Jacques Dusseau & Co

Jacques Dusseau & Co. was ’n Amsterdamse uitgewery en boekhandelaar wat in Mei 1894 ’n tak in Kaapstad geopen het op aandrang van die Nederduitse Gereformeerde Kerk met die doel om godsdienstige publikasies in Suid-Afrika te versprei.

HAUM se winkel en kantoor in Kerkstraat, Kaapstad, vroeë 20ste eeu.

Die firma J.H. de Bussy, waarvan Jacques Dusseau deel was, se kenteken soos dit in 1938 verskyn het op die rugkant van dr. A.C. Bouman se Kuns in Suid-Afrika.

Die FAK Sangbundel (1937) was een van die firma se groot projekte. Op die titel blad staan: "Uitgegee deur Firma J.H. de Bussy – Pretoria. H.A.U.M. v/h. Jacques Dusseau & Co. – Kaapstad".

Titelbad van Concordantie, in 1902 uitgegee deur HAUM v/h. Jacques Dusseau & Co.

Die eerste bestuurders was die broers Fellema. Van die maatskappy se belangrike publikasies was onder meer die werke van ds. Andrew Murray, P. Huet se Afrikaansche gedichten (1867; sesde uitgawe 1894) en C.W.H. van der Post se Ignas Prinsloo of volharding bekroond (1899).

In 1896 het ds. Adriaan Moorrees, Marinus Stucki, ds. P.J.G. de Vos en andere Ons Tijdschrift begin. Hierdie voortreflike tydskrif het tot 1901 verskyn. J.F. van Oordt (D'Arbez), een van sy getrouste medewerkers, was die firma se amptelike skrywer. Hy was verantwoordelik vir Zuid-Afrikaansche Historie-Bibliotheek wat uit ’n kultuur-historiese oogpunt en vanweë die rol wat dit gespeel het om trots in die nasionale verlede aan te wakker, veral belangrik is.

In 1898 het die maatskappy geldelike probleme ervaar en is dit oorgeneem deur die Amsterdamse firma J.H. de Bussy, wat drie jaar vantevore ’n tak in Pretoria geopen het. De Bussy het aan hou om die Kaapse tak van Jacques Dusseau & Co te bestuur en wel onder die naam Hollandsch-Afrikaansche Uitgevers-Maatschappij (HAUM).

Bronne

• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).