Arrie de Beer

Arnold S (Arrie) de Beer (gebore Standerton, 10 Junie 1942) is ’n baanbreker op die terrein van joernalistieke onderrig aan Afrikaanstalige universiteite, asook van nuusnavorsing in Suid-Afrika en is tans (2020) 'n buitengewone professor in die departement van joernalistiek, Universiteit Stellenbosch, Suid-Afrika.

Arrie de Beer
Prof. Arnold S (Arrie) de Beer
Gebore	10 Junie 1942
Beroep	Hoogleraar, joernalis, joernalistieke meningsvormer en opvoerder, nuusnavorser

Loopbaan en aktiwiteite

De Beer matrikuleer aan Grey-kollege in Bloemfontein in 1960 en behaal ´n BA met hoofvakke perswetenskap en staatsleer in 1964; in 1965 verwerf hy ´n  BA (Hons) in perswetenskap (met onderskeiding), asook in 1981 ´n PhD (proefkrif: Die professionalisering van die joernalistiek) aan die destydse Potchfestroomse Universiteit. Hy verwerf ook in 1977 ´n MA met onderskeiding in joernalistiek aan die destydse Randse Afrikaanse Universiteit (verhandeling: Die operasionalisering van die begrip nuuswaardigheid) en ´n MIJ in internasionale joernalistiek (skripsie: Amerikaanse nuusdekking van Suid/Afrika) aan Baylor-universiteit  in die VSA (straight A´s).  

Sy navorsingsonderwerpe sluit in die rol van nuus en nuusmedia in die Suid-Afrikaanse samelewing, nuusvloei en joernalistieke onderrig. Hy ontvang ´n B-navorsingsakkreditasie van die SA Nasionale Navorsingstigting. Daar verskyn verwysings na sowat 150 van sy publikasies op Google Scholar, wat in 2020 sy H-publikasieindeks as 23 en sy i10-publikasie-indeks as 55 aandui. Volgens Google Scholar is sy publikasies al sowat 1 900 gesiteer.

Tot 2019 was hy 'n lid van die uitvoerende komitee en Afrika-koördineerder van die Worlds of Journalism Study, die grootste internasionale navorsingsprojek tot nog toe oor die rol van joernaliste oor die wêreld heen met 27 500 joernaliste in 67 lande wat deelgeneem het.

In 1980 stig hy Ecquid Novi: African Journalism Studies (AJS)(Routledge/T&F). AJS was die eerste vaktydskrif in die vakgebied van media en joernalistiek in Afrika en die res van die Globale Suide wat in die ISI-lys van joernale opgeneem is. Hy is die redakteur van die vyfde uitgawe van Global Journalism (Pearson). Hy is die samesteller en mede-outeur van die eerste handboek vir die joernalistiek in Afrikaans (Joernalistiek vandag, Tafelberg, 1982) en van die eerste omvattende massakommunikasie-handboeke in ´n enkele monografie (Mass media for the Nineties, 1993 en Mass Media towards the millennium: the South African Handbook of Mass Communication, 1998, albei J.L. van Schaik). Hierdie publikasies word standaard- voorgeskrewe werke in Suid-Afrika.

Terwyl hy nog ´n student op Potchefstroom was, word hy in 1964 redakteur van die Potch-Nuus. Van 1966 tot 1973 werk hy as opvoedkunde- en godsdiensjoernalis by Die Transvaler en as hoofsubredakteur, asook parlementêre verslaggewer, by Die Burger. Hy word in die loop van 1973 redakteur van die Ensiklopedie van die Wêreld (Albertyn, Stellenbosch), voordat hy in 1974 ´n lektorspos in joernalistiek aan die destydse Randse Afrikaanse Universiteit (RAU) aanvaar en in 1980 word hy as senior lektor en waarnemende hoof aangestel. Hierna was hy professsor en hoof van die departemente van kommunikasie aan die Vrystaatse Universiteit (1981-1989) en van die Universiteit van Noordwes (Potchefstroom-Puk, 1989-2000). Van 1989 tot 2002 was hy direkteur van die Instituut vir Kommunikasienavorsing aan die Potchefstroomse Universiteit. Hy is aanvanklik van 2003 af op kontrakbasis aan die Universiteit van Stellenbosch se joernalistiekdepartement aangestel nadat die Potchfestroomse Universiteit alle dosente se diens eensydig beëindig het wat in 2002 sestig jaar oud geword het. Sedert 2007 is De Beer steeds ´n buitengewone professor in laasgenoemde department waar hy weer in dieselfde hoedanigheid tot 2022 aangestel is.

De Beer was ook aktief in die georganiseerde mediawêreld waar hy die eerste joernalistiekdosent was wat in bepaalde media/organisasies gedien het. Hy is 'n voormalige lid van die SAUK-raad, asook lid van die raad se uitvoerende komitee en voorsitter van die raad se etiekkomitee. Verder was hy lid die SA Mediaraad; die SA Persraad; die appèlkomitee van die SA Persombudsman en was hy 'n joernalistieke akademiese verteenwoordiger op die Suid-Afrikaanse Nasionale Redakteursforum, waarvan hy ook ´n stigterslid was. Hy was die eerste Afrikaanssprekende lid van die internasionale raad van die International Association of Media and Communication Research (IAMCR) en hoof van die internasionale navorsingsafdeling. Hy was ook die eerste Afrikaanse joernalistiekdosent wat deur African Council on Communiction Education (ACCE) as spreker genooi is en as sodanig ook die eerste bestuurslid (voorsitter van die onderrigafdeling).

Hy was 'n besoekende professor aan o.m. die universiteite van Washington, Baylor en van Indiana-Purdue in die VSA; Ede in Nederland; en die Christian University of Uganda. Hy was o.m. eksaminator vir universiteite in die VSA, Nederland, Australië, Zimbabwe, Ethiopië, en Swaziland. Hy was ook buitengewone professor aan die Universiteit van Wes-Kaapland.

De Beer is genooi as “Afrika- of Suid-Afrikaanse medianavorsingskenner” na sowat vyftig internasionale konferensiepanele, seminare en konferensies deur onder meer afdelings van die AEJ&MC (oor internasionale nuusvloei; internasionale joernalistieke onderrig; internasionale skakelwerk, media en demokrasie) en die Duitse Kommunikasievereniging oor joernalistieke navorsing.

Hy was 'n medestigter en lid van die uitvoerende komitee van die South African Institute for Public Relations (Prisa) en een van die eerste geakkrediteerde skakelpraktisyns in die land.

Hy was in sy studentedae voorsitter van die Afrikaanse Studente-persunie (Aspu) en redakteur van die Die Wapad, studentekoerant van die Potchefstroomse Universiteit wat Aspu se eerste toekenning vir die beste studentekoerant in die land ontvang het.

Ander akademiese aktiwiteite

De Beer se ander akademiese aktiwiteite sluit in:

• Stigter en direkteur van die Institute for Media Studies in South Africa (iMasa), eienaars van die vaktydskrif African Journalism Studies.
• Navorsingsdirekteur: Media Tenor South Africa – Institute for Media Analysis (MTSA).
• Stigter van die internasionale aanlynvaktydskrif Global Media Journal - Africa.
• Stigteredakteur van Journal of Global Mass Communication.
• Lid en sameroeper van die spesialiskomitee vir Kommunikasie / Massakommunikasie / Joernalistiek / Inligtingkunde / Biblioteekkunde van die Nasionale Navorsingstigting.
• Lid van die redaksieraad van onder meer Journalism and Mass communication Quarterly en van Journalism Studies.
• Voorsitter van die Suid-Afrikaanse Universiteitsdosentevereniging.
• Lid van die komitee vir aanbevelings aan die regering oor die instelling van die eerste nasionale subskripsietelevisiediens.
• Uitgenooi deur die Voorsitter van die Waarheids- en Versoeningskommissie in 1998 om saam met Max du Preez, redakteur van die Vrye Weekblad, in die WVK se ´´Media Hearing´´ te getuig toe Nasionale Pers en Afrikaanse joernaliste 'n uitnodiging om getuienis te lewer, van die hand gewys het.

Toekennings

De Beer het onder meer die volgende toekennings ontvang:

• Mederedakteur van Worlds of Journalism (Columbia University Press, 2019), Journal for Press-Politics-Sage-ICA-prys vir die beste boek in joernalistiek, met inagneming van boeke wat die voorafgaande tien jaar internasionaal verskyn het.
• Die Stalsprys vir prestasie op die gebied van menslike en sosiale wetenskappe is vir die eerste keer in joernalistiek deur die SA Akademie vir Wetenskap en Kuns aan De Beer toegeken.
• Distuinghuised Radford Visiting Professorship of Journalism, Baylor/Universiteit, VSA.
• Spesiale toekenning van die internasionale afdeling van die Association for Journalism and Mass Communication (AEJMC) vir bydraes tot die studie van en navorsing oor internasionale joernalistiek. Dit was die eerste toekenning van hierdie aard aan ´n medianavorser buite die VSA.

• Medestigter, president en verkies as Lewenslange Genoot van die South African Communication Association (Sacomm).
• Eerste toekenning vir SA Communicator of the Year-toekenning van Prisa.
• Eerste Suid-Afrikaanse ontvanger (saam met Herman Wasserman) van die van die National Ethics Colloquium Fellowship, Skool vir Joernalistiek, Universiteit van Missouri, VSA.
• Abe Bailey-beurs vir studie in die Verenigde Koninkryk, Abe Bailey Foundation.
• Twee senior toekennings van die SA Nasionale Navorsingstigting / Geesteswetenskaplike Navorsingsraad vir navorsing in Israel en Noord-Ierland (nuusdekking oor konflik) en in die VSA (mediapolitiek); post-MA-toekenning; 'n aantal toelaes vir die bywoning van internasionale konferensies; aantal toekennings vir navorsing in Suid-Afrika.
• Twee toekennings van die Freedom Forum om werksessies oor media-etiek by te woon (Vanderbilt Universiteit) en nuwe media (San Francisco).
• Twee toekennings van die International Press Institute  (IPI) vir werksessies / konferensies in Roemenië (uitgenooide referaat) en Rusland.
• Toekenning van die Christian Science Monitor vir deelname en ´n werkwinkel-aanbieding oor internasionale mediadekking. Boston, VSA.
• Toekenning van die Afdeling Skakelwese van die AEJMC om 'n navorsingsreferaat in die VSA te lewer.
• Toekenning van die Konrad Adenauer-stigting vir navorsing en 'n konferensie-referaat.
• Toekenning van Unesco en die University Autònoma in Barcelona, Spanje, vir navorsing oor mediadekking van die Olimpiese Spele.
• ´n Aantal toekennings vir kleiner navorsingsprojekte van die navorsingskomitees van Universiteit Stellenbosch, Potchefstroomse Universiteit, Vrystaatse Universiteit, en die Randse Afrikaanse Universiteit.

Persoonlik

Albei De Beer se ouers was onderwysers. Sy pa is drie maande voor sy geboorte oorlede. Altesame 25 jaar ná hulle mekaar as voorgraadse studente op Potchefstroom ontmoet het, is De Beer se eggenote, Nicolette, in 2017 oorlede. Hulle het drie kinders, dr. Arnold de Beer, ´n elektroniese ingenieur en dosent aan die Universiteit van Johannesburg, dr. Adriana Botha, ´n inligtingskonsultant verbonde aan die Fakulteit Inligtingkunde van die Universiteit van Pretoria, en Jan-Hendrik, ´n regskonsultant verbonde aan Capitec Bank. Sy ses kleinkinders, wat hy “´n groot vreugde in die lewe” noem, is Carla en Anika de Beer; Gideon en Nicolette Botha, en Arno en Suzanne de Beer.