Sentrum vir die Boek
Die Sentrum vir die Boek in die stadskom van Kaapstad word gehuisves in ‘n buitengewone gebou van besondere kultuur-historiese belang.
Ligging wysig
Die gebou is by Koningin Victoriastraat 62, by die koördinate 33° 55′ 37″ suid, 18° 24′ 57″ oos en regoor die Kompanjiestuin.
Gebou wysig
Die gebou in die Edwardiaanse styl is vroeg in die 20ste eeu opgerig as hoofgebou vir die Universiteit van die Kaap die Goeie Hoop volgens tekeninge van die Britse argitekte W. Hawke en W.N. McKinley. Die koste van die oprigting is gedra deur sir Donald Currie en Willem Hiddingh (*Kaapstad, 29 Mei 1808 - †Kaapstad, 10 Desember 1899), ‘n Kaapse regsgeleerde, weldoener en oujongkêrel. Hiddingh het ook in sy testament die perseel vir die oprigting van die beoogde gebou bemaak. Aangesien dit mettertyd geblyk het dat die gebou nie meer aan die nuwe en groter eise van ‘n universiteit voldoen nie, is dit in 1932 aan die staat verkoop en het dit die tuiste van die staatsargief geword.
Argitektuur wysig
Die onderkant van die buitemure is van graniet verkry uit die Paarl. Daar bo-op is gebou met sandsteen afkomstig van die Vrystaat. Hierdie sagte sandsteen is versier deur ingewikkelde, soms oordadige en fyn uitgewerkte beeldhouwerk. Groen Spaanse teëls is op die dak aangebring. Koperkleurige plate bedek die koepel. Op die koepel staan ‘n torinkie van kiaat. Die groot saal onder die koepeldak het die voorkoms van ‘n Griekse teater. ‘n Sirkelvormige suilegang is beklee met marmer en leiklip en die pilare is van ‘n rooskleurige sandsteen. In die voorportaal is vlakreliëf portrette in brons en marmer van Currie en Hiddingh.
Huidige gebruik wysig
Die Sentrum vir die die Boek se doel is om geletterdheid in alle bevolkingsgroepe en in alle tale van die land te promoveer deur aandag te gee aan die ontwikkeling van ‘n leeskultuur. Daar word aandag gegee aan die skryf en uitgee van goeie boeke deur kursusse aan te bied. Sedert ±1990 is dit ‘n filiaal van die Suid-Afrikaanse Biblioteek (Nasionale Biblioteek van Suid-Afrika). Spesiale en unieke boekversamelings word hier bewaar. Onder andere word die Louis Leipoldt-versameling en die kantoor van die Van Riebeeck-Vereniging hier gehuisves.
Bibliografie wysig
- Duncan, Paul en Alain Proust: Hidden Cape Town. Kaapstad: Struik, 2013. ISBN 978-1-43170-299-2
- publishsa.co.za
- sa-venues.co
- Suid-Afrikaanse biografiese woordeboek, deel 2. Kaapstad: Tafelberg Uitgewers, 1972. ISBN 0-624-00368-X]