Lola (renmotor)

Lola was 'n Engelse vervaardiger van renmotors, opgerig in 1961 deur Eric Broadley in Huntingdon, en na 'n bankrotskap in 2012 ontbind.

Lola was bekend in motorwedrenne maar het ook 'n roeibootafdeling Lola Aylings gehad. In 1997, na 'n onsuksesvolle Formule Een-avontuur met Lola MasterCard, is Lola deur Martin Birrane gekoop.

Lola B05/40

Lola het uithouvermoë-motors gebou sedert sy ontstaan. Die Lola T70 was suksesvol in die Wêreld-uithouvermoëkampioenskap en in die Can-Am-reeks. In die tagtigerjare het Lola motors vir IMSA GTP gebou. Die motors was toegerus met Cosworth-, Mazda- of Chevrolet-enjins. Die Lola B2K/10 het verskeie oorwinnings in die Amerikaanse Le Mans-reeks behaal. Die Lola B05/40 het hierdie klas in 2005 en 2006 gewen. Die Dyson Racing-span het die motor by die 24-uur Le Mans gebruik.

Formule 1

Lola het die eerste keer in 1962 met die Bowmaker-Yeoman-renspan meegeding. Die motor het die nie-wêreldkampioenskap Grand Prix van Rome in 1963 gewen.

In 1967 het Lola Honda gehelp om 'n renmotor te bou. Die motor het die Honda RA300 geword en is deur die pers die Hondola gedoop. Die motor het die Italiaanse Grand Prix gewen.

In 1985 het Lola 'n motor vir die Haas-span gebou met 'n Hart-enjin. Toe die span finansiële probleme ondervind het, is dit deur Bernie Ecclestone gekoop.

In 1989 het Lola 'n motor vir die Larousse-Camels-span gebou. In 1989 is 'n Lamborghini-enjin bygevoeg. Hulle het 'n paar punte verdien met die jaers Éric Bernard en Aguri Suzuki. Omdat hulle gelieg het oor wie die kar gebou het, is al hul punte in 1990 weggeneem.

Die Scuderia Italia-span het Lola gevra om 'n motor te bou wat beter is as die Dallara wat hulle in vorige jare gebruik het. Hulle was toegerus met Scuderia Ferrari-enjins. Aangesien dit maar sleg gegaan het, het die span voor die einde van die seisoen aan Formule 1 onttrek.

In 2009 het Lola vir die 2010 Formule 1-kampioenskap ingeskryf. Lola wou aan die kampioenskap deelneem toe die nuwe reëls in Formule 1 dit moontlik gemaak het om met 'n beperkte begroting aan die kampioenskap deel te neem. Op die ou end het hulle egter nie deelneem nie.