Georgiese Rugbyunie
Die Georgiese Rugbyunie (Georgies: საქართველოს რაგბის კავშირი, Sakartwelos ragbis kawsjiri, afgekort “GRU”) is die bestuursliggaam wat rugby en sewesrugby in Georgië beheer. Die beheerliggaam is in 1964 gestig en in Tbilisi gesetel. Sedert 1992 verteenwoordig dit Georgië by Wêreldrugby en ook by Rugby Europa (“RE”).
| Georgiese Rugbyunie | |
|---|---|
 Kenteken van die Georgiese Rugbyunie
| |
| Georgiese naam | საქართველოს რაგბის კავშირი, Sakartwelos ragbis kawsjiri |
| Afkorting | GRU |
| Land |  Georgië
|
| Sportsoorte | Rugby, Sewesrugby |
| Stigting | 1964 |
| Lid van | Wêreldrugby |
| Aangesluit in | 1992 |
| Vastelandse beheerliggaam | Rugby Europa |
| President | Soso Tkemaladse |
| Setel | Tbilisi, Georgië |
| Amptelike taal | Georgies |
| Amptelike webwerf | rugby.ge |
Geskiedenis
wysigDie Georgiese Rugbyunie is in 1964 gestig en het in 1992 by die Internasionale Rugbyvoetbalraad (IRVR, nou Wêreldrugby) aangesluit.[1] Daarbenewens het die Georgiese Rugbyunie in dieselfde jaar ’n lid van die vastelandse beheerliggaam Fédération internationale de rugby amateur (FIRA, nou Rugby Europa) geword.[2]
Taak
wysigDie Georgiese Rugbyunie organiseer verskeie nasionale spanne, insluitend Georgië se nasionale seniorrugbyspan vir mans (die Lelos), vroue en jeug. Die GRU hou ook toesig oor sewesrugby in Georgië en aangesien dit ’n Olimpiese sportsoort is, werk hulle met die Georgiese Nasionale Olimpiese Komitee saam. Naas die amptelike nasionale span roep die GRU ook ander keurspanne byeen. Georgia XV is die tweede nasionale span van Georgië. Die Georgia Sevens is die Georgiese sewesrugbyspan en hulle neem aan internasionale toernooie soos Wêreldrugby se Sewesreeks, Sewesrugbywêreldbeker en Olimpiese Somerspele deel. Daarbenewens bestuur die beheerliggaam kinder- en jeugrugby in Georgië. Kinders en jongmense word veral in klubs aan rugby bekend gestel, terwyl skoolsport minder belangrik is.[3] Net soos ander rugbylande beskik Georgië oor ’n o/20-nasionale span wat aan die Europese en Wêreldrugby o/20-kampioenskap deelneem.[4]
Die beheerliggaam reël ook die plaaslike kompetisies. Die hoogste rugbyliga in Georgië is die halfprofessionele Didi 10 (“die groot tien”), waaraan tien spanne deelneem. Weens die beter finansiële moontlikhede verkies baie spelers egter ’n loopbaan by ’n klub in Frankryk of ’n ander Wes-Europese land. Die meeste nasionale spelers wat nie by ’n Wes-Europese klub betrokke is nie, speel vir die professionele span Black Lion wat sedert 2021 aan die Rugby Europa Superbeker deelneem.
Kenteken
wysigDie Georgiese Rugbyunie se kenteken toon die Bordsjghali, ’n ou Georgiese embleem van die son met sewe vleuels. Van dié tradisionele simbool is een bynaam vir die nasionale span ontleen: Bordsjghalosnebi (“mans van die son”).[5]
Verwysings
wysig- ↑ (en) "Georgia". Wêreldrugby. Besoek op 29 Maart 2024.
- ↑ (en) "Rugby Europe Members". Rugby Europa. Besoek op 29 Maart 2024.
- ↑ (en) "The remarkable rise of rugby in Georgia, where players bleed for their country and have Wales in their sights". Wales Online. 17 November 2017. Besoek op 29 Maart 2024.
- ↑ (en) "World Rugby U20 Championship". Wêreldrugby. Besoek op 29 Maart 2024.
- ↑ (fr) Armand du Payrat (2000). Album des pavillons nationaux et des marques distinctives / National flags and distinctive markings. Brest: S.H.O.M. (Service hydrographique et océanographique de la marine). p. 238. ISBN 2-11-088247-6.
Eksterne skakels
wysig- (ka) Amptelike webwerf