Walmer (kiesafdeling)

Walmer was een van die drie nuwe kiesafdelings wat in 1966 in Port Elizabeth geskep is. Algoa was uit die staanspoor 'n veilige setel vir die Nasionale Party, Newton Park was tot 1977 'n Verenigde Party-vesting, maar het daarna na die NP oorgegaan, maar Walmer was strykdeur 'n vesting van eers die VP, waarna die Suid-Afrikaanse Party wen in 1977 en daarna van 1981 af die Progressiewe Federale Party. Trouens, toe die NP in 1987 feitlik skoonskip in die Oos-Kaap maak, was nog net Walmer en Port Elizabeth-Sentraal in PFP-hande.

In 1966 word Walter Graham Kingwell die eerste Volksraadslid vir Walmer toe hy die Nasionale Party se J.C. la Cock met 3 786 stemme klop. Die Progressiewe Party se R.K. Hancock was derde met 906 stemme. Hy behou die setel in 1970 met 'n meerderheid van 4 172 stemme, meer as die 4 025 stemme van die N.P.-kandidaat, D.H. Potgieter. In 1974 word T. Aronson van die VP onbestrede verkies. Walmer is in 1977 een van net drie setels wat die nuwe Suid-Afrikaanse Party kon verower. Van 1981 af wen eers die Progressiewe Federale Party tot 1987 en daarna die Demokratiese Party in 1989 in Walmer.

Sien ook

• Algoa (kiesafdeling)
• Newton Park (kiesafdeling)
• Port Elizabeth-Distrik (kiesafdeling)
• Port Elizabeth-Noord (kiesafdeling)
• Port Elizabeth-Sentraal (kiesafdeling)
• Port Elizabeth-Suid (kiesafdeling)
• Port Elizabeth-Suidwes (kiesafdeling)
• Port Elizabeth-Wes (kiesafdeling)

Bronne

• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.