William Ernest Fairbridge

William Ernest Fairbridge (2 November 1863 tot 5 Oktober 1943) was 'n Rhodesiese koerantredakteur en eerste burgemeester van Salisbury, die teenswoordige Harare, Zimbabwe.

Hy is in Port Elizabeth gebore en het in 1880 in die Basoetoe-oorlog geveg, waarna hy in 1885 Kimberley toe verhuis. Later werk hy as verslaggewer en vertrek in 1891 na Masjonaland toe as verteenwoordiger van die Argus-maatskappy. Hy is gevra om 'n koerant daar te begin. Hy kom in Junie 1891 daar aan met geen toerusting nie en weinig min kennis van die finansiële bestuur van 'n koerant. Nietemin verskyn die eerste uitgawe van die Mashonaland Herald op 27 Junie 1891, wat gedruk is met ink wat Fairbridge self uitgevind het. In 1892 word hy die eerste bestuurder van die Argus Printing and Publishing Company.

Fairbridge is tot die dorpsraad verkies en word in Desember 1897 die eerste burgemeester van Salisbury. In 1904 vertrek hy na Johannesburg as eerste algemene bestuurder van die Argus-maatskappy, 'n pos wat hy tot en met sy aftrede in 1915 beklee.

In 1937 verhuis hy na Switserland en sterf daar in Montreux op 5 Oktober 1943.

Bron

• Akers, Mary (red.), Encyclopaedia Rhodesia, The College Press Pvt. Ltd., Salisbury, 1973.