Sannie Steyn

Sannie Steyn ( - 1962) was ’n Afrikaanse skrywer van kontreiverhale, jeugverhale en godsdienstige werke.

Lewe en werk

Susanna Jacoba van den Heever is op 23 November gebore. Haar vader is C.F. van den Heever en haar moeder Louisa Elizabeth van den Heever (neé Engels). Gedurende die Anglo-Boereoorlog word haar vader gevange geneem en in ballingskap na Ceylon gestuur. Sy word groot op die plaas Langkuil in die distrik Lindley in die Oranje-Vrystaat en beskou die Riemland (daardie deel van die Noordoos-Vrystaat in die omgewing van Lindley, Reitz en Frankfort, die sogenaamde mieliegordel), as haar hartland. Haar skoolopleiding ontvang sy op Lindley, Bethlehem en Bloemfontein. Hierna word sy onderwyseres op Bethlehem voordat sy trou met Gideon Francois Steyn, wat oorspronklik van Swellendam kom. Hy is ’n direkte afstammeling van die eerste stamouer Steyn wat hom in Suid-Afrika vestig uit Leeuwarden in Holland. Later gee hy onderwys aan die Hoërskool Die Punt op Mosselbaai, waar die gesin hulle vestig. Die egpaar het vier kinders, drie seuns (Johan, Cornelis en Deon) en ’n dogter (Monica), wat ook die jongste kind is. Sannie beywer haar vir welvaartsaangeleenthede in haar omgewing.

Sy sterf op 20 Junie 1962 in Mosselbaai.

Skryfwerk

Reeds op skool is sy lief vir skryf en toon sy ’n voorliefde vir opstelle. Sy lewer veral gewilde leesstof en romans oor mense van ’n spesifieke streek, soos in “Riemlandse nooientjie”. Die hoofkarakter is Rinette Beaurraine, wie se lewe vanaf haar dertiende jaar tot haar drie-en-twintigste jaar die boustof van die roman is. “Gebeurlikhede in en om die huis” bevat geestige sketse uit die lewe van ’n huisvrou. “Geplukte are” is ’n godsdienstige boek. “Voor die hek” is nog ’n roman, met as tema ’n begaafde jong meisie wat die liefde van ’n onderwyser verwerp om voorkeur te gee aan rykdom in ’n loopbaan as sakevrou. Wanneer sy wel die rykdom verwerf het, besef sy dat finansiële welvaart sonder liefde nutteloos is. “Theobald skryf ’n brief” is ’n jeugverhaal. Sy gee ook “’n Nuwe bundel kindergediggies” uit, met sommige van hierdie versies wat later deur Pieter W. Grobbelaar in die versamelbundels “Trompettertjie”, “Wieliewalie” en “A la mallemeule” opgeneem word. Haar artikel oor “Dapper agterryers: Jan Ruiter, president Steyn se lyfbediende” verskyn op 17 Julie 1942 in Die Huisgenoot en word deur J.C. Steyn onder die titel “Ruiter se vertelling” in die versamelbundel “Veg en vlug” opgeneem.

Publikasies

Jaar	Publikasies
1928	Gebeurlikhede in en om die huis
1930	’n Nuwe bundel kindergediggies
1937	Leeu
1939	Theobald skryf ’n brief
1942	Geplukte are
1943	Riemlandse nooientjie
1947	Voor die hek

Bronnelys

Boeke

• Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
• Kannemeyer, J.C. “Geskiedenis van die Afrikaanse literatuur 1” Academica, Pretoria en Kaapstad Tweede druk 1984
• Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
• Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998
• Van Coller, H.P. (red.) “Perspektief en Profiel Deel 2” J.L. van Schaik-Uitgewers Pretoria Eerste uitgawe 1999

Internet

• Worldcat: http://www.worldcat.org/search?q=au%3ASteyn%2C+Sannie.&qt=hot_author

Ongepubliseerde dokumente

• Steyn, Sannie “Lewenskets” Nasionale Afrikaanse Letterkundige Museum en Navorsingsentrum (NALN) Bloemfontein