Waterdikkop

Die waterdikkop (Burhinus vermiculatus) is 'n lid van die dikkopfamilie en 'n nagvoël, net soos ander lede van die familie, maar meer aktief oordag as die ander dikkoppe. Dit kan bedags naby die oewers van riviere en mere gesien word, waar die voëls se natuurlike kamoeflering hulle byna onsigbaar maak tussen die rotse.

Waterdikkop
Bewaringstatus
Veilig  (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Klas:	Aves
Orde:	Charadriiformes
Familie:	Burhinidae
Genus:	Burhinus
Spesie:	B. vermiculatus
Binomiale naam
Burhinus vermiculatus (Cabanis, 1868)

Identifikasie

Hierdie voël is kleiner as die gewone dikkop. 'n Volwasse waterdikkop het 'n lengte van 41 cm en weeg 270 g. Die voël het 'n bruin kop met geel oë, 'n swart snawel en wit keel. Sy rug is ook bruin en sy bene grys van kleur. Die voël het 'n gehurkte postuur.

Verspreiding

Waterdikkoppe kom algemeen in Afrika voor, suid van 5°N van Liberië, Suid-Somalië tot by Suid-Afrika. Hulle kom egter nie voor in die suidwestelike woestyngebiede van hierdie area nie.

Habitat

Die voëls word oor die algemeen in moerasagtige gebiede en naby mere en riviere aangetref. Hulle word selde alleen aangetref en kom in pare of in 'n swerm voor.

Voortplanting

Waterdikkoppe is monogaam, maar indien die maat van 'n waterdikkop sterf, sal hy of sy 'n nuwe maat soek. Hul neste word in die grond gebou waarin die wyfie tipies 1 tot 3 roomkleurige eiers lê.

Dieet

Waterdikkoppe vreet meestal insekte en ander ongewerweldes, asook klein watergoggas.

Geluid

Die klaende, fluitende roep van die waterdikkop kan snags gehoor word.

Ander name

• Engelse naam: Water Thick-knee (Dikkop)
• Wetenskaplike naam: Burhinus vermiculatus

Sien ook

• Alfabetiese lys van Suid-Afrikaanse voëls
• Lys van Suid-Afrikaanse voëls (gegroepeer)
• Lys van Suider-Afrikaanse voëls volgens wetenskaplike name

Bronnelys

• Newman se Voëls van Suider-Afrika. ISBN 1-86872-982-6.
• Sasol Voëls van Suider-Afrika. Struik Nature. Vierde uitgawe 2011. ISBN 978-1-77007-926-7
• Water Thick-Knee Geargiveer 8 Junie 2007 op Wayback Machine, by die webwerf van Kenya Birds. Laaste besoek op 30 Mei 2007.
• Water Thick-knee Geargiveer 28 September 2007 op Wayback Machine, by The Kruger.com. Laaste besoek op 30 Mei 2007.
• The Nature Trail Geargiveer 23 Mei 2007 op Wayback Machine, by Mbweni Ruins Hotel in Zanzibar Geargiveer 28 Mei 2007 op Wayback Machine. Laaste besoek op 30 Mei 2007.

Eksterne skakels

• YouTube-video van 'n dagbesigting van 'n waterdikkop.