Gereformeerde kerk Vereeniging-Oos
Die Gereformeerde kerk Vereeniging-Oos was een van drie Afrikaanse gemeentes van die Gereformeerde Kerke in Suid-Afrika wat tussen 1927 en 1982 in Vereeniging in die Vaaldriehoek tot stand gekom het. In 1995 het die oudste gemeente, Vereeniging, met Vereeniging-Noord, die jongste gemeente, saamgesmelt as Vereeniging '95, maar nadat laasgenoemde se sieletal tot net sowat 200 afgeneem het, het Vereeniging '95 en Vereeniging-Oos in 2014 saamgesmelt onder die oorspronklike naam Vereeniging. Dié gemeente gebruik die ou Oos-gemeente se kerkgebou op die hoek van Thames- en Tayrylaan, Drie Riviere.
Die Gereformeerde kerk Vereeniging-Oos het op 5 Mei 1963 uit wyke van die Gereformeerde kerk Vereeniging afgestig en heel gou aan ’n eie kerkgebou begin beplan. C.P. Geldenhuys is as argitek aangestel en Allie Smit as bouaannemer. Omdat die gebou op turfgrond opgerig is, word sy hoeke op pilare gestut, waarvan die diepte ongeveer 10 m onder die grond is. Die kerkgebou van die ou Gereformeerde kerk Vereeniging op die hoek van Bothastraat en Greylaan, waarvan die hoeksteen op 3 Desember 1949 gelê is, het soortgelyke uitdagings opgelewer. Voor die bouery kon begin, moes die fondamente verstewig word in die potkleistruktuur van die grond. Die gebou moes op 30 pilare rus wat staangemaak is in gate, wat in die grond geboor is. Dié pilare is tot 14 m diep. Omdat die turfagtige struktuur van die grond in Vereeniging die geboue so erg laat bars, is hierdie gate geboor totdat vaste grond gevind is, waarop die pilare staan, nes die geval met Vereeniging-Oos se kerkgebou.
Die nuwe kerk is op 28 September 1968 in gebruik geneem. Dit het besonderse akoestiek en is geskik vir musiekuitvoerings. Die pyporrel is vervaardig deur Fehrle & Kie.
Vereeniging-Oos het in 1997 481 belydende en 202 dooplidmate gehad; dus ’n sieletal van 683. In daardie jaar het Vereeniging '95 se belydende lidmate 409 getel en die dooplidmate 128 vir ’n sieletal van 537. Hierna het Vereeniging-Oos se belydende lidmate tot in 2013 afgeneem tot 362 en die dooplidmate tot 78, terwyl Vereeniging '95 gekrimp het tot 185 belydende en 30 dooplidmate. Die saamgestelde gemeente het met sy stigting in 2014 487 belydende en 70 dooplidmate gehad, maar in 2015 onderskeidelik 418 en 53.
Predikante
wysig- Kempff, dr. Dionysius, 1963
- De Bruyn, dr. Paulus Jacobus, 1964 – 1970
- Linde, Philippus Jacobus Wilhelmus, 1971 – 1976
- Coetzer, Andries Lodewikus (Dries), 1976 – 2005 (aanvaar sy emeritaat)
- Vogel, Gert Marthinus, 1997 (in kombinasie met Vereeniging ’95, waarna daardie gemeente tot dood sy op 12 Desember 2003)
- Van Blerk, Petrus Johannes, 2005 – 2007
- Goede, dr. Hendrik, 2008 – 2014 (waarna Vereeniging tot 2015)
Bronne
wysig- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
- (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
- (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.