Dr. Dionysius (Dion) Kempff (15 Julie 192212 Desember 2000) was van 1949 tot 1963 predikant in vier gemeentes van die Gereformeerde Kerk en daarna tot 1987 sowat 23 jaar lank redakteur van die Kerk se nuusblad Die Kerkblad.

Dr. Dion Kempff
Dr. Dion Kempff
Dr. Dion Kempff

Naam Dionysius Kempff
Geboorte 15 Julie 1922
Sterfte 12 Desember 2000 (op 78)
Kerkverband Gereformeerd
Gemeente(s) Sannieshof (1949–'53)
Salisbury (1953–'57)
Viljoenskroon (1957–'63)
Vereeniging-Oos (1963)
Jare aktief 1949–1987
Kweekskool Potchefstroom

Herkoms en opleiding wysig

 
Dion Kempff en sy aanstaande, Esther du Plessis, was skottelgoed op 'n uitstappie na die Vaalrivier in 1945. Hy staan op die oewer en sy regs van hom.

Kempff is in 'n sterk Christelike huis opgevoed en was van jongs af 'n knap student met 'n ondersoekende gees. Daarom het hy as skrander student en leier op die Puk ontluik. Hy het nie gehuiwer om die Gereformeerde leer as student te handhaaf nie. Onder prof. H.G. Stoker behaal hy die M.A. in filosofie en vertrek daarna na Nederland vir sy doktorale studie. Hoewel hy 'n alleenmens op universiteit was, kon hy tog die sprankelende Esther du Plessis se liefde wen en sy volg hom na Nederland, waar hulle getroud is. Hy behaal sy D.Theol. in Nederland.

Gemeentebediening wysig

Dr. Kempff is kort nadat hy sy studie in Nederland voltooi het in 1949 in die Gereformeerde kerk Sannieshof bevestig. Hy dien ongeveer vyf jaar in die gemeente voordat hy na Salisbury gaan om 'n baie groot gebied te bedien. Die mense van daardie wêreld tot in Karoi het altyd met groot lof van sy baanbrekerswerk in dié streek gepraat. Ná die vier jaar in Rhodesië is sy volgende gemeente Viljoenskroon, en daar werk hy byna ses jaar lank. Hy was skaars 'n jaar in Vereeniging-Oos toe hy redakteur van Die Kerkblad word. Dr Kemff was bekend vir sy liefde vir die predikantsbediening en hy het selfs in sy redakteursdae hulpdiens in Potchefstroom-Suid gedoen. Hy was, volgens prof. B.J. de Klerk in sy lewensberig in die Almanak van 2002, "'n lerende prediker met 'n skerp insig in die Skrif en belydenis".

Redakteur wysig

 
Dr. Dion en mev. Esther Kempff.
 
Proff. S. du Toit, C.J.H. de Wet en J.D. Toit by die studente aan die Teologiese Skool Potchefstroom, 1944. Die studente en professore aan die Teologiese Skool Potchefstroom, 1944. Agter: S.P. du Plessis, P.W. Buys, M.J.P. Olivier (van die NG Kerk), C. Hattingh, G.P. Scheepers en Tjaart Steyn. Middel: G.P.L. van der Linde, proff. Fanus du Toit, Casparus de Wet en Totius, en K. van Wyk de Vries. Voor: D. Kempff, J.C. Kruger en M.J. Booysen.

Dr. De Klerk skryf dr. Kemp "het met durf en volharding sy roeping nagekom om 'n behoudende, nugter en toekomsgerigte boodskap op skrif te stel. Die mate waarop hy menings gevorm het, kan nie bepaal word nie, maar baie van dit waarvoor hy gepleit en gestry het, het reeds werklikheid geword." Hy was eintlik preedikant vir al die lesers van Die Kerkblad (destyds was daar byna 14 000); daarom was daar uiteenlopende menings oor sy boodskap en die gesindheid wat hy met die blad uitgestraal het. "Hy het respek afgedwing sonder om meerderwaardig te wees, reguit maar sonder venyn, altyd gereed met goeie raad en advies. Soos 'n vader het hy wyse raad uitgedeel. Kwinkslae en grappies was daar genoeg."

Waardering wysig

Dr. Kempff het sy vrou langer as 30 jaar bygestaan in 'n siekte en kruis wat sy moes dra. Dr. De Klerk skryf: "Miskien was sy grootste lewensvrug nie die talle geskrifte (soos artikels en boeke) wat uit sy pen verskyn het nie. Ook nie die indeksering van Calvyn se werke, Kerkblad-artikels en die deeglike taalkundige versorging van sinodes se agendas en handelinge nie. Dit is eerder sy liefde, geduld, lewensblydskap, selfbeheersing en diep geloof waarmee hy sy lewensmaat bygestaan het."

Dr. Kempff was in sy laaste lewensjare alleen, maar nog wakker van gees, op die hoogte van gebeure en ’n raadgewer en vriend vir baie. In die ouderdom van 78 het hy rustig ontslaap.

Bronne wysig

  • (af) De Klerk, dr. B.J. in Schalekamp, ds. M.E. et al. 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.