Sammy Claassen
|
Hierdie artikel bevat nie ’n bronnelys nie, wat beteken dat die inhoud nie geverifieer kan word nie. Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg. |
Sammy Claassen is in 1968 op Laaiplek gebore. Hy het skoolgegaan aan Noordhoek Primêr in Velddrif asook aan Weston Senior Sekondêre Skool te Vredenburg. Hy is getroud en het twee kinders, ’n seun en ’n dogter.
Sammy is ’n welbekende in die vakbondwese. Hy het ’n baie suksesvolle loopbaan gehad: eers as mynwerker, en daarna as voltydse skagbestuurder en opleier, as lid van die National Union of Mineworkers (NUM). Later, in 1996–2005, is hy as die Food and Allied Workers Union (FAWU) se Provinsiale Organiseerder en opleidingsbeampte aangestel.
In 2005 bedank hy uit FAWU om ’n voltydse loopbaan in die politiek te volg. Hy sluit by Patricia de Lille se Onafhanklike Demokrate (ID) aan. Hy word deel van die pioniers wat die plaaslike verkiesing van 2006 op sy rug keer deur die ANC en DA by die Wes-Kaapse stembus te verslaan. Die Onafhanklike Demokrate verras die land en ontsetel die ANC in die Wes-Kaap in 95% van die munisipaliteite. Hierdie merkwaardige uitslag het beteken dat Patricia de Lille se Onafhanklike Demokrate die magsbalans in die meeste Wes-Kaapse munisipaliteite gehou het en dus raadslede, burgemeesters, burgemeesterskomiteelede en speakers kon aanstel.
Claassen is in 2006 as onderburgemeester van die Bergrivier-munisipaliteit verkies. In 2007 word hy as burgemeester van die munisipaliteit verkies. In 2011 word hy aangewys as Leier van die Opposisie binne die Bergrivier-munisipaliteit asook as voorsitter van die Munisipale Openbare Rekeninge Komitee (MORK) in die Bergrivier-munisipaliteit. Bergrivier-munisipaliteit het Claassen vereer met lewenslange "Raadsheerskap", ’n eretitel vir onbaatsugtige gemeenskapsdiens. Sy loopbaan in Bergrivier-munisipaliteit het in 2006 begin en in 2018 geëindig toe hy bedank het uit die ANC.
Hy het ook as ’n raadslid gedien in die Weskus-distriksmunisipaliteit te Moorreesburg, waar hy waardevolle kennis en ervaring opgedoen het in die funksies en rol van ’n vlak-C-munisipaliteit.
Vanweë Claassen se leierseienskappe word hy in 2006 verkies tot die pos van Provinsiale Tesourier van die Onafhanklike Demokrate (ID) in die Wes-Kaap. Hierdie pos het hy beklee tot en met 2009, toe hy deur die ANC-minister en sekretaris-generaal Gwede Mantashe gewerf en verwelkom is as ’n lid van die ANC in die Wes-Kaap.
Kort hierna word Claassen verkies as ANC-leier vir die Velddriftak asook Bergriviersone. Hy word verder bevorder tot die ANC Weskusstreekbestuur, ’n posisie wat verseker het dat hy aangestel word as die eerste ANC-streekwoordvoerder in die Wes-Kaap. In 2018 bedank Sammy uit die ANC omdat hy koppe gestamp het met nasionale en provinsiale ANC-leiers oor die nasionale vraagstuk met betrekking tot bruinmense wat uitgesluit en benadeel word deur ANC-beleid in die staatsdiens en die breër samelewing. Hy het sterk standpunt ingeneem teen korrupsie, menseregteskendings en swak dienslewering.
Na sy bedanking uit die ANC stig hy twee welbekende organisasies. Hy stig die Khoisan Defiance Campaign (KDC) wat fokus op die sosiale, ekonomiese en politieke bemagtiging van bruinmense, die Khoi en die San. Hy is ook ’n stigterslid van die Westcoast Black Bussiness Alliance (BBA).
Hierdie twee organisasies is drukgroepe wat die klem lê op plaaslike bemagtiging en kwessies wat nie aangespreek word deur die regering of privaatsektor nie. Dit is ’n drukgroep wat die media as ’n kommunikasiemedium gebruik om politieke en ekonomiese druk toe te pas sodat positiewe beleidsveranderinge kan plaasvind in die streek en provinsie. Hierdie organisasies kry wye mediadekking op al hul media verklarings wat uitgereik word. Sammy Claassen dien ook as die nasionale woorvoerder van beide organisasies.
In 2020 kruis Sammy Claassen en Minister Patricia de Lille se paaie weereens nadat sy die Good-party gestig het. Sammy word lid van die Good-party en word aangestel as deel van die provinsiale en nasionale mediaspan van Good wat die "Waarheid"-koerant publiseer en landswyd gratis versprei.
Hy word deel van die Weskus leierskorps en verantwoordelik om lede, leiers en strukture te vestig in Saldanhabaai en Bergrivier-munisipaliteit asook die breër Weskus. Hy behaal sukses toe hy die DA-strukture omverwerp in 2020 deurdat hy ’n senior DA-raadslid Sucilla van Tura en haar hele Wyk 13 DA-bestuur vir GOOD verwerf en sodoende ’n tussenverkiesing afdwing in Vredenburg. Hierdie tussenverkiesing het GOOD op die kaart geplaas in Saldanhabaai en die platvorm en basis gevorm vir die DA se verliese by die stembus in 2021.
Hy stig die Khoisan Defiance Campaign, ’n voorspraak-drukgroep vir die regte van bruinmense wat afstammelinge van die Khoi en San is.
In 2021, ’n maand voor die plaaslike verkiesing, word Claassen deur Gayton Mckenzie, president van die Patriotic Alliance, genader. Gayton werf Claasen vir die Patriotic Alliance in die Wes-Kaap om die plaaslike verkiesing te lei. Hy word aangestel as die Ondervoorsitter van die Patriotic Alliance in die Wes-Kaap.
In hierdie verkiesing behaal die Die Patriotic Alliance groot sukses deurdat hulle in die 2021 munisipale verkiesing 82 munisipale setels in die land gewen het. Voor die munisipale verkiesing het die Patriotic Alliance slegs een raadslid gehad in die Wes-Kaap. Na die 2021 verkiesing groei die party van een raadslid tot 24 raadslede in die Wes-Kaap. Dit sluit in burgemeesters in Cederberg, Theewaterskloof, Beaufort-Wes en die Sentraal Karoo-distriksraad.
Claassen dien tans as Raadslid in die Saldanhabaai Plaaslike Munisipaliteit. Hy was ook onlangs vereer tot die lewenslange "Raadsheer" binne Saldanhabaai Munisipaliteit. Hy dien as lid van die Ekonomiese Ontwikkeling en Strategiese Dienstekomitee. Hy is ook aangewys as lid van die SALGA-Werksgroep (digitaal).
Claassen dien ook as ondervoorsitter van die Piketbergse Hof vir Klein-eise. Hy was ook voorsitter van die Laaiplek-Hawegebruikerskomitee. Hy is ’n bekende en gesoute politikus, gemeenskapsleier en menseregte-aktivis.