Waterblommetjiebredie
Waterblommetjiebredie is 'n eg Suid-Afrikaanse bredie. Dit word van vleis gemaak, tipies van lam- of skaapvleis wat saam met waterblommetjies (blomme van Aponogeton distachyos) gestoof word. Waterblommetjies word algemeen in die damme en vleie van die Wes-Kaap aangetref. Die blomkoppies van die plant is in die winter tussen Julie en Augustus gereed om gepluk te word. Waterblommetjiebredie word dus meestal in die winter voorberei.
Geskiedenis wysig
Die gebruik van die waterblommetjies as 'n voedselbron is waarskynlik van die inheemse Khoikhoi-bevolking oorgeneem. Van die mense het in die kombuise van Nederlanders gewerk wat waarskynlik tot die nuwe dis aanleiding gegee het.
'n Ander teorie is dat die vroeë Hollandse setlaars (in Jan van Riebeeck se tyd) uit desperaatheid waterblommetjies as groente (en dus 'n bron van vitamien C) gebruik het, omrede hulle aanvanklike boerdery-inisiatiewe minder suksesvol was. Daar word ook gespekuleer dat die Voortrekkers dit as voedselbron kon geoes het aangesien hulle nie tydens trekke groente kon verbou nie.
Resepte wysig
Die tipiese bestanddele vir waterblommetjiebredie is:[1][2]
- Skaap- of lamsvleis in blokkies gesny.
- Waterblommetjies - verwyder die stam en week oornag in soutwater.
- Surings (Oxalis pes-caprae)
- Uie
- Aartappels
- Sout en peper
Verwysings wysig
- ↑ "Newsletter #26". Funky Munky (in Engels). 8 Junie 2002. Geargiveer vanaf die oorspronklike op 3 Maart 2016. Besoek op 7 September 2010.
- ↑ Olivier, Michael (29 Junie 2009). "Waterblommetjie Bredie" (in Engels). Geargiveer vanaf die oorspronklike op 14 November 2013. Besoek op 7 September 2010.
Eksterne skakels wysig
| Sien waterblommetjiebredie in Wiktionary, die vrye woordeboek. |
- 'n Resep op boerekos.com Geargiveer 11 November 2011 op Wayback Machine
- Resep op kookkuns.com