Gereformeerde kerk Krugersdorp-Wes

Die Gereformeerde kerk Krugersdorp-Wes is die derde jongste gemeente in die GKSA se Klassis Wesrand en een van drie Afrikaanse gemeentes wat tussen 1896 (die moedergemeente) en 1978 (Krugersdorp-Oos) op die Wes-Randse dorp Krugersdorp gestig is.

Dr. C.J. Malan, van 1955 tot 1958 die eerste leraar.

Die Gereformeerde kerk Krugersdorp-Wes is op 28 Oktober 1972 in gebruik geneem.

Ds. M.W. van der Walt, die leraar van 1958 tot 1966.

Dr. Kobus van Tonder, leraar van 1990 tot 2010.

Van Januarie 1950 af het die westelike wyke van die gemeente Krugersdorp afsonderlike eredienste in ’n saal in Krugersdorp-Wes gehou. Dié wyke was Krugersdorp-Wes, Wes-Rand Cons, Magaliesburg, Vlakplaas en Burgershoop. In Mei 1950 kon hulle ’n eie kerksaal op die hoek van Flemming- en Fisherstraat in gebruik neem en drie en ’n half jaar later, op 7 November 1953, het die gemeente Krugersdorp-Wes amptelik afgestig.

Die kerksaal in Krugersdorp-Wes is toe verkoop en ’n tyd lank is eredienste in die saal van die Afrikaansmediumskool Krugersdorp-Wes (KWAM) gehou. Intussen is die kerkgebou opgerig en op 28 Oktober 1972 in gebruik geneem. Die argitek was Nardus Conradie. S.A. Orrelbouers het die orrel gebou wat agterin die kerk geplaas is. Die vensters is so ontwerp dat al die lig na die preekstoel val.

Krugersdorp-Wes het in 2001 'n sieletal van 316 gehad, Krugersdorp-Oos 448 en Krugersdorp 712. Tog was dit die Oos-gemeente wat in 2011 ontbind en wie se lidmate by Krugersdorp ingeskakel het. Kort daarna het Krugersdorp 985 siele getel en die Wes-gemeente 256. Einde 2015 was die moedergemeente se sieletal 840 en die Wes-gemeente s’n 213.

Predikante

1. Malan, dr. Christiaan Jacobus, 1955 – 1958
2. Van der Walt, Marthinus Wessel, 1958 – 1966
3. Venter, Jan Hendrik, 1966 – 1984
4. Nel, Petrus Johannes, 1984 – 1990
5. Van Tonder, dr. Jacobus Machiel, 1990 – 2010 (aanvaar sy emeritaat)
6. Vakant, 2010 – 2018
7. Van Jaarsveld, J.P.L. (Vickus, 2018 – hede (in kombinasie met Magaliesburg)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.