Volksraad Verkiesing Kommissie
Die Volksraad Verkiesing Kommissie (sic; VVK) is 'n administratiewe liggaam wat hulleself beywer om 'n verkiesing vir volksgenote van die Boere-Afrikanervolk te organiseer. Hulle is polities neutraal en vergelyk hul werk met dié van die Onafhanklike Verkiesingskommissie van Suid-Afrika (OVK). Hulle doel is om kiesers te registreer en 'n verkiesing te administreer om sodoende 'n volksraad tot stand te bring wat selfregering van die Suid-Afrikaanse regering kan eis.
Regsgeldigheid wysig
Volgens artikel 235 van die Grondwet van Suid-Afrika, wet 108 van 1996, kan enige gemeenskap wat 'n gemeenskaplike kultuur- en taalerfenis deel, op selfbeskikking aandring binne 'n territoriale entiteit in die Republiek of op enige ander wyse, soos deur nasionale wetgewing bepaal.
Daarbenewens word die reg tot selfbeskikking deur die Verenigde Nasies en ander wêreldliggame erken.
Stigting wysig
Die VVK het op 18 Augustus 2007 tydens 'n ope vergadering in Pretoria tot stand gekom om 'n verteenwoordigende stem vir die Boere-Afrikanervolk te verkry. Hulle sentrale komitee bestaan uit:
- Paul Kruger (Voorsitter)
- Tim van der Westhuizen (Adjunk-voorsitter)
- Danie Pretorius
- Hannes van der Merwe
- Ivan Martens
- Willie Steenkamp
- Albert du Toit
Verkiesings wysig
Die VVK se eerste verkiesing het op 23 September en 24 September 2011 plaasgevind. Slegs geregistreerde kiesers kon hieraan deelneem en kon by enige VVK-stempunt, ongeag waar hulle woon, gaan stem het. Elke kieser kon sy kruisie agter sewe of minder kandidate se name trek. Die sewe kandidate wat van die meeste stemme op hulleself verenig het, is tot die Boere-Afrikanervolksraad verkies.
'n Aantal van 34 532 mense het vir die verkiesing geregistreer en 23 678 mense het uiteindelik gestem. Afrikaanse media het feitlik geen dekking aan die verkiesing gegee nie. Selfs betaalde advertensies is deur Afrikaanse media geweier.[1]
Omstredenheid wysig
Die VVK is op 5 Junie 2012 deur Anthony Benadie van die Demokratiese Alliansie (DA) by die Menseregtekommissie (MRK) vir haatspraak verkla.[2] Volgens Benadie sou 'n protesaksie van die VVK na die moord op 'n 5-maande-oue babaseun en sy 66-jarige dagmoeder op haatspraak neerkom deurdat die volgende stellings op plakkate vertoon is:[2]
- "Bring my R4"
- "Swart lafaards - los ons vroue en kinders alleen"
- "Steel, verkrag en moor: Ons is klaar met swart Suid-Afrika"
- "Barbare, los ons kinders alleen"
- "Volksraad: ons volg julle na ons eie staat"
- "VVK Volksraad Vryheid"
- "FW de Klerk die vark in die verhaal"
Die MRK bevind dat hierdie slagspreuke op haatspraak neerkom en gee die VVK opdrag om 'n onvoorwaardelike, geskrewe, publieke verskoning in 'n koerant wat deur die swart gemeenskap gelees word, te publiseer.[2]