Koerse Haf
| Koerse Haf | |
|---|---|
 Satellietbeeld van die Koerse Haf | |
 Kaart van die Koerse Haf | |
| Koördinate: | 55°05′34″N 20°54′59″O / 55.09278°N 20.91639°O |
| Ligging: | Litaue, Rusland |
| Soort: | See van die Atlantiese Oseaan |
| Oppervlakte: | 1 619 km² (625 myl²) |
| Opvangsgebied: | 100 450 km² |
| Invloei: | Nemunas |
| Uitvloei: | Oossee |
Die Koerse Haf (Litaus: Kuršių marios, Russies: Куршский залив, Koersjski zaliv, Duits: Kurisches Haff) is 'n baai van die Oossee wat deel uitmaak van Litaue en die Oblast Kaliningrad (Russiese Federasie). Die baai, waarna soms ook as 'n strandmeer verwys word (alhoewel dit naby die Litause hawestad Klaipėda toegang tot die oop see het), word deur die Koerse Skoorwal van die Oossee geskei. Die Nemunas- of Memel-rivier mond met sy rivierarms – waaronder Atmata en Skyrvitė naby die Litause dorp Rusnė – in die Koerse Haf uit.
Die baai beslaan 'n totale oppervlakte van 1 584 vierkante kilometer (waarvan 415 op Litause en die res op Russiese grondgebied). Die grootste diepte is slegs 5,8 meter, met 'n gemiddelde diepte van 3,8 meter. Die baai het 'n maksimale soutgehalte van 8 promille.
Geskiedenis
wysig
Die gebied rondom die Koerse Haf het in die 13de eeu deel uitgemaak van die Koerse en Oud-Pruisiese stamlande. Later het dit aan die historiese gewes Klein-Litaue gegrens. Die ridders van die Duitse Orde het die deurvaart aan die baai se noordelike einde in 1252 vir die oprigting van hul vesting Memelburg en die stigting van die stad emel (tans Klaipėda) gekies. Die Memelgebied is in 1923 deur Litause magte beset en van die destydse Duitse Ryk geskei.
Die Nemunas- (Litaus) of Memel-rivier (Duits) het tussen die twee wêreldoorloë die grens tussen Litaue en Duitsland gevorm; die suidelike gedeelte van die Koerse Skoorwal en die Koerse Haf het tot in 1945 Duits gebly, terwyl die skiereiland naby die stranddorp Nida (Duits: Nidden) deur Litaue geannekseer is. Die Duitse gebied in die suide het oorspronklik deel uitgemaak van Oos-Pruise en is in 1945 deur Rusland beset. Hierdie gebied vorm tans 'n Russiese eksklawe, die Kaliningrad-oblast, wat deur twee lidstate van die Europese Unie, Litaue en Pole, omsluit word.
Sien ook
wysigEksterne skakels
wysig
Wikimedia Commons het meer media in die kategorie Koerse Haf.
