Wikipedia

Bonné de Bod

Suid-Afrikaanse televisie-aanbieder

Bonné de Bod is 'n bekroonde televisie-aanbieder en -vervaardiger wat al vir meer as tien jaar in Afrikaans en Engels intensief verslag doen oor omgewingskwessies en bewaringsake wat haar na aan die hart lê. Sy is bekend as 'n gewese aanbieder van 50/50, sowel as die aanbieder en vervaardiger van haar dokumentêre films - STROOP: Journey into the Rhino Horn War en Kingdoms of Fire, Ice & Fairy Tales. Sy is ook die aanbieder en vervaardiger van die televisieprogram, Rhino Blog, en is 'n gereelde gas op nuuskanale en radiostasies.[1]

Bonné de Bod
Bonné de Bod tydens die verfilming van STROOP
Bonné de Bod in 2015
Gebore
Bonné de Bod

11 Junie 1981
Kempton Park, Transvaal
NasionaliteitSuid-Afrika
Alma materUniversiteit van Pretoria
BeroepTV- en rolprentaanbieder
Bekend virDokumentêre programme

Biografie

wysig

Na skool het sy B. Com Bedryfsielkunde aan die Universiteit van Pretoria studeer.[2] 'n Groot deel van die koshuislewe het bestaan uit verhoogproduksies en terwyl sy in 'n produksie opgetree het, het 'n modelagentskap haar genader vir 'n kontrak in Kaapstad. Na haar studies het sy haar modelloopbaan begin, terwyl sy ook drama gestudeer het. Na drie jaar het sy haar dramakursus voltooi[3][4] en begin verskyn in sepies soos Villa Rosa, Egoli en 7de Laan. Hoewel sy dit geniet het om karakters se rolle te vertolk, het sy begin besef dat as sy op televisie gaan wees, sy haarself wil wees en nie 'n karakter wil vertolk nie. Sy is 'n modeleringskontrak in Londen aangebied en terselftertyd ook die pos van veldaanbieder op SABC se omgewingsprogram, 50/50, aangebied. Dit was nie vir haar moeilik om op laasgenoemde te besluit nie, aangesien haar liefde vir die natuur van jongs af deur haar grootouers, wat haar en haar susters twee keer per jaar tydens skoolvakansies na die Krugerwildtuin geneem het, gekweek is.[5][3][6]

50/50

wysig

Sy was vir sewe seisoene, vanaf 2010 tot 2016, as veldaanbieder by 50/50 betrokke, waar sy 'n wye verskeidenheid onderwerpe en temas gedek het.[7]

STROOP

wysig

Terwyl sy en die filmmaker, Susan Scott, in die Krugerwildtuin by twee gestroopte renosterkarkasse met verfilming vir 50/50 besig was, het sy besef sy wil aan almal wys wat op grondvlak met renosters gebeur in 'n dokumentêre rolprent sonder sensors, sodat niemand kan sê hulle het nie van die renosterstroopkrisis geweet nie.[8] Sy het besluit om al haar aandag en tyd net aan STROOP: journey into the rhino horn war ('n onafhanklike film wat onder andere met behulp van gemeenskapsfinansiering vervaardig is) te wy, met die hulp van Susan Scott. Sy en Susan het hul lewens gewaag en gevare getrotseer om agter die ware feite van die renosterstroopkrisis te kom.[9][10] Die rolprent is amptelik vir 40 internasionale filmfeeste gekies en het 30 internasionale toekennings ontvang.[11][12] De Bod is in 2019 saam met onder andere Dame Judi Dench genomineer vir 'n Jackson Wild-media toekenning vir die beste aanbieder by die Jackson Wild filmfees[13] ook bekend as die "Oscars" van natuurlewe filmfeeste.[14]

Rhino Blog

wysig

Terwyl sy en Susan Scott besig was met verfilming van STROOP het hulle besef dat daar baie aspekte van die renosterstroopskrisis is wat nie in die rolprent verskyn nie en het toe besluit om 'n bygaande televisiereeks, Rhino Blog, vir die DSTV-kanaal, People's Weather, te vervaardig wat die positiewe werk wat gedoen word in die renosteroorlog, uit te lig.[15]

Kingdoms of fire, ice and fairytales

wysig

Ná hulle lang reis met die Stroop-dokumentêr het De Bod en Scott besluit om drie magiese wildernisse: Yellowstone Nasionale Park in die VSA, die Swartwoud in Duitsland en die Noordpoolsirkel in Swede se Lapland, te verfilm. Aanvanklik wou hulle dit in 'n televisiereeks van dertien episodes ontwikkel, maar as gevolg van die Covid-19 pandemie het hulle dit in 'n dokumentêre rolprent, Kingdoms of Fire, Ice & Fairy Tales verwerk.[16] Die film is gekies om by sewe internasionale filmfeeste vertoon[17] te word en het al talle toekennings ingepalm. Die bekende filmkritikus, Leon van Nierop, noem dat Kingdoms asembenewend is, maar dat dit die entoesiasme en respek waarmee De Bod die natuur waarneem is wat die rolprent so merkwaardig maak. Verder sê hy ook dat die manier waarop sy altyd een word met die landskappe, die dryfkrag agter die rolprent is.[18][19]

Bewonder & Bewaar

wysig

Vir die eerste seisoen van hierdie kykNET-televisiereeks van dertien episodes, Bewonder & Bewaar met Bonné de Bod het De Bod en regisseur, Susan Scott, natuurlewe-navorsers in bekende wildernisgebiede van Suid-Afrika, Namibië en Argentinië besoek. Die reeks is daarop gemik om kykers meer te leer oor die navorsers se baanbrekers-navorsingsprojekte en ook om meer uit te vind oor hulle as mense wat hul drome in die natuur uitleef. Die reeks toon onder andere navorsing op wildehonde in die Kruger Nasionale Park, poemas in Patagonië, Argentinië, woestynleeus in Namibië en pikkewyne op Dasseneiland.[20][21][22]

Nuuskanale

wysig

Sy verskyn gereeld op eNCA en SABC om oor verskeie renoster- en omgewingskwessies te gesels.[23]

Grootplaas: Sy verskyn gereeld op die kykNET-program, Grootplaas, om oor die omgewing en veral renosters te gesels.

Verder skryf De Bod artikels en daar word baie radio-onderhoude met haar gevoer oor omgewingskwessies, en spesifiek renosterstropery.[24]

Toekennings

wysig
  • 2015: SANPARKE Kudu-toekenning vir 'Beste Joernalis', wat sy ontvang het vir haar passievolle, gebalanseerde verslaggewing oor wildlewebewaringskwessies asook omdat sy die publiek op hoogte hou en inlig oor omgewingskwessies in Suid-Afrika.
  • 2016: ATKV- Mediaveertjie vir 'Beste Insetsel In 'n Opvoedkundige Program'.
  • 2019: SANPARKE Kudu-toekenning vir 'Beste Joernalis', wat sy saam met Susan Scott deel vir hul ondersoekende en in-diepte verslaggewing in Stroop (rolprent).[25] [26]
  • 2020: Impact DOCS toekenning vir 'Beste Aanbieder' in Kingdoms of Fire, Ice and Fairy Tales.
  • Impact DOCS toekenning vir 'Beste Stemwerk-beskrywing' vir Kingdoms of Fire, Ice and Fairy Tales.[27]

Bronne

wysig
  • Bonné de Bod - Biografie op IMDb
  • Lydia van der Merwe: Bewakers van die ou grotes. Sarie-tydskrif, Februarie 2016
  • Era Baloyi: An award-winning television presenter and filmmaker, Bonné de Bod. Quick Read Magazine, 2 Julie 2017
  • Esté Meyer Jansen: Bekroonde rolprentmakers terug met nuwe natuurlewefliek. Maroela Media, 4 September 2020

Verwysings

wysig
  1. ↑ Ngcobo, Khanyisile (9 November 2015). "Award-winning wildlife presenter talks conservation". Sandton Chronicle. Besoek op 5 April 2022.
  2. ↑ "Alumna profile: Bonné de Bod | University of Pretoria". www.up.ac.za.
  3. ↑ 3,0 3,1 "'Stroop: Journey into the Rhino Wars' offers a closer look into the world of poaching". TimesLIVE.
  4. ↑ Get It Pretoria, September 2016
  5. ↑ "50/50 postponement alarms supporters". 15 September 2009.
  6. ↑ Baloyi, Era (12 Julie 2017). "An award-winning television presenter and filmmaker, Bonné de Bod". quickread.co.za (in Engels). Besoek op 12 Julie 2017.
  7. ↑ "Lys van 50/50 episodes deur Bonné de Bod". bonnedebod.com (in Engels en Afrikaans).
  8. ↑ Arum, John (25 September 2019). "Stroop:Finding hope in the rhino poaching crisis". www.the-star.co.ke (in Engels). Besoek op 25 September 2019.
  9. ↑ "STROOP – a ground breaking doccie on Rhino poaching". Sandton Chronicle (in Engels (VSA)). 22 Augustus 2018. Besoek op 26 Julie 2021.
  10. ↑ ""Stroop – Journey into the Rhino Horn war" honoured at Film Fest". m.youtube.com (in Engels). 9 Augustus 2018. Besoek op 9 Augustus 2018.
  11. ↑ "5 SA films and series that made waves imternationally in 2020". Iol.co.za (in Engels). 28 Desember 2020. Besoek op 28 Desember 2020.
  12. ↑ "Watch Bonné accepting the Genesis Award for Brigitte Bardot International Documentary Feature Film". m.youtube.com (in Engels). 8 Julie 2019. Besoek op 8 Julie 2019.
  13. ↑ Jackson Wild 2019 Media Awards
  14. ↑ Naik, Sameer (3 Augustus 2020). "Why Bonné de Bod would love to spend the day with David Attenborough" (in Engels). The Saturday Star.
  15. ↑ "Rhino Blog" (TV Series 2016–) op imdb.com
  16. ↑ "Kingdoms Of Fire, Ice and Fairy Tales on Showmax 3 December". www.getaway.co.za (in Engels). 1 November 2020.
  17. ↑ Baxter, Jenni (14 April 2021). "SA Filmmakers Receive Awards for Kingdoms of Fire, Ice & Fairy Tales". www.sapeople.com (in Engels).
  18. ↑ "Kingdoms of Fire, Ice & Fairy Tales (2020)". stories.showmax.com (in Engels). 15 April 2021.
  19. ↑ Meyer Jansen, Esté (4 September 2020). "Bekroonde rolprentmakers terug met nuwe natuurlewefliek". maroelamedia.co.za.
  20. ↑ "Bewonder & Bewaar met Bonné de Bod". www.dstv.com. 2 Junie 2022.
  21. ↑ Engelbrecht, Renate (3 Junie 2022). "'Bewonder en Bewaar met Bonné de Bod' to air on kykNET in July". www.citizen.co.za (in Engels).
  22. ↑ Steyn-Bezuidenhout, Christa (8 Augustus 2022). "Video: Bonné de Bod se 'Bewonder en bewaar'–hoogtepunte". maroelamedia.co.za.
  23. ↑ "Bonné de Bod reacts to death of Sudan the rhino". SABC News. 20 Maart 2018. Besoek op 5 April 2022.
  24. ↑ Bonné de Bod lewer etlike bydraes op Maroela Media. 2016-2019
  25. ↑ "'Stroop' "gets SANParks Kudu Award donates prize money". www.getaway.co.za (in Engels). 4 Desember 2019.
  26. ↑ Rose-Innes, Alex (6 Desember 2019). "STROOP wins 26th film award". newshorn.co.za (in Engels).
  27. ↑ "Award of Excellence". impactdocsawards.com (in Engels).

Eksterne skakels

wysig
Ontsluit van "https://af.wikipedia.org/w/index.php?title=Bonné_de_Bod&oldid=2643107"