Driekie Booysen
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Salome Frederika (Driekie) Booysen (née Van der Walt, distrik Steynsburg, Kaapkolonie, 20 September 1887 – onbekend) was een van die vroegste lidmate van die Gereformeerde kerk Johannesburg (Fordsburg).
Driekie van der Walt was ’n kleindogter van Hendrik Bernardus van der Walt, in 1872 een van die stigters van die Gereformeerde kerk Steynsburg wat ook die kerkklok geskenk het wat dekades later nog in gebruik is. Haar grootvader aan moederskant was meester Clemens Rose, wat in 1840 uit Oostenryk na Suid-Afrika geëmigreer het nadat hy die Protestantse geloof aangeneem het. In die Kolonie het hy weldra by die Gereformeerde Kerk aangesluit en in die distrikte Steynsburg, Dordrecht, Burgersdorp en Middelburg, Kaap, onderwys gegee.
Driekie en haar gesin het in 1895 vanaf die Noordoos-Kaap na Johannesburg verhuis. As sewejarige kind het sy die Jameson-inval en die groot diamantontploffing beleef. Tydens die Driejarige Oorlog het die gesin swaar tye deurgemaak sodat Driekie reeds op 13-jarige leeftyd moes gaan werk teen een shieling per week. In 1903 het sy in die ou saaltjie van die Gereformeerde kerk Johannesburg in Mintweg, Fordsburg, belydenis van geloof afgelê. Tydens die Rebellie van 1914 het Driekie en haar niggie die gewonde rebelle in die hospitaal besoek. In die ou Fort in Johannesburg het hulle vir genl. C.R. de Wet en ander gevangenes geregte en nuus van die buitewêreld gebring.
In 1917, toe sy nagenoeg 30 jaar oud was, is sy met Marthinus Booysen getroud. Selfs tot op hoë leeftyd was sy nog altyd aan haar kerk se sustersorganisasies verbonde. Sy was een van die getroue en ywerige lede van die Dorkas- en Trifena-verenigings van die Gereformeerde kerk Johannesburg-Oos. Sy het ’n tapytefonds begin deur jare lank verversings met kerkraadsvergaderings te verkoop. Volgens Ida Bosman in die gedenkboek Die Gereformeerde Vrou 1859–1959 was Driekie Booysen "’n goeie kleremaakster en ’n uitstekende bakster".
Bron wysig
- (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.