Servaas Hofmeyr
Dr. Servaas Hofmeyr (Kaapstad, 11 Desember 1830 – Montagu, 5 Desember 1888) was 'n predikant in die Nederduitse Gereformeerde Kerk.
| Servaas Hofmeyr | |
| |
Dr. Servaas Hofmeyr
| |
| Naam | Servaas Hofmeyr |
|---|---|
| Geboorte | 11 Desember 1830 Kaapstad, Kaapkolonie |
| Sterfte | 5 Desember 1888 Montagu, Kaapkolonie |
| Kerkverband | Nederduits Gereformeerd |
| Gemeente(s) | Colesberg, Montagu |
| Jare aktief | 1857 - 1888 |
| Kweekskool | Universiteit van Utrecht |
Hofmeyr was die twaalfde kind van Jan Hendrik Hofmeyr (1789-1862) en sy vrou, Hester Sophia Joubert, en 'n jonger broer van prof. N.J. Hofmeyr.
Nadat hy die skool Tot Nut van 't Algemeen in Kaapstad bygewoon het, vertrek hy na Utrecht in 1849 waar hy 'n doktorsgraad in die teologie behaal in Augustus 1856. Sy tesis, in Latyn geskryf, het gehandel oor Paulus se leerstelling oor die eersgeborene van alle wesens. Gedurende sy studiejare het hy baie gereis, ook na Noord-Amerika. Met sy terugkeer na Suid-Afrika is hy op 13 Februarie 1857 as predikant gelegitimeer.
Hofmeyr ontvang talle beroepe en aanvaar dié na die NG gemeente Colesberg, waar ds. John Murray hom op 29 Augustus 1857 bevestig. Op 29 September 1860 is hy in sy tweede en laaste gemeente, Montagu, bevestig. Hier behaal hy uitsonderlike sukses, gekenmerk deur die geestelike herlewing wat op sy bevestiging gevolg het. Wit sowel as bruin inwoners was baie erg oor hom.
Op die Kaapse Sinode van 1867 is hy as assessor aangewys. Hy dien in talle belangrike sinodale kommissies, onder meer die Kuratorium van die Kweekskool op Stellenbosch, waarin hy besonder baie belang gestel het. Hy was 'n produktiewe skrywer wat geglo het die Afrikaners moet ook deur middel van die geskrewe woord opgevoed word. Hy was redakteur van die joernaal Elips, wat hy in 1857 opgerig het, en deur die oprigting saam met kollegas van die maatskaplik-godsdienstige koerant De Volksvriend het hulle toegang tot 'n wye kring lesers gehad. Hy was ook medestigter van die koerant De Volksbode in 1877.
Hy was 'n jonger broer van prof. N.J. Hofmeyr. Ds. Hofmeyr is in Desember 1861 getroud met Anna Georgine Morgan, 'n dogter van ds. George Morgan. Uit die huwelik is ses kinders gebore, onder wie die sakeman en kultuurleier W.A. Hofmeyr. Die oudste seun was Henry John Hofmeyr, die Randse pionier, prokureur, opvoedkundige en vooraanstaande figuur in die openbare lewe.
Bron
wysig- Potgieter D.J. (ed.). 1971. Standard Encyclopaedia of Southern Africa; Cape Town: Nasionale Opvoedkundige Uitgewery Bpk.