David d'Angers

Pierre-Jean David (12 Maart 1788 – 4 Januarie 1856) was 'n Franse beeldhouer en vrymesselaar. Hy het in 1809 die naam David d'Angers aangeneem na sy intrede in die ateljee van die skilder Jacques-Louis David om homself te onderskei van sy leermeester.

David d'Angers
David d'Angers in 1853, foto deur Édouard Baldus
Gebore	Pierre-Jean David (1788-03-12)12 Maart 1788 Angers, Frankryk
Sterf	04 Januarie 1856 (op 67) Parys, Frankryk
Nasionaliteit	Frans
Beroep	beeldhouer

Biografie

Portrettekening uit 1830 deur Carl Christian Vogel von Vogelstein van d'Angers as jong man

David se Gewonde Philopoemen in die Louvre

D'Angers is gebore in Angers in 1788. Sy vader was 'n houtsnyer en ornamentele beeldhouer, wat as soldaat by die vrywillige Republikeinse leër aangesluit het wat teen die Chouans van La Vendée geveg het. Hy het in die ateljee van Jean-Jacques Delusse gestudeer en in 1808 na Parys gereis om in die ateljee van Philippe-Laurent Roland te studeer.

Terwyl hy in Parys was het hy gewerk aan beide die Arc de Triomphe en die buitekant van die Louvre. In 1810 het hy daarin geslaag om tweede plek te behaal by die École des Beaux-Arts vir sy Othryades. In 1811 het sy La Douleur die École se kompetisie vir tête d'expression gewen, gevolg deur sy verowering van die Prix de Rome vir sy Epaminondas in dieselfde jaar. Hy het vyf jaar in Rome deurgebring, waartydens hy die ateljee van Antonio Canova besoek het en reise deur Italië na Venesië, Napels en Florence onderneem het.

Toe hy van Rome teruggekeer het omstreeks die tyd van die herstel van die Bourbons, het d'Angers nie in die omgewing van die Tuileries gebly nie, maar eerder verkies om na Londen te reis. Hier het John Flaxman en ander hom geroskam vir die politieke sondes van David die skilder; hulle het foutiewelik gedink dat hy verwant was aan hom.

Met groot moeite het hy weer na Parys gegaan, waar 'n betreklik voorspoedige loopbaan hom ingewag het. Sy medaljes en borsbeelde was in groot aanvraag, sowel as bestellings vir monumente. Een van die bekendstes hiervan is dié van Gutenberg in Straatsburg; maar die wat hy self die meeste waardeer het, was die standbeeld van Barra (Joseph Bara), 'n tromspeler-seun wat na bewering aangehou het om sy trom te slaan tot die oomblik van dood tydens die oorlog in La Vendée, en die monument vir die Griekse bevryder Markos Botsaris.

Monument vir Generaal Gobert (Père Lachaise)

David het 'n groot aantal borsbeelde en medaljes gemaak, en onder dié vind mens nie slegs die van die roemryke mans en vroue van Frankryk nie, maar baie andere van beide Engeland en Duitsland; lande wat hy professioneel besoek het in 1827 en 1829. Hy het meer as 500 medaljes gemaak.

David se roem rus veral op sy beeldhouwerk vir die Panteon in Parys, sy Gewonde Philopoemen van marmer in die Louvre en sy ruitermonument vir Generaal Jacques- Nicolas Gobert in die Père-Lachaise-begraafplaas. Benewens dié van Gobert, het hy beeldhouwerke vir sewe ander grafte by Père-Lachaise ontwerp, insluitend die brons borsbeelde van die skrywer Honoré de Balzac en die geneesheer Samuel Hahnemann.

In die Musée David in Angers is 'n byna volledige versameling van sy werke (beide kopieë en oorspronklikes). As voorbeeld van sy welwillendheid kan genoem word dat hy hom na die siekbed van Rouget de Lisle, skrywer van die Marseillaise Himne, gehaas het, hom sonder versuim in marmer gemodelleer en gesny het, 'n lotery gemaak het van die werk, en die opbrengs daarvan onverwyld aan die digter, wat in die uiterste nood verkeer het, gestuur het.

Van Herlewing van Griekeland, sy monument vir die Griekse bevryder Markos Botsaris, wat 'n Griekse kind toon wat sy naam lees, het Victor Hugo gesê: "Dit is moeilik om iets mooier in die wêreld te sien; Hierdie standbeeld koppel die grootsheid van Phidias aan die uitdrukkingsvermoë van Puget."

Museums

• David d'Angers gallery, Musée des Beaux-Arts, Angers
• Musée Carnavalet, Parys
• Musée de la Vie romantique, Parys

Geselekteerde werke

• 
  Herlewing van Griekeland, sy monument aan die Griekse bevryder Markos Botsaris
• 
  Borsbeeld van Armand de Bricqueville, Cherbourg-Octeville
• 
  Standbeeld van Jean Bart in Duinkerken
• 
  Borsbeeld van Honoré de Balzac, cimetière du Père-Lachaise
• 
  Borsbeeld van Georges Cuvier, musée du Louvre
• 
  Portret van Honoré de Balzac
• 
  Standbeeld van David de Pury
• 
  Standbeeld van Xavier Bichat, Paryse Descartes-universiteit
• 
  Standbeeld van Gutenberg, Imprimerie nationale, Parys
• 
  Standbeeld van Thomas Jefferson, 1834, in die Rotunda van die VSA Kapitool
• 
  Graftombe van David d'Angers – Père Lachaise-begraafplaas
• 
  Die Musée David d'Angers, in die voormalige Toussaint Abdy, Angers

• Galery van Roemryke mans
• 
  George Washington (1828)
• 
  Gilbert du Motier de La Fayette (1828)
• 
  François-René de Chateaubriand (1829)
• 
  Johann Wolfgang von Goethe (1829)
• 
  Victor Hugo (1837)
• 
  Konstantinos Kanaris (1852)

Bronnelys

• Chisholm, Hugh (red.), "David, Pierre Jean", in: Encyclopædia Britannica 7 (11de uitg.), 1911. Drukpers van die Universiteit van Cambridge. bl. 862.

Eksterne skakels

• Werk van David in die Louvre by die webtuiste louvre.fr
• Werk van David in die Louvre by die webtuiste cartelfr.louvre.fr