Edgar Adeling
Edgar Adeling (c. 1051–1126) was die laaste Angel-Saksiese koning van Engeland voor die Normandiese verowering in 1066. Hy is in Oktober 1066 uitgeroep as koning Edgar II, maar is nooit gekroon nie. Ná agt weke moes hy die troon afstaan aan Willem die Veroweraar.
| Edgar Adeling | |
|---|---|
| Koning van Engeland | |
 | |
| Huis | Wessex |
| Regeer | 15 Oktober – 10 Desember 1066 |
| Voorganger | Harold Godwinson |
| Opvolger | Willem die Veroweraar |
| Gebore | c. 1051; Hongarye |
| Oorlede | 1126 |
| Vader | Eduard die Banneling |
| Moeder | Agatha |
Die benaming Adeling (Engels: Ætheling of Adeling, Angel-Saksies: Æþeling) is deur Angel-Saksiese prinse gebruik wat van koning Ethelred II afgestam het en dus kandidate was vir die troon van Engeland.
Vroeë lewe wysig
Edgar is waarskynlik in Hongarye gebore. Hy was die seun van Eduard die Banneling (die seun van koning Edmund Ironside) en Agatha, oor wie min bekend is.
In 1056 het koning Eduard die Belyer sy neef Eduard die Banneling uit Hongarye teruggeroep na Engeland en hom as sy erfgenaam benoem. Eduard die Banneling is egter kort daarna dood en sy seun Edgar is as troonopvolger gekies.
Omdat hy maar 14 jaar oud was en in die buiteland gebore is, het hy nie die troon geërf ná Eduard die Belyer se dood nie, maar het dit in 1066 gegaan na Harold Godwinson nadat dié beweer het dat Eduard die troon aan hom nagelaat het. Harold is by die Slag van Hastings deur die Normandiërs onder Willem die Veroweraar verslaan en is op die slagveld dood.
Bewind wysig
Edgar is toe as koning uitgeroep, maar ná ’n bewind van sowat agt weke is hy van die troon gesit en het Willem, wat beweer het dat die troon aan hóm nagelaat is, koning geword. Hy is op 25 Desember 1066 gekroon.
Latere lewe wysig
In 1068 het Edgar die hof van Willem verlaat en saam met sy ma en suster na Skotland gereis. Die jaar daarna het hy aan ’n Angel-Saksiese opstand teen Willem deelgeneem. Dit het egter misluk en Edgar moes na Skotland vlug. In 1069 het Edgar Engeland weer binnegeval saam met die Deense koning Sven Estridsen. Nadat hulle die stad York verower het, het Sven egter omkoopgeld van Willem aanvaar en hom uit Engeland teruggetrek. Edgar moes weer eens na Skotland vlug.
Willem het Skotland in 1074 binnegeval en die Skotse koning Malcolm gedwing om ’n vredesverdag te sluit, waarvolgens Edgar uit Skotland verban is. Hy het na Vlaandere gevlug, maar het later daardie jaar teruggekeer nadat Willem Sotland verlaat het. Malcolm het Edgar oortuig om vrede met Willem te sluit en Edgar het toe na Normandië gereis en daar vergifnis van Willem gekry. Hy het Normandië weer in 1086 verlaat.
In 1097 het hy ’n Engelse leër gelei teen koning Donald III van Skotland en sy aangewese troonopvolger, Edmund I. Edgar het Donald en Edmund verslaan en so sy neef Edgar gehelp om koning van Skotland te word.
Hy was by verskeie ander aanvalle in Europa betrokke voor hy na sy landgoed in Hertfordshire, Engeland, teruggekeer het. Hy is in 1126 op sowat 75-jarige leeftyd dood.
Bronne wysig
Verwysings wysig
- Hierdie artikel is merendeels vertaal vanaf die Nederlandse Wikipedia-artikel nl:Edgar Ætheling