Kowie Rossouw
Kowie Rossouw (* 1945, Clanwilliam - ) is ’n bekroonde Afrikaanse jeugboekskrywer. Benewens haar skryfwerk vir die jeug publiseer sy ook romans vir volwassenes. Verder publiseer sy die digbundel Viooltjies uit my hart onder die naam Karolien Roux en skryf sy ook geestelike boeke onder die naam skuilnaam Hephzibah Maritz.[1]
Lewe en Werk
wysigJacoba Susanna Elisabeth Rossouw is in 1945 op die plaas Uitsig in die Sederberge naby Clanwilliam gebore[2] Haar skoolopleiding begin sy aan die Laerskool Vogelfontein, ’n plaasskool in die Sederberge. Vanaf standerd vier gaan sy skool op Clanwilliam en sy matrikuleer aan die Hoërskool Clanwilliam.
Sy bekwaam haarself as onderwyser aan die Wellington Onderwyskollege en hierna gee sy klas vir standerds een en twee en los later af by verskillende laerskole.
In 1968 begin sy werk as administratiewe sekretaresse by onder andere die Suid-Afrikaanse Weermag in Roelandstraat, Kaapstad, Krygkor in Strand en Helderberg Munisipaliteit in Somerset-Wes. Hierna word sy vryskutskrywer, terwyl sy ook afloswerk doen by personeelagentskappe. Sy neem Latyns-Amerikaanse danse by Fred Astaire dansskool.
In 1981 word borskanker by haar gediagnoseer, maar sy herstel weer ná hierdie traumatiese tyd[3]
Nadat sy in 2007 tydens ’n besoek aan Israel in die gees na die hemel en hel geneem is, staan sy voltyds in die bediening om mense regoor die land van haar ervarings te vertel en sy skryf ook boeke oor hierdie onderwerpe. Sy open die webwerf www.adeyahlove.co.za om haar bediening te ondersteun.
Sy is getroud met Frank Maritz en het twee seuns, Jan en Jacques.
Skryfwerk
wysigHaar eerste gediggie, My perdjie, skryf sy wanneer sy elf jaar oud is en dit verskyn in die destydse Byvoegsel tot Die Burger. Baie later begin sy meer ernstig skryf wanneer sy vanaf 1983 verhale lewer vir die radioprogramme Siembamba en Wielie Walie. Sy verwerf veral bekendheid vir haar jeugverhale.
Jeugverhale
wysigWillem en die bruin hings vertel van Willem se vele heldhaftige reddingspogings tydens die Laingsburgvloed van 1981.
In Avontuur in die Sederberge word die vriendskap tussen seuns op ’n staptoer herstel nadat ’n brand uitbreek en hulle op mekaar aangewese is vir veiligheid, terwyl Jacques Roux se vuurdoop op Ceres ’n soortgelyke tema het tydens ’n aardbewing.
In verskeie avontuurverhale laat die hoofkarakter en sy vriende misdadigers aan die pen ry. In Onheil op Eselsrus trek die maats wat tydens vakansie lewensredders is, ’n dwelmhandelaar vas; Op die spoor van blou goud vertel van ’n smokkelbende aan die Weskus wat gevang word; en in Operasie Blou Disa word wapensmokkelaars en terroriste gevang. Operasie Blou Disa is ’n finalis in ’n jeugboekwedstryd van Daan Retief Uitgewers.
Hierna verskuif sy haar aandag weg van avontuurverhale na meer geslaagde verhale oor menseverhoudings.[4] Koba glo dat haar ouer suster mooier is as sy en voorkeurbehandeling kry en sy ly dus aan ’n minderwaardigheidskompleks. Boonop moet sy alleen op die plaas agterbly wanneer haar suster koshuis toe gaan, sodat sy van rumatiekkoors kan herstel. Op die plaas ontdek sy egter ’n halfdooie verkleurmannetjie wat sy geduldig versorg. Die dier se geleidelike herstel is simbolies van haar eie herstel en geestelike groei. Wetenskaplikes wat die plaas besoek bevestig dat dit inderdaad ’n baie seldsame dier is en almal is beïndruk met haar inisiatief. Aan die einde van die verhaal is Koba selfstandig en baie meer selfversekerd en verdraagsaam.[5]
Die pad oor die berg kom huis toe vertel van Salmon wat uit Gammaskloof verban word omdat hy toegelaat het dat ’n luiperd sy jonger broer aanval en selfs sy pa verwerp hom. Hy raak betrokke by die bouwerk aan die Swartbergpas en ontmoet die meisie van sy drome, maar kan eers in sy gemoed met Gammaskloof en sy mense vrede maak wanneer hy uitvind dat sy pa eintlik sy stiefpa is. Hierdie boek word in 1990 eervol vermeld tydens die toekenning van die M.E.R.-prys.[6]
Wie se hart kan dit dan hou? vertel van David wat tydens die vakansie saam met sy oupa op ’n walvisboot werk om geld te verdien om sy ma in staat te stel om sy alkoholis-pa te verlaat. Wanneer hy egter gekonfronteer word met die wreedheid van walvisjag kan hy nie met hierdie onderneming voortgaan nie. Gaandeweg besef hy dat geld nie alles is nie en ook nie alle probleme kan oplos nie. Die tema van omgewingsbewaring word onopsigtelik in ’n stewige spanningslyn geïntegreer. In 1990 ontvang Wie se hart kan dit dan hou? die Sanlam-prys (Brons) vir Jeuglektuur.[7]
Wanneer tekkies blom[8] vertel van die vriendskap wat ontstaan tussen ’n wit en swart kind wat albei koerante op die straathoeke verkoop. Simon se ma het hulle verlaat en hy en sy pa kommunikeer nie goed nie. Hy leer die straatkind Richard ken, wat ten spyte van sy omstandighede baie presies is oor sy werk as koerantjoggie. Die verhaal gee tieners insig in hoe om onvermoëns te aanvaar en moontlikhede te ontwikkel.
Moyeni die aandwind is ’n Sterboekie vir graad twee lesers en word ook in Engels vertaal as Moyeni the evening.
In[9] Grootword is nie vir sissies nie bly die vyftienjarige Johannes (’n bruin seun) saam met sy broer en ma op Clanwilliam, maar kuier vir die Desembervakansie by sy pa in Wuppertal. Hier ontmoet hy vir Samantha, wat maak dat hy nie wil teruggaan huis toe nie. Hy kom egter agter dat sy skoenmaker pa nou selfs meer drink as toe hy nog klein was en dat die drank hom en sy ma uitmekaar gedryf het. Dan het Ant Mary met haar twee seuns ook nog by sy pa ingetrek. Hierdie jeugverhaal fokus op die verwikkelde verhoudings tussen mense en Johannes leer dat daar meer vrae as antwoorde in die lewe is. Hierdie boek is in 2006 op die kortlys vir die toekenning van die ATKV-Prosaprys.
Lirieke
wysigBenewens jeugromans skryf sy lirieke, wat onder andere deur Randall Wicomb opgeneem word. Hierdie liedjies sluit in Kosmosblomme, Die Oeslied, Graaff-Reinet, Kopersmid, Riversdal se heide, Platteland O hartland, Middelburg, Patensie en Rypsomer-liefde.
Verder skryf sy saam met Randall en Hans du Plessis Griekwa-Afrikaanslirieke vir liedjies op die CD Hie’ langes my. Sy skryf ook die temaliedjies van die televisieprogram Boeregebruike, ’n liedjie vir Leonie van Niekerk se Christelike CD Jesus, ons hoop en skoolliedere vir Klein Skooltjie by Upington, die Voorbereidingskool Worcester en die Voorbereidingskool Durbanville.[10]
Ander skryfwerk
wysigVolwasse lektuur
wysigSy skryf ook werke vir volwasse lesers. Rooi somer is ’n novelle wat in 1988 genomineer word vir die ATKV-prys en onder die top vyf eindig en Mia-Meraai, Dobbeldans en Rooi orgidee is romans vir volwassenes.
Digbundel
wysigViooltjies uit my hart is ’n digbundel met geestelike verse wat sy onder die naam Karolien Roux publiseer.
Christelike lektuur
wysigOnder die naam Hephzibah Maritz skryf sy boeke oor die geheimenisse van die hemel en die hel, nadat sy in die gees na die hel en die hemel geneem is. Sy is deur God getaak om mense te waarsku teen die werklikheid van die hel. Die naam Hephzibah beteken “my behae is in hom”. Die boek oor die hel is getitel Geheime van die hel ontbloot en sy skryf ook ’n boek oor hemelse visioene,[11] Geheime van die hemel ontsluit.[1]
Eerbewyse
wysigAs oudleerling van die Hoërskool Clanwilliam kry sy in 1989 ’n meriete toekenning vir haar aandeel in die uitbouing van Afrikaans in woord en lied.
Publikasies
wysigWerke uit haar pen sluit in:[12]
| Jaar | Publikasies |
|---|---|
| Kowie Rossouw | |
| 1983 | Willem en die bruin hings |
| 1984 | Avontuur in die Sederberge |
| 1985 | Jacques Roux se vuurdoop op Ceres |
| 1986 | Onheil op Eselsrus |
| Op die spoor van blou goud | |
| Operasie Blou Disa | |
| Koba | |
| 1987 | Rooi somer |
| 1989 | Die pad oor die berg kom huis toe |
| Drie loop saam | |
| 1990 | Wie se hart kan dit dan hou? |
| 1994 | Somersproete |
| 1995 | Wanneer tekkies blom |
| 1996 | Moyeni die aandwind |
| 2000 | Mia-Meraai |
| 2003 | Dobbeldans |
| 2004 | Rooi orgidee |
| 2005 | Grootword is nie vir sissies nie |
| 2006 | Tweede tango |
| 2008 | Liefde is magic |
| Karolien Roux | |
| 1986 | Viooltjies uit my hart |
| Hephzibah Maritz | |
| 2008 | Geheime van die hel ontbloot |
| 2010 | Secrets of hell revealed: revelations of hell for the salvation of the lost |
| 2011 | Geheime van die hemel ontsluit |
| Secrets of heaven unveiled: revelations about God’s love for his bride | |
| Halachah | |
| 2015 | The little blood soaked book: kingdom of heaven on earth |
Bronnelys
wysigBoeke
wysig- Wybenga, Gretel en Snyman, Maritha (reds.) Van Patrys-hulle tot Hanna Hoekom. Lapa-Uitgewers Eerste uitgawe Tweede druk 2005
Verwysings
wysig- ↑ 1,0 1,1 Ade Yah Love: http://www.adeyahlove.co.za/wmenu.php
- ↑ Rossouw, Kowie. Lewenskets. Nasionale Afrikaanse Letterkundige Museum en Navorsingsentrum (NALN) Bloemfontein
- ↑ Ade Yah Love webwerf: http://www.adeyahlove.co.za/wmenu.php
- ↑ Ellis, Zirkëa. Die Burger, 8 Januarie 1987
- ↑ Le Roux, Marina. Die Burger, 21 September 1989: http://152.111.1.87/argief/berigte/dieburger/1989/09/21/15/4.html
- ↑ Le Roux, Marina “Die Burger” 25 Oktober 1990
- ↑ Le Roux, Marina. Die Burger, 23 November 1995
- ↑ Steenberg, Elsabe. Beeld, 2 September 1996
- ↑ Bouwer, Anna-Retha. Beeld, 10 April 2006
- ↑ Storiewerf: http://www.storiewerf.co.za/cv's/cv_kowierossouw.htm
- ↑ De Villiers, Johannes. Skrywer van jeugboeke: ‘Só is die hel’. Rapport, 9 Mei 2010
- ↑ Worldcat: http://www.worldcat.org/identities/lccn-no90-27688/