Deon du Plessis
Ds. Gideon (Deon) du Plessis (8 Junie 1932 – 19 Augustus 2015) was predikant in vier gemeentes van die Gereformeerde Kerk, drie aan die Wes-Rand en een aan die Oos-Rand van Gauteng.
| Gideon du Plessis | |
| |
Ds. Deon du Plessis
| |
| Naam | Gideon du Plessis |
|---|---|
| Geboorte | 8 Junie 1932 |
| Sterfte | 19 Augustus 2015 (op 83) |
| Kerkverband | Gereformeerde Kerk |
| Gemeente(s) | Roodepoort, 1958–1966 Germiston, 1966–1973 Witpoortjie, 1973–1981 Wilropark, 1981–1997 |
| Jare aktief | 1958–1997 |
| Kweekskool | Potchefstroom |
Du Plessis het die grade B.A. en Th.B. op Potchefstroom verwerf en is daarna in 1958 in sy eerste gemeente, Roodepoort, bevestig, sowat ’n jaar nadat die gemeente van Florida afgestig het. In 1966 het hy ’n beroep na Germiston aangeneem en daar gebly tot in 1973 toe hy die eerste leraar word van die Gereformeerde kerk Witpoortjie, wat op 8 Oktober in die vorige jaar van Roodepoort afgestig het. In 1981 het hy ’n beroep aangeneem na Wilropark, wat in daardie jaar van Witpoortjie afgestig het. Daar sou hy bly tot hy sy emeritaat in 1997 aanvaar het.
Dr. Jan Venter skryf in ’n huldeblyk aan ds. Du Plessis in Die Kerkblad van November 2015: "Ds. Deon was ’n geliefde en gewaardeerde kollega. Hy het altyd groot erns met sy herderlike werk gemaak. Sy huisbesoek het hy getrou gedoen. Sy standpunt hieroor was duidelik: Hoe kan predikante wat nie huisbesoek doen nie, hulle lidmate ken? En hoe kan hulle die Skrif dan prakties toepas op die lewe van die lidmate?
"Sy prediking was suiwer Skrifprediking en deur en deur Christusprediking! In meerdere vergaderings het hy kosbare insette gelewer. In Klassis Wesrand (vroeër Klassis Krugersdorp) was hy ’n beminde en gerespekteerde predikant. In later jare was hy ’n 'vaderfiguur' wat baie goeie praktiese raad vir jong dominees kon gee."
In die laaste jare van sy lewe het sy gesondheid geleidelik agteruitgegaan. Sy vrou, Itje, het hom eers tuis versorg, maar eindelik moes hy in ’n versorgingseenheid opgeneem word. Ná ’n twee jaar lange lyding is hy in Augustus 2015 oorlede. Itje was 'n nooi Dijstra, suster van ds. Hessel Dijkstra.
Bronne
wysig- (af) Bain, R.A., Coetzee, P.A., Mosase, P.T., Mathundela, C.C. (et al.). Die Almanak van die Gereformeerde Kerke in Suid-Afrika vir die jaar 2017. Potchefstroom: Administratiewe Buro.
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.