Gereformeerde kerk Vanderbijlpark-Suid

Die Gereformeerde kerk Vanderbijlpark-Suid was een van vier gemeentes van die GKSA wat tussen 1951 en 1988 op die nywerheidsdorp Vanderbijlpark in die suide van die huidige provisie Gauteng gestig is.

Die ou Gereformeerde kerk Vanderbijlpark-Suid, later Rhema Ministries, maar in 2015 gesloop.

Ds. J.S. (Koos) du Plooy, leraar van 1963 tot 1966. Dié foto is geneem omstreeks die tyd dat hy verkies is tot adjunkvoorsitter van die studenteraad van die PU vir CHO.

Ds. H.B. van der Walt as student in 1961. Hy was die leraar alhier van 1967 tot 1971.

Die sloping van die kerkgebou, waar agterna 'n Spur-gesinsrestaurant gebou is.

Die afbreek van die kerkgebou.

Die slopery vorder.

Weens die afname in die getal Gereformeerde lidmate op die dorp (in 1997 was die sieletal byvoorbeeld 1 778, vergeleke met 852 einde 2015), is al vier die gemeentes mettertyd ingelyf sodat net Vanderbijlpark-Trinitas, gestig in 2009, oorbly. Die Gereformeerde kerk Vanderbijlpark het in 1951 van die Gereformeerde kerk Vereeniging afgestig nadat ’n staalnywerheid hier gevestig is. In Mei 1962 het dit nodig geword om Vanderbijlpark-Suid af te stig en uit dié gemeente het die Gereformeerde kerk Vanderbijlpark-Oos op 9 Junie 1974 ontstaan. Veertien jaar later het die gemeente Vanderbijlpark-Noord aan die beurt gekom.

Nadat Vanderbijlpark en Vanderbijlpark-Noord se lidmate skerp afgeneem het, het die twee gemeentes in 2000 saamgesmelt as die Gereformeerde kerk Vanderbijl met 256 belydende en 66 dooplidmate. Toe nog het die Suid-gemeente ’n sieletal van 445 gehad en die Oos-gemeente 788. Algaande het die drie oorblywende gemeentes se lidmaattal egter bly afneem sodat al drie in 2009 saamgesmelt het as die Gereformeerde kerk Vanderbijlpark-Trinitas. Daar was destyds en jare daarna groot ontevredenheid oor die verkoop en sloping van die Suid-kerk, in wie se plek 'n Spur gebou is.

Die Gereformeerde kerk Vanderbijlpark-Suid het in Mei 1962 van die gemeente Vanderbijlpark afgestig wat twee jaar vantevore reeds 710 belydende en 480 dooplidmate gehad het. Aan die begin is eredienste in ’n skoolsaal gehou, maar die gemeente het dadelik ’n boufonds gestig. Einde 1966 is begin met bouwerk aan die kerkgebou, wat die jaar daarna in gebruik geneem is. In 1975 is ’n groot orrel in gebruik geneem. Dié gebou het na 2009 Rhema Ministries geword omdat Vanderbijlpark-Trinitas die ou Oos-gemeente se kerkgebou gebruik.

Predikante

1. Du Plooy, Jacobus Stephanus, 1963 – 1966
2. Van der Walt, Hendrik Bernardus, 1967 – 1971
3. Smit, Erasmus Johannes, 1972 – 1977
4. Van der Walt, Louis Jacobus ("Kobie"), 1977 – 2007 (aanvaar sy emeritaat)
5. Smit, dr. Erasmus Johannes, 2007 – 2009 (waarna Vanderbijlpark-Trinitas tot 2013)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.

Sien ook

• NG gemeente Vanderbijlpark-Suid