Theresa May
Theresa May

Ampsbekleër
Ampsaanvaarding
13 Julie 2016
Monarg Elizabeth II
Voorafgegaan deur David Cameron

Persoonlike besonderhede
Geboorte 1 Oktober 1956 (1956-10-01) (60 jaar oud)
Eastbourne, Sussex, Engeland, Verenigde Koninkryk
Eggenoot/eggenote Philip May (∞ 1980)
Kind(ers) Geen
Alma mater St Hugh's College, Oxford
Religie Kerk van Engeland
Handtekening Signature of Theresa May.svg

Theresa Mary May [təˈriːzə ˈmeəri meɪ], * 1 Oktober 1956 as Theresa Mary Brasier in Eastbourne, East Sussex, Engeland, is 'n Britse politikus en sedert 2016 leier van die Konserwatiewe Party van die Verenigde Koninkryk. Vanaf Mei 2010 het May as minister van binnelandse sake in die kabinet van premier David Cameron gedien. Sedert 13 Julie 2016 beklee May die amp van eerste minister van die Verenigde Koninkryk. Sy is die tweede vroulike premier en leier van die Konserwatiewe Party ná Margaret Thatcher.

Na twee vergeefse pogings in 1992 en 1994 om 'n parlementsetel te wen, verteenwoordig May sedert die algemene verkiesing van 1997 die kiesafdeling Maidenhead in die Britse Laerhuis. Tussen 1999 en 2010 het May verskeie poste in die skadukabinette van William Hague, Iain Duncan Smith, Michael Howard en David Cameron beklee, waaronder skadusekretaris van vervoer en skadusekretaris van werk en pensioene. Tussen 2002 en 2003 was sy voorsitter van die Konserwatiewe Party. May beskou haarself as 'n aanhanger van One-nation-konserwatisme, terwyl haar politieke standpunt deur politieke waarnemers as liberaal-konserwatief beskryf is.

May het in Oxfordshire grootgeword waar haar pa as vikaris gedien het. Tussen 1977 en 1983 het sy vir die Bank van Engeland gewerk, en tussen 1985 en 1997 vir die Association for Payment Clearing Services, terwyl sy ook die amp van raadslid vir Durnsford in Merton beklee het.