Wapen van Kaapland
Die wapen van Kaapland was die amptelike heraldiese simbool van die Kaapkolonie vanaf 1875 tot 1910, en die Kaapprovinsie vanaf 1910 tot 1994. Die wapen word nie meer amptelik gebruik nie.
Die amptelike wapenbeskrywing is:
- Wapen: In rooi, 'n klimmende leeu, getong en genael van blou, vergesel van drie ringe, alles goud; op 'n skildhoof van silwer drie blou koeke, elk belaai met 'n fleur-de-lis van goud.
- Helmteken: Die figuur van die Hoop, gekleed in silwer met blou mantel, rustende met die regterarm op 'n rots en met die linkerhand geplaas op 'n swart anker met kabel van natuurlike kleur.
- Skildhouers: Regs 'n swartwildebees en links 'n gemsbok, albei van natuurlike kleur.
- Wapenspreuk: SPES BONA.[1]
Tot 1952, was die figuur van die Hoop in blou geklee.
Geskiedenis
wysigDie wapen is in 1875 deur Charles Fairbridge in opdrag van die Kaapse regering ontwerp. Hy het Jan van Riebeeck se familiewapen (in rooi, drie goue ringe) as die basis daarvan gebruik, en 'n leeu (om die Nederlandse en Britse setlaars te verteenwoordig), en die fleurs de lis (die Franse Hugenote) bygevoeg. Die figuur van die Hoop was lankal 'n Kaapse simbool, en die wildebees en gemsbok was destyds nog volop in die kolonie. Die wapen is eers by geleentheid van die hoeksteenlegging vir die nuwe parlementsgebou op 12 Mei 1875 in die openbaar vertoon. 'n Jaar later, op 29 Mei 1876, is dit formeel deur koningin Victoria aan die kolonie toegeken.[2][3]
Die Kaapse Provinsiale Administrasie wat die koloniale regering se plek in 1910 ingeneem het, het die wapen behou. 'n Nuwe afbeelding deur prof Charles Groves is in 1952 in gebruik geneem, en Hoop se kleding is toe verander van 'n blou rok na 'n wit rok met 'n blou mantel. Die wapen is tot 1994 as provinsiale wapen gebruik.[3]
Die wapen is in 1955 weer by die College of Arms in Engeland op rekord geplaas, en in 1967 by die Buro vir Heraldiek geregistreer.[3]
Sien ook
wysigVerwysings
wysig- Brownell, F.G. (1993). Nasionale en Provinsiale Simbole.
- Pama, C. (1965). Lions and Virgins.
Eksterne skakels
wysig- South African Heraldry Website Geargiveer 31 Maart 2013 op Wayback Machine