpunte” Nuwe reeks 170, April 1984
• S. “Tempo” 15 Oktober 1982

middelman

• Bezuidenhout, Zandra “Tydskrif vir Letterkunde” Jaargang 44 no. 2, Lente 2007
• Marais, Johann Lodewyk “Kakkerlak” Uitgawe 4, 2005
• Odendaal, Bernard Volksblad: http://152.111.11.6/argief/berigte/volksblad/2005/09/19/VB/6Bk/04.html^{[dooie skakel]}
• Viljoen, Hein “Beeld” 3 Oktober 2005: http://152.111.1.88/argief/berigte/beeld/2005/10/03/B1/11BOEK/03.html

swartland

• Hambidge, Joan Versindaba https://versindaba.co.za 12 Junie 2024