Wanneer die middernagson weer skyn
Wanneer die middernagson weer skyn is ’n fantasie roman gemik op die meer volwasse leser. Die boek is geskryf deur Petronel en in 2013 deur Thompson Boekdrukkery gepubliseer.
Wanneer die middernagson weer skyn handel oor die bitterheid wat Lucian Delavantey ondervind nadat hy in ’n vampier verander word en hoe hy noodgedwonge moet aanpas by sy nuwe vervloekte lewenswyse en sy bloeddorstige alter ego. Dan verskyn die pragtige Henriette soos ’n helder sonstraal reg in die middel van sy nagmerrie. Skielik is daar weer hoop; ás Lucian dit kan regkry om sy inhumane alter ego met sy wrede bloeddors onder beheer te hou...
Titelbeskrywing
wysigDie titel ‘Wanneer die middernagson weer skyn’ het betrekking op twee natuurlike fenomene.
Eerstens is daar die middernagson, ’n natuurlike verskynsel wat veral in die somermaande in plekke noord van die Arktiese sirkel en suid van die Antarktiese Sirkel voorkom wanneer die son selfs deur die nag sigbaar bly. Sonskyndae sonder begin en sonder einde.
Dan is daar die bloed maan. Nog ’n natuurlike verskynsel elke paar jaar tydens ’n totale maansverduistering wat veroorsaak dat die maan bloedrooi vertoon.
Dit is presies hoe Lucian voel wanneer Henriette Middleton, net soos hierdie natuurlike fenomene, haar sonnige en ménslike verskyning reg in die middel van sy donker nagmerrie lewe maak.
Agtergrond Geskiedenis
wysigWanneer die middernagson weer skyn speel hom af in drie tydperke van die Kanadese geskiedenis met die grootste gedeelte van die verhaal in die hedendaagse Provinsie van Manitoba; die tydperk van Lucian se transformasie tydens die Rooirivier rebellie; en Lucian se verlede in die eertydse Assinibioa – voordat die onafhanklike provinsie van Manitoba gestig is.
Reg in die hartjie van Noord Kanada lê die bodem van wat eens die Groot Meer van Agassiz was. Eeue se erosie en klimaatsverandering het egter die water laat verdamp en vandag strek die eens Groot Meer van Agassiz in ’n prentjiemooi honderdduisend kleiner mere oor Kanada se prêrie vlaktes uit. Net wes van die groot mere lê Assinibioa in Rupert’s Land aan die walle van die Rooi rivier, sedert 1611 al die eiendom van die Hudson’s Baai Maatskappy. Dit is ook hier waar die eerste Britse kolonie hulself in Kanada kom vestig. In 1869 verkoop die Hudson’s Baai Maatskappy die landstreek van Assinibioa aan die Kanadese regering. Die Métis boere kom in opstand en begin die Rooi rivier rebellie onder leiding van Louis Riel. Op 12 Mei 1870, nadat die rebellie troepe die Hudson’s Baai Maatskappy se hoofkwartiere beset, stem die Kanadese regering in om die Manitoba oordrag te onderteken. Hierdie oordrag gee die inwoners van die Rooiriviervallei die reg om ’n onafhanklike provinsie te stig. Dus, Manitoba.
Storie
wysigDit is terwyl hy retrospeksie van sy uitsiglose en onoorkombare berg van ’n oneindige toekoms hou by wat veronderstel is om sy eie graf te wees wat Lucian Delavantey vir die eerste keer van ’n onbekende, maar sterk aantrekkingskrag bewus word. Dan stap Henriette Middleton met haar deurdringende ligblou oë op ’n paar baie gevaarlike spykerhakkies oor sy lewenspaadjie.
Eers weet Lucian nie wat om met haar te maak nie. Sy is definitief prooi, maar waarom dan die geweldige aantrekkingskrag wat hom soos ’n magneet aan haar wil klou? As man beteken die aantrekkingskrag net een ding. Hy moet haar beter leer ken. As vampier wakker Henriette se nabyheid ’n onblusbare bloedlus in hom op wat amper onmoontlik is om onder beheer te hou.
Henriette self skep geweldig probleme in Lucian se stryd om sy dors vir haar bloed onder beheer te probeer hou wanneer haar reaksie op sy nabyheid presies die teenoorgestelde blyk te wees as wat die mensdom normaalweg teenoor sy soort openbaar. Het sy geen selfbehoud nie?
Daar is net een persoon wat kan help met hierdie dilemma. Lucian se maker, Fréderic Antoine, maar Fréderic blyk om ’n ander agenda met Henriette en haar onnatuurlike belangstelling in die masochistiese Lucian te hê...
Karakters
wysigHoof karakters:
Lucian Delavantey Lucian Delavantey is in die somer van 1844 gebore. Hy word groot as enigste kind op die plaas Oublié Paradis in Assinibioa, Kanada. Op 23 jarige ouderdom besluit Lucian om by die Rooi Rivier rebellie aan te sluit. Merendeels om sy deug en manlikheid te bewys, maar ook om sy geboortegrond teen die Kanadese anneksasie te beskerm. Die rebellie seëvier en na ’n week lange feesviering word Lucian een aand laat in ’n stegie oorrompel. Hy word wakker as ’n derde generasie Follet-vampier. Vir die volgende 152 jaar dwaal Lucian deur ’n makabere half-lewe waaruit daar geen ontsnapping is nie. Die noodlot het ’n siek sin vir humor om hom in hierdie sadistiese doolhoof van oneindige smart en ellende te laat rondswerf. Hoe gaan hy deur sy leë en uitsiglose toekoms kom wat soos ’n oneindige berg voor hom uitgestrek lê? Dit is in retrospeksie by wat veronderstel is om sy eie graf te wees waar Lucian vir die eerste keer met Henriette Middleton kennis maak. ’n Henriette wat op ’n paar gevaarlike spykerhakkies gate in sy hart trap en terselfdertyd die diaboliese alter-ego in hom tot ’n bloeddorstige monster aanwakker. Aangedryf deur sy manlike begeertes asook die monster se onblusbare lus vir haar bloed agtervolg Lucian haar. Dit was die waaghalsigste en grootste fout van sy bestaan...
Henriette Middleton As groentjie op universiteit sterf albei haar ouers in ’n tragiese ongeluk. Haar klasmaat en vriend, Jason, word haar enigste toevlug. Na universiteit begin die twee van hulle by dieselfde kanker hospitaal werk en sit saam huis op. By die kanker hospitaal aanvaar Henriette die pos as ’n privaat verpleegster vir die negejarige JP. Dit is by JP se begrafnis waar sy haar vir die eerste keer in die vreemde Lucian vasloop.
Ander karakters:
Adrian en Brigitte Delavantey Lucian se ouers. Albei Métisse – afkomstig van die gemengde huwelike tussen die Britse koloniste en Cree vroue. Adrian Delavantey is ’n Godvresende man wat sterk in sy geloof staan en nooit versuim om sy seëninge te tel en sy God daarvoor te bedank nie. In die laat 1700’s besluit Adrian om die swerwerslewe van buffel jag en pelshandel op te gee en kleim sy stukkie grond op een van die vrugbare eens meer bodems aan die matige noord-westekant van Assinibioa af. Hy doop sy plaas Oublié Paradis, want sê hy, dit is ’n vergete stukkie van God se paradys. Uit beginsel is Adrian ’n sagte mens wat vas glo aan die sewentig maal sewe vergewens verbod maar hy is ook ’n nugter denkende mens en ’n trotse man. Trots op sy herkoms en trots op sy familie. Met haar silwer-grys hare en porselein vel staan Brigitte Delavantey vierkantig op haar voetjies in ’n seksistiese wêreld waar mans nog mans is en vroue nie veel sê het nie. Sy is ’n mensliewende, sensitiewe mens en haar deur staan altyd oop vir wie ook al daarna voel om in te loer. ’n Boerevrou in murg en been, maak-soos-ek-sê beleid en al.
Jason Emsworth Fisioterapeutiese verpleegkundige aan Manitoba se kanker hospitaal. Henriette se woonstelmaat, beste vriend en vertroueling. Homoseksueel. Onopgesmukte vriendelikheid. Tipe charisma wat vriende inboesem net waar hy gaan. Die feit dat hy en Henriette byna soos broer en suster is, is ’n seëning vir Lucian wat nie Henriette se gedagtes kan lees nie en dus al die inligting wat hy verlang van Jason se gedagtes kan kry. Jason is ’n klub vlieg en sleep Henriette altyd saam met hom. JP – Jean Pierre Sterf op negejarige ouderdom aan ’n beroerte. Ly aan ’n tipe genetiese bloedkanker wat die bloedvloei na sy brein belemmer. Vanaf die ouderdom van vier is JP in en uit die hospitaal, totdat sy ouers besluit dat hy by die huis die res van sy tydjie uit sal leef. Hulle neem ’n privaat verpleegster aan diens om na JP om te sien. (Henriette)
Frederic Antoine Lucian se maker. 2de generasie Follet – vampier. Wou van Lucian voed maar kon nie in sy gedagtes inglip nie. Alhoewel dié feit hom geweldig fassineer los dit hom met ’n probleem. Lucian sou weet wat met hom gebeur het en wat Fréderic is. Dié wete los hom met een van twee keuses. Maak Lucian dood, of verander hom. Vir redes wat meer met Fréderic se eensaamheid en sy fassinasie vir Lucian se uniekheid te doen het verkies hy om Lucian te verander. Hy help Lucian deur die regenerasie proses en staan hom by in sy aanpassing in sy ‘nuwe’ lewe.
Publikasie en ontvangs
wysig- Eerste druk: September 2013 deur Thompson Boekdrukkery
Verwerkings
wysig- Sagte band - ISBN 978-986-89335-4-5
- E-boek - ISBN 978-0-620-59567-4
Verwysings en skakels
wysigBibliografie
wysig- Microsoft Encarta/Manitoba/History
- Wikipedia/Midnight Sun
- www.google.com/bloodmoon