Van Heerden-monument

Die Van Heerden-gedenknaald by Vanwyksdorp in die Klein Karoo herdenk kapt. B.M. van Heerden, die distrikskommandant van polisie op Oudtshoorn, wat daar in die uitvoering van sy pligte gesneuwel het.

Piet Matthyse, ‘n 37-jarige man met ‘n lang misdaadgeskiedenis, van die Ladismith-omgewing was ‘n voortvlugtige voor die gereg. In sy omswerwinge vanaf Johannesburg terug na die vir hom bekende Klein Karoo het hy op ‘n plaas by Willowmore ‘n geweer en ammunisie gesteel en op 22 Desember 1946 op ‘n plaas in die George-distrik ‘n egpaar koelbloedig vermoor. Op Maandag 30 Desember 1946 het ‘n soekgeselskap vir Matthyse teengekom. In die vuurgeveg het Van Heerden omgekom en is twee konstabels gewond. Matthyse het ook gewond geraak en boonop het sy geweer geweier. Hy is in Oktober 1947 in die rondgaande hof in Oudtshoorn ter dood veroordeel.

Hierdie gedenkteken lê afgeleë, naamlik aan die oostekant van die R327-pad en enkele kilometers suid van Vanwyksdorp. (Die R327 verbind die N2 by PetroSA wes van Mosselbaai en die R62 wes van Ladismith via die Du Plessispas, Herbertsdale, die Gouritsrivier, die Cloetespas en Van Wyksdorp.)

Bibliografie

• Britz, André: Vanwyksdorp – notule van ‘n nostalgiese reis deur die tyd. Vanwyksdorp, 2011. ISBN 978-0-620-49821-0
• Lötter, Daniël: Die grootpad is 'n grondpad - 'n koffiekuier by Karoomense. Pretoria: Protea Boekhuis, 2020. ISBN 978-1-4853-1116-4