KV19
KV19 is 'n grafkelder in die Vallei van die Konings by Thebe, naby die moderne stad Luxor in Egipte. Dit was bedoel as 'n graf vir prins Ramses Setherchepsjef, beter bekend as farao Ramses VIII, maar is later gebruik vir die begrafnis van prins Mentoeherchepsjef, die seun van Ramses IX, wat voor sy vader oorlede is. Hoewel dit onvoltooi is, word die versiering beskou as van die hoogste gehalte.
| KV19 | ||
| Grafkelder van Mentoeherchepsjef | ||
.jpg)
| ||
| Prins Mentoeherchepsjef bring 'n offerande aan Banebdjed in KV19. | ||
| Ligging | Vallei van die Konings | |
| Land |  Egipte
| |
| Ontdek | 1817 | |
| Uitgrawings deur | Giovanni Belzoni (1817) Edward R. Ayrton (1906) | |
| Versiering | Dodeboek (dele) | |
← Vorige KV18 Volgende →
KV20 | ||
Ligging en uitleg
wysig
Die grafkelder is geleë onder die rotse aan die oostekant van die Vallei van die Konings, tussen die grafkelders van Toetmoses IV (KV43) en Hatsjepsoet (KV20).[1]
Die eenvoudige uitleg bestaan uit 'n enkele gang. Uitgrawings het pas aan 'n tweede gang begin toe werk beëindig is.[2] Aan die einde van die gang is 'n langwerpige skag gegrawe om die mummie te begrawe. Die styl en uitleg kom uit die 20ste Dinastie.[1]
Die ligging van die grafkelder en grootte van die gang dui aan dit was vir 'n koning bedoel. Spore van 'n oorspronklike inskripsie onthul egter dit was vir Ramses VIII bedoel toe hy nog 'n prins was.[2]
Ontdekking en uitgrawings
wysig
Die grafkelder is op 9 Oktober 1817 deur Giovanni Belzoni herontdek. Hy het dit beskryf en spesiale melding van die dekor gemaak: "Die geverfde figure teen die mure is so perfek, dit is die beste aangepas van eniges wat ek al gesien het en gee dus 'n korrekte en duidelike idee van die Egiptiese smaak.[3]
In 1903 het Howard Carter die voorkant van die grafkelder uitgegrawe en KV60 ontdek.[4] Uitgrawings is in 1906 deur Edward R. Ayrton gedoen. Hy skryf in sy verslag die grafkelder is nooit heeltemal skoongemaak nie. Dit was halfvol groot blokke. Min draagbare voorwerpe is ontdek. Die begrafnisput het gebreekte potte en die boonste deel van 'n mummie bevat.[1] Vroeëre besoekers het gevind daar was latere begrafnisse uit die 22ste Dinastie in die grafkelder.[5]
Versiering
wysigDie buitenste oppervlakke van die grafkelder is gepleister en onversier. Die buitekant van die deurkosyne bevat net rof gesnyde hiërogliewe aan hulle onderkant. Aan die binnekant is die kosyne heeltemal bedek met drie kolomme swart hiërogliewe; op elk is aan die onderkant twee kobras wat hulle koppe oplig en vuur spoeg. Dié aan die regterkant word Isis en Nephthys genoem, en dié aan die linkerkant Serket en Neith.[1]
Weerskante van die ingang is twee helftes van 'n deur geverf. Op die linkerkant is die Hiëratiese teks van hoofstuk 139 van die Dodeboek en op die regterkant hoofstuk 123 met twee ekstra reëls. Teen elke kant van die gang is sewe tonele; die plafon is wit.[1]
Mentoeherchepsjef word teen die linkerkantse muur uitgebeeld waar hy offerande bring aan Osiris, Ptah-Tatenen, Chonsemweset-Neferhotep, Bastet, Imseti, Kebehsenoeëf en Amoen-Ra; teen die regterkantse muur bring hy offerandes aan Ptah, Thoth, Banebdjedet, Hapi, Doeamoetef, Meretseger en Sechmet.[1][6] As 'n volwasse seun verskyn Mentoeherchepsjef alleen voor die gode, in plaas daarvan om van sy vader vergesel te word.[2]
Verwysings
wysig- ↑ 1,0 1,1 1,2 1,3 1,4 1,5 Davis, Theodore M.; Maspero, Gaston; Ayrton, Edward; Daressy, George; Jones, E. Harold (1908). The Tomb of Siptah; The Monkey Tomb and the Gold Tomb (PDF). London: Archibald Constable and Co., Ltd. pp. 20–31. Besoek op 2 Desember 2020.
- ↑ 2,0 2,1 2,2 Reeves, Nicholas; Wilkinson, Richard H. (2010). The Complete Valley of the Kings: Tombs and Treasures of Egypt's Greatest Pharaohs. Londen: Thames & Hudson Ltd. pp. 170–171. ISBN 978-0-500-28403-2.
- ↑ Belzoni, Giovanni Battista; Belzoni, Mrs (Sarah) (1820). Narrative of the Operations and Recent Discoveries within the Pyramids, temples, tombs, and excavations, in Egypt and Nubia; and of a journey to the coast of the Red Sea, in search of the ancient Berenice, and of another to the oasis of Jupiter Ammon. Londen: J. Murray. p. 227.
- ↑ Carter, Howard (1903). "Report of Work Done in Upper Egypt (1902–1903)". Annales du Service des Antiquités de l'Égypte. 4: 176–177. Besoek op 30 Desember 2020.
- ↑ Reeves, C. N. (1990). Valley of the Kings: Decline of a royal necropolis. London: Kegan Paul International. pp. 134–135. ISBN 0-7103-0368-8.
- ↑ Porter, Bertha; Moss, Rosalind L. B. (1964). Topographical Bibliography of Ancient Egyptian Hieroglyphic Texts, Reliefs, and Paintings I: The Theban Necropolis, Part II – Royal Tombs and Smaller Cemeteries (PDF) (Tweede uitg.). Oxford: Oxford University Press. p. 546.
Skakels
wysig
Wikimedia Commons het meer media in die kategorie KV19.
Hierdie artikel is in sy geheel of gedeeltelik uit die Engelse Wikipedia vertaal.
