Hardapdam
Hardapdam is 'n dam naby Mariental in die Hardap-streek in sentraal-Namibië. Die Hardapdam, wat in 1963 gebou is terwyl Namibië onder Suid-Afrikaanse bewind was, is die grootste dam in die land. Die reservoir dam die Visrivier op en is die tuiste van talle wildspesies van Namibië.
| Hardapdam | |
|---|---|
 Hardapdam teen sonsopkoms in April 2008
| |
| Amptelike naam | Hardapdam |
| Ligging | Mariental 260 km suid van Windhoek |
| Provinsie/Land | Hardap-streek, Namibië |
| Koördinate | 24°29′58″S 17°51′31″O / 24.49944°S 17.85861°O |
| Dam in | Visrivier |
| Doel | Opgaardam |
| Konstruksie begin | 1960 |
| Openingsdatum | 1963 |
| Kapasiteit | 320 miljoen m3 |
| Damoppervlak | 25 km2 |
Beskrywing
wysigDie Hardapdam, wat sedert 1897 in die vooruitsig gestel is, is Namibië se grootste dam met 'n kapasiteit van 320 miljoen kubieke meter en 'n oppervlakte van 25 km2 (2 500 ha). Bouwerk het in 1960 begin en is in 1963 voltooi,[1] die derde grootste dam in die destydse Unie van Suid-Afrika.
Die Hardapdam voorsien Mariental en die omliggende nedersettings van drinkwater. Die ligging naby die stad hou egter ook 'n gevaar in om dit te oorstroom wanneer die sluise heeltemal oopgemaak moet word weens goeie reën in die Visrivier se opvanggebied. Rietgrasse wat in die Visrivierbedding groei, vertraag die vloei van water en verhoog die gevaar van oorstromings verder.[2]
Voor die dam gebou is, is Mariental in 1923 en 1934 oorstroom. Oorstromings ná die ingebruikneming van die dam het in 1972, 1974, 1976, 2000 en 2006 plaasgevind. Sedertdien word die dam se watervlak op 'n maksimum van 70% van sy kapasiteit gehou om sowel 'n oorloop as 'n onbeheerde uitvloei deur volledig oopgemaakte sluise te voorkom.[2]
Etimologie
wysigDie naam "Hardap" kom van 'n Namawoord wat "knoppie" of "puisie" beteken, weens die lae koniese koppies wat in die omgewing te vinde is.
Daar is verskeie hengelplekke aan die noorderoewer van die dam. Permitte, en 'n kaart van toegelate hengelareas, is by die oord se kantoor beskikbaar.
Fauna en flora
wysigDie gebied is die tuiste van die swartrenoster,[1] gemsbokke, Hartmannse bergsebra, koedoes, volstruise, springbokke en steenbokke. [3] Daar is ook 'n groot verskeidenheid voëlspesies wat in en om die dam waargeneem kan word. Witpelikane, kormorante, slanghalsvoëls en lepelbekke kan op die meer gesien word, asook visarende en 'n paar visvalke.[1]
Die plantegroei in die gebied word as dwergstruik-savanne geklassifiseer. Die volgende bome kom voor: kameeldoring, wildegroenhaarboom en buffeldoring. [4]
Toerisme
wysigNá opknappings oor 'n tydperk van vier jaar onderneem is,[3] is die dam se ontspanningsterreine in 2016 heropen. Aktiwiteite by die dam sluit swem, visvang en voëlkyk in. Daar is 'n restaurant en 'n winkel.[1]
-
Steenbok -
-
Tak en loof van 'n stinkwitgat -
Sien ook
wysigVerwysings
wysig- ↑ 1,0 1,1 1,2 1,3 "Hardap Resort". Namibian Wildlife Resorts. Besoek op 21 Februarie 2017.
- ↑ 2,0 2,1 Cloete, Luqman (21 Februarie 2017). "NamWater opens Hardap Dam sluices". The Namibian. p. 1. (Full information only in the print version)
- ↑ 3,0 3,1 "Namibia 1on1: Mariental".
- ↑ "NambiWeb".