Silver de Lange
Johannes Petrus (Silver) de Lange (1904–1956) was 'n Suid-Afrikaanse musikant en die leier van die Vyf Dagbrekers-musiekgroep. De Lange was 'n bobaas-konsertinaspeler. Hy het volgens oorlewering sy bynaam, Silver, van die suiwer klanke wat hy uit 'n konsertina kon optower.[1]
Silver de Lange | |
|---|---|
| Geboortenaam | Johannes Petrus de Lange |
| Ook bekend as | Hans |
| Gebore | 14 Julie 1904 Vrededorp, Gauteng |
| Sterf | 18 Desember 1956 Johannesburg |
| Genres | Boeremusiek |
| Instrumente | Konsertina, kitaar |
Een van Anton Goosen se komposisies, Silver de Lange, handel oor dié legendariese musikant (die konsertina kerm verlange, in die hande van Silver, Silver de Lange). Goosen het dié liedjie aanvanklik self opgeneem, maar Carike Keuzenkamp het ook later sukses daarmee behaal.[2][3]
De Lange se opname van Hoe Ry Die Trein (die Kimberley se Trein) is in 2010 op Huisgenoot se CD, 90 Jaar Van Afrikaanse Musiek, heruitgereik.
Biografie wysig
De Lange is op 14 Julie 1904 op Vrededorp (in Gauteng) as die oudste van elf kinders gebore. Sy pa het in die Anglo-Boereoorlog geveg en met sy terugkeer gevind dat sy vrou 'n kind by 'n Engelsman gekry het, en is toe geskei. Sy pa trou weer in 1903, en Silver was die eerste kind uit die huwelik. Sy ouers het later 'n serfyn, kitaar en konsertina vir die kinders gekoop, waarop hy leer speel het.
Sy eerste liefde het op 'n ramp uitgeloop. Kobie het nie dieselfde oor hom gevoel nie en is met iemand anders getroud. Hy is later met 'n geskeide vrou, Francis, met 'n seun uit haar vorige huwelik, getroud. Francis was egter 'n hartlyer en hy het haar een middag dood op die bed aangetref. Hierna het hy vriendinne gehad, maar het nie weer getrou nie.
Hy is op 'n stadium deur vervaardigers van die Wheatstone-konsertina's in Engeland gekontak om hulle met die herontwerp van hulle wêreldbekende musiekinstrument te help. Die plan is egter nooit deurgevoer nie (En watter vrou het gekyk in jou oë se blou, as jou vingers om die wheatstone se note vou?).
De lange is op 18 Desember 1956 oorlede. Daar is verskillende stories oor sy dood, volgens sy broer het hy 'n beroerte gehad, maar hy is waarskynlik weens breinbloeding dood nadat hy geval en sy kop 'n randsteen getref het.
Hy is in die Wespark-begraafplaas in Johannesburg te ruste gelê. Die Tradisionele Boeremusiekklub het later sy graf opgespoor en 'n gedenksteen laat oprig, wat op 19 Oktober 1985 onthul is.[4]
Diskografie wysig
- Silver de Lange (Die Vyf Dagbrekers), Volume 1 & 2, Alfa Ateljee
- Silver de Lange op sy Beste, Alfa Ateljee
- Silver de Lange se Vyf Dagbrekers, Volume 1 en 2, LP, Skatkis
- Lente op die Plaas / Verlief Op Jou, 7", His Master's Voice
- Het Jy My Nog Lief? / Ek Het Jou Lief, 7"
- My Mooi Rooibekkie / Jy Breek My Hart, 7"
- Dink Aan My / Een Druk En Een Soen, 7"
- Moenie So Maak Nie / Ek Verlang Na Jou, 7"
- Vêr In Die Vrystaat By Jou / Hoekom Het Jy My Laat Staan?, 7"
Verwysings wysig
- ↑ 1001 South African Songs You Must Hear Before You Go Deaf, besoek op 17 Julie 2015
- ↑ Lirieke van Silver de Lange Geargiveer 18 Julie 2015 op Wayback Machine, liriekfabriek.co.za, besoek op 18 Junie 2015
- ↑ Resensie: 5 dekades van Carike Keuzenkamp, Maroela Media, 17 Junie 2015
- ↑ Silwer de Lange Geargiveer 5 Maart 2016 op Wayback Machine, boeremusiek.org, 18 Junie 2015