Gereformeerde kerk Phalaborwa

Die Gereformeerde kerk Phalaborwa is die tiende oudste van die 25 gemeentes in die GKSA se Klassis Limpopo. In 2015 was hier 144 belydende en 17 dooplidmate, vergeleke met 241 en 119 in 2001.

Gereformeerde kerk Phalaborwa
Sluit in	Grietjie-plotte JCI Mica Letsitele Krugerwildtuin (deels) Phalaborwa
Klassis	Limpopo
Huidige predikant(e)	Franscois Pretorius
Belydende lidmate	128
Dooplidmate	22
Adres	Bowlerstraat 4 Phalaborwa
Geskiedenis
Stigtingsdatum	7 Maart 1964
Afgestig van	Laeveld
Eerste predikant	A.Z. Pelser 1964–1970

Ds. A.Z. Pelser, leraar van 1964 tot 1970.

Tot in 1964 was al die Gereformeerdes wat op Phalaborwa in die huidige provinsie Limpopo gewoon het, lidmate van die Gereformeerde kerk Laeveld met sy kerkgebou op Tzaneen. Dié gemeente het in 1960 ’n sieletal van 372 gehad van wie amper 46 persent dooplidmate was. Al om die ses weke het ds. P. du Plessis ’n erediens op Phalaborwa gehou. Die kerkraad van Laeveld het toestemming verleen dat die sakramente op Phalaborwa bedien word. Die eredienste is in die saaltjie van die Groenskool gehou. Tussendeur is ’n leesdiens elke Sondag gehou, wat voortgegaan het selfs nadat Phalaborwa afgestig het.

Die Gereformeerde kerk Phalaborwa is op 7 Maart 1964 in die saal van die ou munisipale gebou gestig onder voorsitterskap van ds. P. du Plessis. Die afgevaardigde van die Klassis Waterberg was ds. Johan van Ryssen van die Gereformeerde kerk Potgietersrus. Tydens die stigting is die gemeente in 10 wyke verdeel en die grense vasgestel: die gebied suid van die Letabarivier en oos van Gravelotte tot teenaan die Olifantsrivier. Verder was ook die hele gebied suid van die Olifantsrivier tussen die berg en die Krugerwildtuin en tot teenaan die tuislande aan die suide ook deel van die gemeente. Ook lidmate in die wildtuin noord van die Olifantsrivier staan onder bearbeiding van die nuwe gemeente.

Mettertyd het die lidmate so toegeneem dat die saaltjie te klein geword het. Dienste is toe verskuif na die saal van die Hoërskool Frans du Toit. Onder leiding van ds. R.J. du Plessis, die leraar van 1970 tot '76, is die kerkgebou en pastorie voltooi. Foskor het die kerkperseel teen ’n billike prys aangebied. Die argitek van die kerkgebou was Otto Verhoef en die staalstruktuur is opgerig deur Genrec. Die saal se bouaannemer was Dirk Engelbrecht.

Onder leiding van ds. Du Plessis se opvolger, ds. S.J. van der Westhuizen, die leraar tot 1986, is die kerksaal met kombuis en katkisasielokale voltooi.

Predikante

1. Pelser, Abraham Zacharias, 1964 – 1970
2. Du Plessis, Roelof Jacobus Petrus, 1970 – 1976
3. Van der Westhuizen, Stephanus Jacobus, 1976 – 1986 (verlaat die bediening)
4. De Beer, Hendrik Johannes Petrus, 1986 – 1990
5. Enslin, Gert Botha, 1990 – 1997
6. Van der Walt, dr. Petrus Christoffel, 1998 – 2005
7. Makungo, Ntshengedzeni Robert, 2005 – 2008 (met sendingopdrag)
8. Nagel, Cornelius Johannes, 2006 – 2009
9. Correia, Derick Victor, 2010 – 2013
10. Pretorius, Franscois Renier, 2015 – hede

Bronne

• Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.