Louis Kraal

Louis Steenkamp (1896–1978) was ’n politikus, geskiedkundige en dramaturg, wat sy drama onder die naam Louis Kraal laat publiseer.

Lewe en werk

Louis Stefanus Steenkamp, wat sy drama onder die naam Louis Kraal skryf, was op 21 Mei 1896 in die distrik Burgersdorp gebore as kind van welbekende boere in die distrik. Sy skoolopleiding ontvang hy aan Paarl Boys High School en hy studeer dan verder aan die Universiteit van Stellenbosch, waar sy hoofvak Geskiedenis is. Hier is hy baie bedrywig in die studentelewe en dien op verskeie liggame. So is hy lid van die studenteraad en minister van die studenteparlement. As lid van die debatsvereniging is hy toneeldirekteur en hoof van ’n komitee wat teateropvoerings organiseer en in 1930 is hy lid van die Suid-Afrikaanse Studentespan na Engeland om deel te neem aan ’n debatskompetisie. Hy behaal die B.A.-graad, B.Ed.-graad, M.Ed.-graad en D.Ed.-graad aan die Universiteit van Stellenbosch. Die titel van sy verhandeling is “Onderwys vir blankes in Natal 1824–1940: ’n populêr-wetenskaplike verhandeling”, wat in 1941 gepubliseer word. In 1931 trou hy met Blanche Olga Botton van Rhodesië, wie se ouers oorspronklik van Skotland is. Sy is op 2 Mei 1905 gebore en op 14 Desember 1965 oorlede. Na universiteit gee hy lank onderwys op Ladysmith en is baie bedrywig in Natalse sportkringe, waar hy voorsitter is van die Noordelike Distrikte se Rugby-unie. Verder is hy lid van die bestaansveiligheidsraad en beywer hom vir die bevordering van rasse-samewerking in Suid-Afrika. In 1943 word hy as Verenigde Party verteenwoordiger verkies as lid van die Volksraad vir Vryheid en hy verslaan in die proses die Nasionale Party-verteenwoordiger, die latere goewerneur-generaal dr. E.G. Jansen. In die verkiesing van 1948 word hy egter deur die Afrikanerparty-kandidaat verslaan, maar in 1949 word hy onbestrede verkies as Volksraadslid vir Drakensberg. In September 1955 verower hy die Hillbrow-setel in ’n tussenverkiesing. Hy dien op verskeie rade en kommissies, onder andere die Saamwerkunie (waar hy sewe jaar lank sekretaris is), die Burgergrafte-kommissie, die Historiese Monumente-kommissie en is voorsitter van die Historiese Kommissie van die Saamwerk-Unie. Vir ’n tydperk is hy ook ’n senator. Hy is op 18 Julie 1978 oorlede.

Skryfwerk

Sy drama “Noodlotsweë” is ’n tragedie in vier bedrywe. As historikus stel hy saam met A.G. du Toit “Die Bloedrivierse Eeufeesgedenkboek” saam en begin saam met H.J. van der Berg en V.C. Adams die Thembani Collection Trust, wat in die Mtonjaneni Museum tussen Melmoth en Ulundi historiese artefakte rondom die geskiedenis van die inheemse volke in Natal bewaar. Saam met G.S. Nienaber is hy verantwoordelik vir publikasie van “Die dagboek van Anna Steenkamp en fragmentjies oor die Groot Trek” en sy proefskrif word in 1941 gepubliseer as “Onderwys vir blankes in Natal 1824–1940: ’n Populêr-wetenskaplike verhandeling”. Verskeie van sy artikels oor die geskiedenis verskyn in Suid-Afrikaanse tydskrifte.

Eerbewyse

’n Goue medalje word deur die Historiese Monumentekommissie aan hom toegeken vir sy geskiedkundige navorsing en hy is by die ontvangs daarvan slegs een van vier mense wat op soortgelyke wyse vereer is.

Publikasies

Jaar	Publikasies
1934	Noodlotsweë
1938	Die Bloedrivierse Eeufeesgedenkboek (saam met A.G. du Toit)
1939	Die dagboek van Anna Steenkamp en fragmentjies oor die Groot Trek (saam met G.S. Nienaber)
1941	Onderwys vir blankes in Natal 1824–1940

Bronnelys

Boeke

• Nienaber, P.J. “Hier is ons skrywers!” Afrikaanse Pers-Boekhandel Johannesburg Eerste uitgawe 1949

Tydskrifte en koerante

• Anoniem “Dr. L.S. Steenkamp” “Die Suiderstem” 1 November 1949

Internet

• Eggsa: http://www.eggsa.org/library/main.php?g2_itemId=797903

Ongepubliseerde dokumente

• Nasionale Afrikaanse Letterkundige Museum en Navorsingsentrum (NALN) Bloemfontein Dr Louis S. Steenkamp Lewenskets